¹ Atutu madegede ugbakebhe l'uzhigbabhe uwadhi li ukaloshi, otu iyemu umezukpo lieme ye. ² Kpom ujimu ye adhitola l'ekpe l'eka emene nuzumu, amubhobhe nwudho uli-rkpomu. ³ Unyetudhiwha kpomu iye dadhu adadhu iyedoni, unimini umi mumowejo kpom mene bhele bhele iyeya uzuta ozuta l'ubido ebido. L'ubha, l'ukaloshi iye, l'ibakpa umanu amanu amu zokakpobhe yo Tiyoplus. ⁴ Kpagle mu yo imaji l'unukuma neteni ogbo otu iyemu uzhikpo bhe yo kpai. ⁵ L'ugbemu nyeshimu Judiya uwhubhe Helod, uzhi nye udu uwhubhe Zakaliya buzeli eli eka ekpe emene Abija; Nwenyia udhini Elizabeti amu buzelo l'ekpemu Eloni. ⁶ Izhi l'nwenim ububhe nyeuma li ununu Ebilikpabi. Ukazebhe ize l'ugw uwe unye l'bhele bhele oloko mu Nyenweye. ⁷ Mubukpom bu unwebhe unwo iyedoni, Elizabeti kani-uko, madu ibom ubuwhobhe unukani l'ogeya. ⁸ Mu udhumo oge, Zakaliya uzhi l'ununu Ebilikpabi l'uzhi l'umeze ugbolo nye osoeja l'ibakpa ma ya. ⁹ L'ume l'ibakpamuomunala uko l'ewheka ulotu kpu nye osoeja emele ugbolo, umabhe ele l'ulotu olotuya kpagalemu unw ike l'ukpudhudho l'ime udho ukpeni l'umushi insensi echi. ¹⁰ Ogbo madegede mu uzhobhe ladhiya, unazhibhe l'asaga l'ukpekpele l'ekelemu udukpomabhe insensi. ¹¹ L'ekeleya akpu nye uzhi Nyenweye ulokeshileme mu unuzo lal'ikega adhimu insensi uzho l'olu-ikpe. ¹² Ekemu Zakaliya uwejila, mu uzho l'umekpeli, mu otogwu ukpudhola l'eli. ¹³ Buwhuto kpom, mu ny'uzhi kunela eto otogwu Zakaliya, iyedoni, ekpeleyo enwela usasa nweniyo Elizabeti omuniyo bu unwo ukoma, yo ewhu ewaya bu Joni. ¹⁴ Yo enwebu ekpema eto li upadhi apadhi atutumadu otukeshibhe yo bu ekpema l'umu omu nwoya. ¹⁵ Obobu nye ubu-ike l'ununu Ebilikpabi, ndeke onwuo menyye uke-ike mubune menye unoma, oyulukabhu l'uwa Egwele gontu kpom uzho l'ime uwuo ina. ¹⁶ Atutu emene ubuzelibhe l'egbegili Izleli oyosalenibhe bu Nyenweye Ebilikpabi. ¹⁷ Akadhezebu l'unwulum Nyenwye, l'uwa l'ugbakpo Ilaija, li ugbanwu unukuma emene bubhe idamunwo augawe umeledhe ugwe uyidhi eso, ugwe umajiye umeite l'ume mujikelebhe l'Nyenweye emenemu umukwanikpola. ¹⁸ Zakaliya ukani ny'uzhi Nyenweye, ndekpume mamajile iyemula? Me mobuwho unukani, ununweme akalimadhiwhule. ¹⁹ Mu ny'uzhi Nyenweye usala, me mobu nye uzhi Nyenweye mobu Gebleli nyemu unuzo l'ununu Ebilikpabi udushibhe me mabha kuniyo l'uyaweniyo uzhi umam. ²⁰ Nyetu, ndeke yo ekpodhodhe-ekpo tutu dhuma eyee ogbo ut iye mokuneyo, amu emezo l'ekeleya. ²¹ L'ekeleya, emenemu uzhobhe l'adhiya l'usekewhobhe Zakaliya, unwodha whobhe enye kpu utashiwhole ekele 'bu-ike l'ime udho ukpeniya. ²² Mubuwhuto kpom bu ekelemu ulowho uwe, ukpodhodhe ekpo l'ukunibhe uka, mu gewejiobhe bu ewejile iye uwodha enye kpom uzhi l'ime udho ukpeniya. Mu umashini whobhe bu l'eka l'ugwe ukpo ekpo. ²³ Mu dhuma ekelemu umekpobhe l'udho ukpeni mu ukazo udho. ²⁴ Ogbo otu eye uba-gabishikpo-who, akpu nwenyia Elizabeti uzhile l'olu, tutu dhumakpo Iwolu Isu, uwokebu eliya owoke. Mu uko, ²⁵ "Omubu iye Nyenweye umenime, enyiji leme l'ushikejime eka, kpagale mu namame iwene l'ununu umu madegede." ²⁶ L'me ekele Iwolu Isu, mu Ebilikpabi udusho nye uzhiya Gebleli, l'ula Galilii amu uwhobhe Nazalet. ²⁷ Udugashini unwo ugbede amu unwo ukoma uwhubhe Josepu uka buya tuo tu, aka 'majie ukoma, amu ulo l'egbegele udho Debid, ewa nwo unyomaya bu Meli. ²⁸ Mu ujakeshila, mu ukunila abhidhi uma yo nye uwhetu umanu ishi ubueke, Nyenweye uzhikeshiyo. ²⁹ Mu uniyimawho l'ugwe uwota iye iye, l'uli-ekpo ya mu uwodhawho enye uji utedhi abidhiya ubuwho? ³⁰ Mu nye-uzhiya ukunila, Meli, eto otogwu yo enwetale ushikeji eka Ebilikpabi. ³¹ Nyetu, yo ezhibu l'olu, emobu unwo ukoma ewhubu ewaya Jizos. ³² Obubu nye bu-eke bhaka owhudhi-whuebhe bu nwo nye olumu ukakpolibhe Nyenweye Ebilikpabi enabu agideze mu idakania Debid. ³³ Obobu nye echi udho mu Jekop l'ugwuwa l'unuwa, ndeke eleze ya ogulo ogulu. ³⁴ Mu meli ujo, "Nye-uzhi Nyenweye, "Ndekpu agale mu iyemu ubula, kpombukpom me makamajiemu ukoma?" ³⁵ Mu nye-uzhi Nyenweye usala, "Uwa Egwele ejakeshibu yo, l'ugbakpo nyemu ukakpolebhe eja augoni unazhi l'ime yo. Ugbakpo nyemu uzhe l'olu ukakpolibhe echikpudheyo. Akpu nyemu uzhe egwele omulebhema owhudhi whuebhe bu nwo Ebilikpabi. ³⁶ Nyetu, nwanayo Elizabeti ezhimadhiwhule l'olu nwo ukoma l'ukaliya, Iwolum ugbuweni-a bhisu, uwhubhe bhu bu nye ukani-uko. ³⁷ Iye iye unwenye Ebilikpabi akinyi l'umeme. ³⁸ Mu Meli uko, nyetu, me mobu unwo unyoma nwobouji Nyenweye, umezunimula kpomu izhikalom. Mu nye-uzhi Nyenweye usabhetele. ³⁹ pu Meli ubuzeli ikike l'ekeleya mu ukadho ekpukpu igbu mu uzho l'igbu, ula l'ime Judiya. ⁴⁰ Mu ukadho udho Zakaliya mu uteo Elizabeti abidhi. ⁴¹ L'ekelemu Elizabeti unujo abidhimu Meli utela, akpu nwomu uzhi-ola l'uwom umali l'upadhi apadhi mu ina Elizabeti, uyuluko l'igili uwa Egwele. ⁴² Mu lawe uli-olu l'uka, "Uwokwani uzhini yo l'adhi ebal'unyoma uzhibhe. Uwokwani uzhinidhiwhu ukpulushi uwomayo. ⁴³ Ndekpu 'mewhole mu ina Nyenweme ujakeshi-whome?" ⁴⁴ Nyetu ekelemu uli abhidhiyo udhumame ete yakpu unwomu uzhiome l'ime uwom umale l'unukuma eto." ⁴⁵ Uwokwani uzhini nyemu uwhedawe-o kpom, bu bhelebhele iyemu Nyenweye ukunila bu emezu kpobukpai. ⁴⁶ Mu Meli uko uwame, upadhiwe yo, Nyenweme. ⁴⁷ Uwa me utodhiwhu ekpema l'adhi Ebilikpabi Nyenweme uzhi. ⁴⁸ Iyedoni unyetu unazhi uya ele nwudha unyoma. Nyetu gontuwho l'umom kadheze bhele bhele uko ulole owhubheme bu uwokwani. ⁴⁹ Nyemu ubukalikpobhe emenileme eke iye, ewaya zhini egwele. ⁵⁰ Otu 'izhiya ugontu l'uko ga udu uko