¹ Ombu ubido ebido uzhiuma mu Jizos Klist, unwo mu Ebilikpabi. ² Zhi kpomu ugbama gbe ama li ukpalahu Azaya nye, amuma. Nyetu, meyigashi bu̱ nye-uzhime lu ununu yo, nye emekeni yo ichiakpa̱. ³ Ombu ulimu uhwu dhidhio lime ihwo, "meke ichakpa mu nyenwe ye, m'a mu̱ u̱chini ēchini." ⁴ Joni ujia mu ugbadhiewo madu egede li mini, lime ihwo, il uzhikala ugbahiwe li mini uyosali-oyosali gontu li usabeteni bhiyo. ⁵ Yabu kpu gbele gbele igbu Judiya li emene zhibhe li Jelusalem ulolebhe li uzekeshia. mu gbadhiwe bhe li mini li olimini Joda, gontu li ukaloshiwe bhiyo bhe. ⁶ Joni uyeji leli ōkpō inyanya ēdhi O̱kpu̱ ya bu okpo-ōnō. Mu bhidhi ya ubuo ekpeta li o̱ga o̱gbeni. ⁷ Ukpo āma "Uzhinye zhi lijia me lozu unwekame li ugbakpo; edhi okolo ya modhuma-dhom li utogama-a. ⁸ Me magbadhiwe yoni bu limini, buhuto, ya, agbadhiwe yoni bu li uwa egwele. ⁹ Yabu kpubule li ubheya, Jizos ubuseli bu li Nazalet muzhio Galili, li ubha gbadhiwe-a bhe limini leka Joni, lime Olimini Joda. ¹⁰ Kpomu Jizos kpelio li mini, yabu kpu uwejile eligwe kpu ukpumalile, mu uwa-egwele kpodhuola leli kpomu elesi. ¹¹ U-uli ekpō buzehi lolu-igwe mu uka "Ibu unwom mōgushio ogushi. Itoweme obu bhaka." ¹² Yabu kpu uwuma dulema mudugashiela lime ihuo. ¹³ Uzhi lime ihuo li ugwu eye ibȯ, mu Ekpesu umala. Uzhikeshi bu ōnō kpadhibhe iye, mu emene uzhi nyeshike abhe enye. ¹⁴ Lumom, kpomu umotumabhe Joni., Jizos kpudhu li Galili. Li uzhikala uzhiuma mu Ebilikpabi. ¹⁵ Mu-uko, "ekele odhumale, eleze Ebilikpabi zhiho̱ uzedhu. Yosalini mu inatuni uzhiumam." ¹⁶ Lekemu uzhio li ukaze ize li uku olimini Galili, yabu kpu wejile Simoni li Andru nwana Simoni kpu zhile luchidhibhe ijiadhi li ukwu olimini Galili, uweji, Simoni li Andru nwana simoni kpu zhile li uchidhi yiadhi li olimini, ububhe emene ugbukpa. ¹⁷ Mu Jizos kaniobhe, Jiani, chiya ni me, memeweyoni bu emene udoyawe madu. ¹⁸ Li e-ekele neten mu-usabete bhe ijiadhi bhe li uchize-a ¹⁹ kpomu Jizos kaze gba ununu ntuko, yabu kpu wejile Jamisi unwo Zebedi li Joni nwana-a; uzhibhe lime ugboh li umeketu igiadhi. ²⁰ Yabu kpu uhwu legbe mu usabete bhe idabhe Zebedi li boyi bhe lime ugboh, mu uchize bhela. ²¹ Mu ubha kpudhuobhe li kapanum, leya ude-eli, yabu kpu Jizos bha kpudhule lime udho ukpeni li uzhi iye. ²² Uzhiezhi ya wodhawebhe enye, iyedoni, uzhibhe iye kpȯmu nyenwe ugbakpo, ubuo kpomu emene ubhabha. ²³ Lekaya yabu kpu u-unuke nwe uwa bhiyo chiloshile