nbtt-ekp_1co_text

ISHIYÂ 1

¹ Pọlu, ạmu Kạlais Jị̇zos ụwhu gbo bụ nyeuzhiya lị ikem Ẹbilikpabi lị Sọsitenesi nwạny aukoma, ² ạkuko 'bhạni emene ukpeni Ida ạmu ụzho lị Kọlinti, emene umekwabhẹ emekwa l'ime Jịzos Kạlais, emenem' ụwhobhe l'ubedhiwẹ lị ebube egwele, lị bhẹlebhele ạdhi madegede ụwhubhe lị̇ ẹwam' Kạlaisi, ạmu'bọ nyenwe ye li bhẹ. ³ Umanu ishi li uyodhu ạmu ịdaye li nyenweye Jịzos Kạlais. ⁴ Mẹ mekelatu Ẹbilikpabi mẹka lị ị̇budu yọ ịyedoni bụ lị ụmanuishi Ẹbilikpabi ạmu Jịzos Kạlais une yọ. ⁵ Yạwe 'mewẹ yọ eze lị bhẹlebhele ibe, l'ime bhẹlebhele uli-ẹkpo, lịjine bhẹlebhe ụmaji'ye, ⁶ zhịkpom' ọdom' ụkaloshiwe ạ̵̵koloshiwem' Kạlais ụbu ish'uka l'ime ogbo yọ. ⁷ kpọmubokpeye ịye-iye 'bạsa l'unene ụwa egwele zhịkpom' ọdom' isejoni ujejam' nyenweye Jịzos Kạlais ọkoshi yọni ọkeyi. ⁸ Yạwe dhiwhu emeshi yọni bu ike tutu dhuma ụgwulu ọgwuluya, kpụ ạgale mụ ịgweni ụda ikpe l'eye ikpeya. ⁹ Ẹbilikpabi 'yuluka l'uwhuetu, nyemu ụwho yo l'ụbu emene ụzugbani ạmu Ạkpanā, Nyenweye Jiọzos Kạlais. ¹⁰ L'ụmom' mạja yọ, ụmu nwạname ạukoma, gonutu l'ẹwam' Nyenweye Jịzos Kạlais, meni bhẹlebhele yọ whedawẹni tạni, ukemata ekemata ẹzhe l'ime ogbo yọ. Mạja yọ mụ inweni ūgbedhi-egbedhi l'ēchiche nẹteni. ¹¹ Mạkabu emene Kilo umebhe mẹ l'ụwota kpọm bụ ukemata ekemata 'zhịwho l'ime ogbo yọ. ¹² Mạkadhabu kpọm: Nye-nyẹo 'bụla l'ime ogbo yọ 'kạbu, "Pọlu 'bụ amẹ," mọbu "Apolọsu 'bụ amẹ," mọbu "Pita 'bụ amẹ," mọbu "Kalaịsi 'bụ amẹ." ¹³ Kalaịsi uke mayaa ekema la? Pọlu 'nwuluseni yọ ẹnwu la? Ụwushibhe yọ mịni l'ime ẹwa Pọlu la? ¹⁴ Mẹ mekela Ẹbilikpabi meka makabụ Mẹ mọ'wushemu ōnwunye ōnwunye l'ime ogbo yọni mịni, gama kwa bụ Klịsiposu lị Gayọsu. ¹⁵ Ụbunekpom bụ kpu'mele mụ ịgweni ụkabu ụwumini yọ bụ l'ime ẹwa mẹ. ¹⁶ (Mẹ mọ wụshidhiwhu emene ụdho Sẹpanasi mịni. Ụgama whọle l'ȯtuya, Mẹ ma majẹdhem' lẹbu ụzhigba ụdo emene mọ wụshigba mịni.) ¹⁷ Makabụ Kalaịsi ụdugasheme l'ụwushiyoni mịni mụ'buwhuto bhụ bụ l'ụzhi ụzh'uma-ụbone l'ụnu ẹto, l'ụgwe ụdhugboma ịbala akụku obem' Kalaịsi. ¹⁸ Makabụ ụzhi ezhi ịye basalị ụtawe ẹli akụku l'ịshili Kalaịsi 'bụni emene ụtadhubhe ewe ịye ishi. Mụ'buwhuto bhụ 'bụjiwhone bụ ugbakpo Ẹbilikpabi l'ime ogbo emenem' ụnabatabhe ụdokpewem' Ẹbilikpabi. ¹⁹ Makabụ abhama lebhema abhama, "Mẹ matashikpo bụ ụmajiye mad'egede. Mẹ mọ'su nwamakpo bụ ụwota ọwota emene eke agwụgwu ịshi." ²⁰ ẹ adhị ny'umaji ịye ụzhi la? Ndẹ adhị nye eke akụko ụzhi la? Ndẹ adhị emene eke ikake ụwam' ụzhi la? Ẹbilikpabi umewẹ ụmaj'iye ụwam' mụbuwho ịye ịshi. ²¹ Kpọmu ọdom' ụbuwhuto kpọm bụ ụmaji ịye ụwam' bhụbo utuni Ẹbilikpabi otogwu, ụbu ụmashi Ẹbilikpabi l'ugonu uzhi ezhi ụbasa l'obe l'ụdokpewe emenem' uwhedawẹ dhẹbhele. ²² Iyedo, emene Jùù ukadhibhẹ bu uka iye-unwodhawẹ-enyẹ emene Giliki uwudhigajibhẹnẹ bu eyo. ²³ Mubuto, ye akaloshiwe bu Kalaisi mu ukpogbobhe-okpogbom, aubuni emene iwu-uda, mu bujone emene-ọbọbhe Jùù iye-ìshì. ²⁴ Mubuto, li emenem Ebilikpabi unwhuọ, bụbhẹ emene Jùù le emene Giliki, ye akalọshịwẹ Kalaisi kpom ugbakpo lị èyo Ebilikpabi. ²⁵ Iyedo, iyebu ìshì Ebilikpabi bu umajiye ka eyo madegede, yabu kpu iye bhala ûyâ Ebilikpabi unwele ugbakpo ka ugbakpo madegede. ²⁶ Ka nyekwani uwhowhuyo, emenenwana. Ubọō ọtụtụ yọ imajini èyọ uwam wo. Ubọō ọtụtụ yọ inweni ugbakpo wo. Ubọō ọtụtụ yọ ịloni li eke adhi wo. ²⁷ Butokpom, ubu umashi Ebilikpabi li ugonu iye-ìshì uwam li umeshiwe emene majibhe eyọ uwam inwene. Ebilikpabi ulotu iye udhụlụ l'ime uwam li umeshiwe ugbakpo iwene. ²⁸ Ebilikpabi ụlọtu iye-ya-ẹlẹ li iye-unyẹpẹbhe-ẹnyẹpẹ l'ime uwam. Ulotudhiwhu iye ụgwụtubhe kpom iye-abah li utashi ewe iye ugwutubhe bhu gbu ạyạ. ²⁹ Ume-om kpemele mu ọọnwunye nwunye ugwe utu ide adhi yawe zhi. ³⁰ L'ishili iyem Ebilikpabi umeya, l'umom yọ izhini l'ime Kalaisi Jizos, Nyemu ubune yeni eyo buzoli eka Ebilikpabi. Yạ we ubu umẹyite-ẹmeyite, uzhi-egwele li udokpewe yeni. ³¹ Gonutu li kpeye, zhikpom ubhabhe "Nye tule ide, utu l'ime Nyenweye."