¹ Vha na kwhu ighọli vha mhọli ọnwegbe shi isomhopfa Ayẹmhẹ, orhọgbe ingme ingmemhi ogbhagbha lasele. ² Rharhi ọni ọa zẹ ẹvholi ọda Ishinẹgba li ọ nu a ngme a khi iọgbọ. Rharhi khi a vha mẹ ọni ọ yẹsẹ emeni ọa ngme rharhi khi ẹtsẹkẹ Ayẹmhẹ ni e gbhagbha li ọa ngme. ³ Ama ọni ọa ngme ingmemhi ogbhagbha lasele, li ọ kpholo iọgbọ a shele, ọ rhi ẹgbhẹli a na wẹ, ọa zeze wẹ idu, ama ọni ọa zẹ ẹvholi ọda egbe ọli li ọa kpholo, ama ọni ọa ngme ingmemhi ogbhagbha lase, ọa kpholo uka shele abagwhoyọ. ⁴ Ọni ọ ke a zẹ ẹvholi ọda egbe ọli li ọ kpholo a shele, ama ọni ọa ngme ingme ogbhagbha lasele, ọ kpholo uka shele. ⁵ O gwhẹ mhẹ khi ọgbọ kwu ọa kee zẹ ẹvholi ọda. Ama o gwhẹ mhẹ nẹẹ khi vha kee ngme ingmemhi ogbhagbha lasele. rharhi ọni ọa ngme ingmemhi ogbhagbha lasele, li ọ fu dala ọni ọa zẹ ẹvholi ọda (sẹkẹnẹ khi rhẹmhi a mẹ ọni ọ dobẹ myie a ngme nali), khi uka o kẹ kyili oni a kpholo shele. ⁶ Ama nenaa, inyọgwho mhẹ ni ikpotso ali emọse, Mhi kha bhẹ bhuli vhẹ le khi mhi le lia zẹ ẹvholi ọda, see vha lia nwu elele vhọ? Imha mhuẹ dobẹ nwu elele vhọ, sẹkẹnẹ khi rhẹmhi rhọ te ikpa irhọkhasẹ, iyẹsẹ, ingme ingme ogbhagbha lasele, ali ewẹna nu vhẹ ngme. ⁷ O kha rhẹ kyili ofele ọa liyọ okphẹ ni o vhaa yẹmhẹ li o rhẹ lia ngme kyhiọkhọ kyhiọkhọ, see ọgbọ ọ lia yẹsẹ uwolo ni oa to? ⁸ A khaa kphele okphẹ khi a vhaa suọ uvhali ingmemhi ni ọa ngme, see ọgbọ ọ ke lia yẹsẹ ẹrhẹghẹ okwhẹ nwunegbe shi. ⁹ Iyọ li o li obodẹ vhẹ, u khaa ngme ingme khi ẹgbhẹ o vha la see ọgbọ lia yẹsẹ emeni u ngme? u le lia kee ngme ama khi ọgbọ ọa laa yẹsẹ emeni u waa ngme. ¹⁰ Ẹvhue e kha rhẹ gaa bu shi oni agbona, a vha gaa mẹ oni a vha yẹsẹ abhi o ngme. ¹¹ khi imha yẹsẹ abhi ẹvhue o ngme ọlele mhi kyia ni ọni ọa suọ oni ẹvhue, abagwhoyọ ọni ọa suọ oni ẹvhue ọ kyili ọlele na mhẹ. ¹² Iyọ li o li obodẹ vhẹ. Abhi o ke rhọ kyila khi waa nono khi Ayẹmhẹ Ishinẹgba o ke la vhẹ vhi egbe gbe ikanya, vha wẹẹ le le nyakwa ke kpholo ika kee shele. ¹³ Abagwhoyọ, ọni ọa zẹ ẹvholi ọda ọ wẹẹ nyakwa khi u ke myie ngme. ¹⁴ Rharhi mhi kha rhi ẹvholi ọda aa pfi olema, ayẹmhẹ mhẹ lọgwho li oa pfi olema eyọ, ama khi o vha rhi udu mhẹ a fu shiọ. ¹⁵ See mhi ke a li vhọ nena? Onochi mhi kha rhi ayẹmhẹ mhẹ a pfi olema mhi gwe rhi udu mhẹ a pfi abagwhoyọ, mhi kha rhi ayẹmhẹ mhẹ a chichi Ishinẹgba mhi gwe rhi udu mhẹ a chichi Ishinẹgba. ¹⁶ Odẹ ovhese, u kha mẹẹ a chichi Ishinẹgba elemhi ayẹmhẹ ighyiẹ ọgwho, see eni e la elase e ke lia myie “Itsẹ shi ẹẹ vhọ” o kha kyili ikphẹmhi waa kphẹmhi, khi ọ vha ke mẹẹ yẹsẹ emeni u waa ngme? ¹⁷ Rharhi khi u kha kphẹmhi onaghyie, onagyhie, khi o vha kpholo eni e kpọẹ shele. ¹⁸ Mhi kphẹmhi ni Ishinẹgba khi mhẹmhi