¹ L'ogbo eyee l'oge gaga Siza Ogostos uyi oloko bhu ugwugbedebhe bhele bhele madegede ubebhe l'uwa. ² Omubu aunuzu ugwubhe madegede l'ekele kwilinus ubo gobhano Siliya. ³ Mu nyenyobula ukaze igbubhe kpom emelemu ubhashiya ewa li ugwugbede madegedeya. ⁴ Josepu ubuzele l'Galilii amu uzho l'Nazaleti mu uzo Judiya amu uwhubhe udho Debid, ubo Betilihem, iyedoni ubuzeli l'ekpemu Debid. ⁵ Uze adhiya kpagale mu ugwushikatabhe ewaya l'Meli nyemu uwhedatabhe bhu bha'tuta l'bhota, mu uzhhidhiwho l'olu. ⁶ Mu udguma oge, kpom uzhibhe li adhiya, mu oge umunwo udhumo. ⁷ Mu umo unwo ukoma, unwo nuzu ya, mu ugbu gbashikpola ukani ukoda ukoda, mu unyitabhe l'udho okpalunam. Iyedhoni udho adhi anazhibhe uzhi. ⁸ Uzhi ogbo emene udu akpalanama uzhibhe li ibeya lunyeshiketu ogbo onobhe li abali ⁹ Akpu nyeuzhi Nyenweye nwune ulokeshilebhe mu ebube Nyenweye ukpupidhebhe mu bhele bhele bhe uyulukabhe l'otogwu bu-eke. ¹⁰ Mu nyeuzhi Nyenweye, ukunebhe, "Etoni otogwu iyedoni me mayawe uzhi umanu amanu ubkpom bu enebu umu madegede ekpema uto ubu eke. ¹¹ L'tam omunyilebhe ye Nye Ugawe Uwa l'ula Debid. Nyeya bu Nyenweye Klaisi. ¹² Omubu iye ugbudhishi eji l'utugoshi, ewejoni bu unwo umubhe uwu obhubha kpoleme ukani odo lini, unyitabhe l'udho akpa-l'anama. ¹³ L'ugwe ubheshi anwa, l'adhiya, ogbo madegede ubuzelibhe l'olu-igwe bhe l'nyezhi Nyenweye uzhibhe l'upadiwe Ebilikpabi mu ukadhiwhobhe, ¹⁴ "Unune zhini Ebilikpabi l'adhi ukakpolibhe uyodhu uzhi l'uwa, uzhini emene amu-aya utowele unukuma ¹⁵ Mu ekele udhumo, oge nye uzhi Nyenweye buzelimo l'adhiya mu uzhobhe ukaze imegwe akpu ma ze Betilihem, mu gwejini iye mu umomu, amu Nyenweye umo ma-majini. ¹⁶ Mu kadhebhe ize enwenwa l'udhuma adhiya mu uwejobhe Meli l'Josepu l'gbajine unwoya uzhi l'una ana l'udho akpa-l'anama. ¹⁷ Ekelemu uwejimabhela, mu ukakpobhe bhele bhele iye ukunikpobhe ubhasa l'unwoya. ¹⁸ Bhele bhele emenemu unijibhe iyemu emene ududhiga akpa-l'anama ukabhe, unwodhabhe bu enye. ¹⁹ Buwhuto Meli ugbedhiwe bhele bhele iyemu ukabheya iye. Utowa unukuma. ²⁰ Emene udu akpa-l'anama mu uloshibhe ozu l'utubuze l'upadhiwe Eze Olu-gwe l' bhele bhele iye mu unujibhe mu unetu dhiwhubhe kpom ujimu bhewewe ukaloshibhe. ²¹ Ekelemu eyee sato ugbo akpu ukpushibhema l'udho mu uwho-abhe Jizos zhikpu nye-uzhimu Nyenweye ukale tutu mu bha zhiwhobhe l'oluya. ²² Ekelemu ogbo eyeemu udhu umugbo uzumawho zhikpu oloko Mozhizhi ukale, mu uwhuyawe abhe udho ukpenimu uzho l'Jeluselem l'uwhushini Nyenweye. ²³ Zhikpom ubhabhe l'oloko Nyenweye. Bhele bhele nwo ukoma ukpumale uwo ina, ebhetenibhe bu Nyenweye. ²⁴ Kpombokpeye, mu usobhe eja l'une iye umene zhikpom ukabhe l'ime oloko mu Nyenweye, nwo elesi ibho. ²⁵ Nyetu uzhi uduke l'Jeluselem ewaya bu Simon, udukem