¹ . Ekele mu yosalio kapanom kpom eye Laila gamoh, mu unujiobhe kpom bhu ejiale ² . Yabu kpu uchikpu dhielebhema li ugwe une uwedhini li udhoya, umashi bhu li akwu mu Jizos zhikalashi lebhe uli-ekpom ³ . Mu emene jiakeshia bhela li ubuyawenia uduke Eli-ubhoni ⁴ . Ekele mu odhumadho-bhela eli lishili ogbomadu, mu-ukpakamobhe ukwu-udhoh mu Jizos uzhieya, kpom ubha kpakamabhe adhi dhua, mu ubulagawe bhela li ekpali mu uzhioya. ⁵ . Gontu li uweji uwhetu bhe, yabu kpu Jizos bha kanile uduke eli-ubhoniya “unwo, umeyeshi yo enwele usabeteni” ⁶ . Lekelemu e-emene lime emene ubha-abha zhibhe li unazhi ezhi ladhiya. Mu-ugbobhe li unkuma bhe ⁷ . Iyela odo mu udukem kpo-ekpo kpomla? Akagidele! Nina asabetedho umeyeshi ugama Ebilikpabi la? ⁸ . Li ekele neten kpu Jizos majimale luwaya, iye ugbegbe bhe bu. Mu ukunie bhe, uyela do mu inweni ugbegbe zhikpom li unukuma yola? ⁹ . Nde-iye ka unwe uwe li ukani uduke eli-ubhonim la, umeyeshi yo enwele usabeteni, mubu luka nuzo, gonu ekpabi yo mu ikaze? ¹⁰ . Kpu emele mu imajini bhu onwo mu madu egede new ugbakpo usabeteni umeyeshi li uwam. Yabu kpu ukanile uduke eli-ubho ya. ¹¹ . Makaniyo nuzo, gbahutu ekpali yo muikaze udhoyo ¹² . Mu-unuzo, lekele neteni mu ugbatuo ekpali, mu ukpuloshio lununu bhele bhele bhe, kpu emele mu bhele bhele bhe unwodhabhe enye li unebhe Ebillikpabi utubuezewe olu. Mu okobhe yele akawejie ujiyem to-umeo. ¹³ . Mu ukase gba-jio ukwu olimini, mu ogbomadu uchikpudhio bhela, yab kpu uzhilebhe iye. ¹⁴ . Li ugalaga agalaga, mu uwejio libayi, unwomu Alipeus kpuzhile henazhi li udho emene ugbolo una owayi, mubha kaniola, chiya me, mu-unuzo, mu uchizela ¹⁵ . Leke Jizos zhilu dhibhidhi li udho lebayi, ya Ii emene ugbolo una owayi ligba emene umeyeshi, ligba emene uzhiya, utumahobhe ogbo luchiza. ¹⁶ . Ekele mu Emene-Ubhabha li emene Palasi wejiobhe kpom bhu Jizos li emene zhibhekpom dhikatahobhe bhidhi. Yabu kpu ukanilebhe emene uzhiya. Iyela odo mu udhikeshi emene ugbolo una owayi li emene umeyeshi bhidhi la? ¹⁷ . Kpomu Jizos nujio iyem, mu ubha kanio bhe. Ogbo emene mu ukwaliebhe akwali li elibhe uwudhigabhe nye dibio, obugbo bu emene dabhe eli. Mejiamu lubha hwu emene uma buhuto emene umeyeshi. ¹⁸ . Lumom, emene uzhi Joni li emene Palasi unazhibhe li ubu-unu, yabu kpu e-mene jalebhe lubha kani-a, iyela odo mu eneme uzhi Joni li emene uzhi emene Palasi uzhibhe li ubu-unu mu eme uzhi yo gwebhe uzhia la? ¹⁹ . Mu Jizos bha kanio bhe “Ekemu emene ujiabhe udho-ugwo bubhe unu leke nyetu ununwe uzhikeshi gedhebhe la? Nye tu ununwe zhigedhele, emene Jiabhe udha ugwo ndeke obuobhe unu. ²⁰ . Buhuto ekele zhi luja kpu anamalebhe nye tu-ununwe lime bhe, leye zhiho kpeye, yabu kpu obulebhe unu. ²¹ . Uzhie nye ekeshi ibe ukani uwu Ii olu kappa ukani. Ubule kpeye iye mu keshieya awa bu awa, a-amu uwuya wamali leli amu ukaniya; oyokaho bu unazhi unuzu ya. ²² . Uzhie nye gbashi menye uwu lime ukani okpokolo menye. Ubule kpeye menye ya agbakpo-a bu agbakpo, a-menye ya li okpokolo ya tadhubhe ewe. Kama obuo kpeye, menye uwu ushishia bhe bu li okpokolo uwu. ²³ . Li eye ukpeni, yabu kpu Jizos galagala o-out ika oka, mu emene uzhiya bidobhe uwotu ubotu. ²⁴ . Yabu kpu emene Palasi kanile-bhe ma “Nyetu, eyalado mu umebhe iye oloko li eye ukpeni la? ²⁵ . Akani lebhe, ikagudhie ni iye Dabit me lekemu uzhio lime mkpa li inwe ya li emene muzhikeshio bhela. ²⁶ . Likpu ukpudhule lime udho Ebilikpabi li ekele mu Abiata buo nyishi oseja mu udhio bhidhi “ununu ya,” amu uzhio li oloko ladhi udo emene zhibhe ugama emene ishi oseja, ugonu dhihu ubotu li une emene mu zhikeshio-bhela ²⁷ . Mu Jizos bhako, umeni bhe Eye-ukpani bu madu-egede, umeniebhe madu-egede Eye ukpeni. ²⁸ . Kpomu ubuho kpeye, unwomu madu egede bu Nyenwe, umashi bhu bu li adhi eye ukpeni zhi.”