ikpwu, ²⁴ mu ubhako̱ "ndiye yo li yele ameketala, Jizos nye Nazalet? Ijia adhi ubha tashiye la? Mamaji nye ibu-ibu nye zhi egwele mu Ebilikpabi!" ²⁵ Mu Jizos gbochio uwabhiyo ya li ukā, "Gbeyo unu mu ibuzelia lime!" ²⁶ Yabu kpu uwa bhiyo ya nugbolema lele mu ubuze-liela lime leke mu uchio ikpu li uli bie eke. ²⁷ Gbele gbele madu wodhabhe enye, mu jutaobhe, "iyela zhiomu la? uzhi ezhi uwu lime ugbakpo! Utuni dhihu bu uwabhiyo uka a-ukpeniabhe ete!" ²⁸ Yabu kpu ukaloshiwe ya gazomale gbele gbele igbu Galili ²⁹ Kpomu ubuzelimabhe li udho ukpeni ya, mu ukpudhuabhe ludho Simoni li Andru, ligba Jamishi li Joni. ³⁰ Lumom, ina-ugwo Simoni, Ehu-ogele whela, yabu kpu ubha kani lebhe Jizos iyebasali li unazhi ya. ³¹ Kpomu buokpeye, mu -ujio, mu dotuola leka ludobuza olu, yabu kpu ehu-ogele ya sabetelema, yabu kpu ubha meni lebhe ugbolo. ³² Li ilaya, kpomu elanwu suo̱, mu yawe nye-labhe emene elidhe, li emene uwa-bhiyogo. ³³ Yabu kpu ulaya logbe yulu lebhe unobudho. ³⁴ Mu ugwo emene tu-ogbo li elidhe zhili-selise, mu ukpachima-o uwabhiyo tu-ogbo, buhuto uwabhiyo ya kpobhe ekpo, iyedoni umajiabhe nyebu. ³⁵ Mu ubuzeho li echi onyukwe, lekele adhi aka bolie oboli ludhe dhio edhio ladhi yaneteni nazhi, ladhiya, mu udhio. ³⁶ Simon li ogbo emene mu zhikeshi gbele wudhiga-bhe uwudhiga. ³⁷ Ubha wu-wejio bhela mu kanio bhela, "gbele gble madu wudhiga bhe yo." ³⁸ Mu ubha-kọ, "Ngwani mu akazeni udo igbu li otu ulamu ushikoshiebhom. kpu emele mu nze zhikalashibhe uzhim. yabu iye-mu mejanio adhim." ³⁹ Ugakoshikpo Galili logbo, li uzhi uzhi-uma li udho ukpeni tu ogbo̱, li ukpachi dhihu uwabhiyo. ⁴⁰ Mu nye asasa jiakeshie la ludhio gontuli ujishi ukpunuko, mu kaniola "u̇mashile yo, inwe ike lume me menwe elime." ⁴¹ Li uyuluka li izhi, Jizos gbate eka li ukpotuna, mukaniola "Umashime amashi. Zhi sasalala." ⁴² Li ekele neteni mu asasa ya sabetela, mu uzhio sasalala. ⁴³ Mu Jizos tukpa-o eli li udo-a eka lete, mu-kaniola bhu kaze. ⁴⁴ Mu ubha kaniola, "tukpa eli mu-igwē ukani Onwunie onwunie iye iye, buhuto kaze, mu itugoshi eli yo nishi osej, a-ize mu iso-eja uzhi sasa-lola kpomu oloko Moses" ukọ, muzhinibhe liye ukaloshiwe. ⁴⁵ Mu kaze-o lukaloshiwe ligba uzhikala uli-ekpom li ugwe unwe ogbose, udhumaho adhi Jizos okpudhi dhodhe li otu ulaya, ukaze hwo bu adhi woli owoli. Umashi bhu zhidhihuȯ ya, yabu kpu madu egede uzekeshi dhihu lebhe ma gontu li ubuzeli li bhele bhele ibeh.