bu nye uma l'nye ukeshike l'ugbolo Ebilikpabi. Uzhi l'uwudhiga umegbede Izhleli l'gba Uwa Egwele. ²⁶ Obumale iye Uwa Egwele ugbama ama bu ndeke eweji enwu tutu uwejima Nyenweye Kalaisi l'enye. ²⁷ Mu uwa-uma udu Simon l'uga udho ukpeni, kpom ida l'ina uwhuloshebhe nwo, Jizos li umena kpu omunala l'oloko ukale. ²⁸ Mu uwhushiya nwo l'eka mu upadhiwo Ebilikpabi mu uko, ²⁹ L'umom, nwodhoyo ukadhewho l'uyodhu Nyenweye, uzhi kpom uli ekpo yo uka, ³⁰ "Iyedoni ekpeleni me ewejile udokpewe. ³¹ Amu yo imekekpo l'ununu bhele bhele madegede. ³² Usamali amu ukalosho emene amajebhe Nyenweye l'ebube emene Izhleli. ³³ Ida li ina uwodhabhe enye l' ie ukabhe ubasa l'ya. ³⁴ Simon uwokwanibhe mu ukunio Meli Ina Nyetu, unwom, utulebhema eka l'udada l'ugbabuzeli olu atutu madegede l'ime Izhleli l'gba ulugoshi bu ulodhibhe olodhi, ³⁵ Adha okpopetayo bu l'ununkuma kpagale mu atutu ugbegbe ubotu unukuma mu ukaloshibhe. ³⁶ Onye amuma unyoma uwhubhe Ana uzhi l'adhiya. Nwaname bu nwo Panuweli ubuseli l'ekpe Asha. ³⁷ Ununwem obule unukani, ebekeshile izha ali sabo kpom ugamamo ekele akamaji ukoma. Ubedhi ukudho bu ugwu ala ino l'ala ibo. Unwe usabhete udho ukpeni eka, uzhe uzhi l'ubuonu l'ekpele abali l'eyee. ³⁸ L'ekele neteni, mu ujio uzedhu bhe mu utedhiwho Ebilikpabi meka, mu ukune ogbo emenemu uzhobhe l'usejike l'uweji udokpewe Jeluselem iye kpani nwoya. ³⁹ Kpomu umekpobhe bhele bhle iye mu udhunibhe l'ume, kpom oloko Nyenweye uko, mu yabhe Galilii, ulabhe, Nazaleti. ⁴⁰ Mu nwoya uzodho unwe iyi umaji iye ukadheze l'ununu, umanuishi Ebilikpabi uzhikeshama. ⁴¹ Emenemu umobhe uzebhe Jeluselem bhele bhele ala l'iye kpani ogwu ugakpewe. ⁴² Ogemu udhuma dhi-ala-l'ala-ibo, mu 'kazebhe ozu l'omunala eeekele ogwu. ⁴³ Kpomu unazhobhe mu uzukpo l'ogbo eyee ogwuya, mu uyabhe udho unwobhe, Jizos unakebu l'ozu l'Jeluselem l'ugwe umaji amaji Ida l'Ina. ⁴⁴ Ida l'Ina ugbebhe bu akadhe keshimale otu emenemu uzebhe izeya l'uze. Ize ugonuma eyee lowhulu. Yabukpu ubidolebhe uwudhiga l'otu udho nwanabhe l'nwujebhe. ⁴⁵ Kpom uwejebhela, mu uyabhe Jeluselem l'uwudhigaka l'adhiya. ⁴⁶ Abali Ito ugamakpokpai mu uwejobhela l'udho ukpeni uzhi l'unazhi ezhi l'echinabo ogbo emenemu uzhobhe iye, uzhi l'ukpeshinabhe ete l'ujo-ajuju. ⁴⁷ Bhelebhele emenemu unujebhe iye uka uwodhabhe enye, l'uwota owotaya l'usa ajujuya. ⁴⁸ Kpomu uwejobhe, mu uwodhabhe enye. ⁴⁹ Mu Ina ukunela, "Nwo, umekpala mu ikpani whoyele agwazhikpomula?" Nyetu, Idayo l' me awukoshimaleyo adhi. ⁵⁰ Buwhuto uwotabhe ogbo otu iyemu ukaya. ⁵¹ Mu ukaze keshobhe udho Nazaleti. l'uyibhe eso, Ina uto unukuma l'bhele bhele otu iyemu uloya. ⁵² Buwhuto kpom Jizos uzodhuze l'umaji iye l'obu-eke, akpu ukazedhi whule l'umanu ishi l'ime Ebilikpabi l' umu madegede.