¹ Umeledhe, yishini ida li ina yo eso, yabu iye udaadhu adaadhu. ² "Yaweni eli yo ele li unu ida li ina yo," (Yabu oloko unuzu unwe ogwu egba). ³ Kpemele mu umanuni yo, aibe jine budu uka li uwam. ⁴ Emene Ida, emeni iye umeledhe yo owudhubhe eke uma, kama kpaloshiweni bhe li umojike okpeli eka lijine uli-ekpo udu au Nyenweye. ⁵ Emene ulu, kpekenini idanwudho yo ete zhikpu okpeli ukale - nebheni uyi-eso unwe udhuu bhaka, li elekpa neten - ekpema uyulu li ishiuka. ⁶ Kpenibheni ete, ojimu ikpeneni Kalaasi ete. Kpeke ete yo obugbo li eke idanwudho yo uzhele li unyeshi yoni enyhe, l'ume iye utowebhe-obu. Kama, bunyi emene uyawe bhe okpeli bhe ele kpomu emene ulu Kalaasi, emene ume bhe echiche Ebilikpabi li eekpema neten. ⁷ Meni ugbolo li eekpema neten, zhikpomu nye umeni nyenweye ugbolo, uboo emene madegede. ⁸ Iyedoni ye amaji iye uma madegede umele, enweta bu uwhugwo l'eka Nyenweye, umashi bhubu nye -ulu, ubujine nye-ula. ⁹ Emene Idanwudho mekeni dhihuni ulu yo. Ekpadhishie bheni otogwu. Imaji bu nyemu ubo Idanwudho bhe mu ubudhiwho Idanwudho yo uzhibu li obioma uso onwunye mu ugushi jione ud'unwunye. ¹⁰ L'ugwulu ogwulu, kwalini akwali l'ime Nyenweye li eyi ugbakpo ya. ¹¹ Yetuni bhele bhele kapa-ulu au Ebilikpabi, kpemele mu inuzogideni echiche hbiyo Ekpesu. ¹² edoni, ulu ye uboo olu yele alushi okpeli li ubala, buto bu yele alushi bu emene-uchi-echi, emene ugbakpo ubueke, emene ugbakpo, emene igelenyi, uwukayi bhiyo uzhi li adhi ukike. ¹³ Kpomu ubokpeye yotuni awhulu kapa ulu Ebilikpabi kpemele mu inweni ike li unuzoke li eye umama, ibe mekpolo bhele bhele iyem, ainuzoke. ¹⁴ Nuzokeni uwadhi kpomu ubokpeye, yetuni edhi-okpu ishiuka li okpu yo; ainyashi yoni ogbodo-unukuma umeite. ¹⁵ Aiyojini okolo ujjikele ejikele amu ubuzolio li uzhiuma uyodhu. ¹⁶ Li zukpulu unashi mojike ugbolo-uwhetu lieka ainweike lu uwunyio bhele bhele achi munwuo echi amu ubuzolio li eka nye-uyem. ¹⁷ Aikpujiniokpulushi ugawe, aimojike opiya echi auwa, aubu uliekpo Ebilikpabi. ¹⁸ Li bhele bhele ekpele li edhio, dhio li zukpulu ekele l'ime uwa lishili om, nyeshi dhini enye li uzukpulu ekele, gbake li udhioni bhele bhele emene egwele EBilikpabi. ¹⁹ Dhiioni dhiwhu meni edhio, kpu emele mu nweta uzhi li ekele nwakumale unu. Dhioni meni edhio mu nweike lukaloshiwe ishiukam owolie owoli lime uzhiuma. ²⁰ Ubu li ishili uzhiuma mobo nyeunazhiseni amuzhio li iyabha, kpemele mu uzhikala uzhim li ugwe utu otogwu, aubu kpu udadhule bu meokpo. ²¹ Taakiku, nwana lime ugushi li unwoboyi unwe uwhetu lime Nyenweye, akani yoni bu bhele bhele iye, kpemele mu imajini kpumezhile l'ume. ²² Modugashilema l'ujakedhi yoni lishili echichem, kpemele mu imajini kpu iye ajashishike ekpema yo. ²³ Uyodhu uzhini umu-nwana, ugushi li uwhetu aubuzoli li eka Ebilikpabi, Idaye li Nyenweye Jisos Kalasi. ²⁴ Umadhu ishi uzhikedhi ogbo emene mu ugushiebhe Nyenweye Jisos Kalaasi li ugushi odhulo odhulo.