l'adhi emene utunabhe otogwu uzhibhe. Otugoshile ugbakpa l'eka ya. ⁵¹ Atashikpole emene ulawebhe okpelibhe olu l'ime echiche unukumabhe. ⁵² Anamali umeledhi eze l'agida ezebhe ogonule emene uyawebhe okpelibhe ele agbabuzelebhe olu. ⁵³ Eneitele emene enwelugu uwo l'atutu iyeuma. Ogonile emene eze echimalebhe ukadhebhe eka ewe. ⁵⁴ Eshikejile Izhleli nwobuoya eka, kpagale mu ugbeweji l'utugoshi otuwizhi. ⁵⁵ Zhikpom ukune emene idaye, Ebilaham l'emene ekpeya l'eluwa ebigebi. ⁵⁶ Meli unikeshi, Elizabeti bu, Iwolu bhito tutu mubayawho udhoya. ⁵⁷ Oge Elizabeti omu nwo oddhumale, umubu nwo ukoma. ⁵⁸ Mu umu nwan l'emene eka egbekaya unujibhe eke otuzhimu Nyenweye utugosho l'adhi uzhi mu upadhikeshibhe. ⁵⁹ Ekelemu udhumo eyee Isato mu zebhe l'ukpushi unwoya l'uwhudhiwhoa ewa ida, ⁶⁰ Mu ina ugbugbo ishi mu kunibhe bu bokpe bu owhabhe bu Joni. ⁶¹ Mu 'kunibhe, "Owune l'umu nwanaya uwhubhe ewa zhikpe, ⁶² Akpu umashinibhe ida iye l'eka, kpagale mu umajibhe ewa uwudhiga bhu ya whu unwoya. ⁶³ Mu ida ujo ajuju iye ubhawebhe iye, mu ubhasho ewaya bu Joni: Bhele bhele bhe uwodhabhe enye l'iye-ya. ⁶⁴ Ekeleneteni yabhukpu unu ya ukumali le mu idhoya uzho sasalala. Mu ubido ukpo ekpo l'upadhiwe Ebilikpabi. ⁶⁵ Otogwu utu bhele bhele emene ubebhe l'asagaya, bhele ugbasulu l'dhuma bhele bhele adhi l'igbumu uzhio l'agili ebhu Judiya. ⁶⁶ Bhele bhele emene mu unujibhe iyeya, usahikebhe l'unukuma mu ukadhiwhobhe, nwom obuwhubu olodu'ji madegede la? Eka Ebilikpabi uzhikeshama. ⁶⁷ Ida, Zakaliya uyuluka l'Uwa Egwele mu ubido ubu-u amuma mu ukadhiwho; ⁶⁸ Upadhiwe uzhini Nyenweye, Ebilikpabi, mu ele Izhleli, ejale l'ulowe ushishi eka l'umezudhiwhu ugbolo udokpewe umu madegede. ⁶⁹ Olowe nyenye ugawe uzuta ozuta l'ime udhomu Debid nwoboyi ya. ⁷⁰ Amu ukaloshi l'ununu emene amumaya uzhibhe egwele, l'ubhe gaga. ⁷¹ Ugawe buzeli l'eka emene usobheye oso. ⁷² Emene iyemu l'utugoshi otuwizhi l'adhi emene idaye uzhibhe. ⁷³ l'ugbeweji edio owo ya amu uzhi egwele. L'gbushi ukwatune idaye Ebilaham. ⁷⁴ Ukwatu bhushi l'uloweniye udhokpewe l'eka emene ubheni egbaye, akpenyani l'ugwe utu otogwu, ⁷⁵ L'uzhe egwele l'emeti l'ununuya bhele bhele eyee. ⁷⁶ Mewhelem yo unwo, owhubeyo bu nye amuma nyemu ukakpolibhe, yo izebu l'unwulu Nyenweye l'umeke ichakpa l'ume mu madegede ujikele nibhe uje-'jaya, ⁷⁷ L'uloweni umu madegede umaji iye kpani udokpewe, l'usabheteni iye bhiyobhe. ⁷⁸ Omu emebu l'ishili otuwizhimu Ebilikpabi, iyedoni ichimu obuzeli l'olu ejabu adhi ushikejiye eka. ⁷⁹ L'uyawe usamali l'adhi emene igeleni l'ukpudhu enwu unyi. Wmwbu iye l'usodhiga ukoye l'ichakpa uyodhu. ⁸⁰ L'umom, akpu nwoya uzhodhule l'ugbakpo uwa-uma, zhi bu l'eme Iwho tutu dhuma eyemu ulo asaga l'utugoshi eliya l'ele Izhleli.