zẹ ẹvholi ọda dala vhẹvhẹ kwu. ¹⁹ Ama elemhi uka rhẹmhia ngme nabhi ikpamhi ingme ishie na mhi yẹsẹ abhi e ngme khi mhi kẹ te vhọ rhi ẹgbhẹ ni iọgbọ, ochi na mhi rhọ ngme ẹvholi ọda agbẹlẹ egbhọ igbe asha igbe. ²⁰ Inyọgwho mhẹ ni ikpotso ali emọse, imhẹ vha gwe sa abhi ivhiẹ, Onochi kyili ọmọfẹ shi obodẹ ingmobe, ama obodẹ isamhi u kyili ọni ọ womhẹ. ²¹ aa akẹkẹ ọli shi ushi, “Te ikpa ẹvholi ọda ali unu elele lẹ mhi te laa nu eni iọgbọ ena ngme. mhi kha rhẹ liyọ ngme e vha la suọ mhẹ,’’ Ọnọmhọli li ọ ngme yọ. ²² Elemhiyọ, ishẹfẹ li ẹvholi ọda e kyila, ama a khi ni eni e myiesuọ, ama eni e vha myiesuọ. ingmemhi ogbhagbha ni o te obọ Ishinẹgba bhẹ ishẹfẹ li o kyila, ni eni e myiesuọ a khi eni e vha myiesuọ. ²³ Iyọ uka kwu o kha rhọ gba khi ọgbọ kwu ọa zẹ ẹvholi ọda, elele ali eni e vha myiesuọ khi e lo le, e vha laa li ẹẹ khi evhevhẹ lia rhue vhẹ? ²⁴ Ama o kyia khi vhẹvhẹ kwu vha ngme ingmemhi ogbhagbha khi ọlele ali ọni ọa myiesuọ ọ lo le, eni ingmemhi e khaa wẹẹ mẹ egbe wẹ mẹ. ọ yẹsẹ emeni ọ sọ ẹẹ shi emeni ọ ngme. ²⁵ Ogbhagbha ni o la vhi udu o kha gwhghyiea. O ke rhọ de tarugwhu gbega ni Ishinẹgba. Ọyọ o ke rha khasẹ khi Ishinẹgba ọ nu vhẹ la. ²⁶ Elọ vha kha ke li nenaa, inyọgwho mhẹ ni ikpotso ali emọse? Vha kha legba, khi a mẹ ọni ọ mhuẹ uwolo, owẹna, irhọkhasẹ, ẹvholi ọda, ọa liyọ ọmyiengme. Vha kee khyiẹlẹ ẹtsẹkẹ kwu ni ee kpholo uka shele. ²⁷ Ọgbọ khaa zẹ ẹvholi ọda, imhẹli ọ ngme dọsẹ ikpamhi ingme eva ọa liyọ esẹ, ọ ke pfiesọa nee. Ishọyọ ọmyiengme ọ ke myie ukhomhọgwho, gwho, gwho a ngme. ²⁸ Ama a vha ke mẹ ọmyiengme, ọgbọgbọ ọ pfiesuọa vhi elemhi oni uka. ọgbọ ọyọyọ, ọ ke lele nu egbe ọli ali Ishinẹgba ẹẹ ngme. ²⁹ Ebolẹ ava ọa liyọ asẹ ni ea ngme usomhi Ishinẹgba e ngme, eni e kpọẹ li e ke a sọ unu emeni e ngme. ³⁰ Ama ọni ọ shitọ ọ kha ke mhọli irhọkhasẹ elemhi ugamhi, ọni ọ kpọ ẹẹ ngme ọ ke pfiesọa nali. ³¹ Vhẹvhẹ kwu vha dobẹ a ngme ingmemhi ogbhagbha Ishinẹgba lasele, ama Ukwhumhọgwho, ọgwho, ọgwhọ ọ kee ngme khi o kẹ lo ọgbọ kwu esọ ishọyọ o rhọ zeze ọgbọgbọ udu. ³² Rharhi khi ayẹmhẹ ọbolẹ li o kpọkẹ ni oni ọbolẹ. ³³ Rharhi khi Ishinẹgba o vha kyili Ishinẹgba otughafu, ama Ishinẹgba ọpfọmhẹ. Vhi elemhi ika iọgbọ Ishinẹgba kwu. ³⁴ ikpotso e ke pfiesuọa vhi elemhi uka. Rharhi khi a vha rhi imasha na wẹ khi e rhọ ngme. Onochi, e chi egbe kpiale, abhi ushi o ngme. ³⁵ E kha mhọli emeni ea nono khi wẹwẹ e yẹsẹ, e ke mhila igwhẹ wẹ vhi apfẹ. Rharhi omama li o kyia khi ọkpotso ọ kee ngme vhi elemhi uka. ³⁶ Obọ vhẹ li ingmemhi Ishinẹgba o mẹẹ te bhẹ? Laa khi vhẹvhẹ ọgwho li oni ingmemhi Ishinẹgba o rhamhi egbe? ³⁷ A kha mẹ ọni ọ khi ọbolẹ lẹ kyila ọa liyọ rhẹmhi lẹ la ayẹmhẹ, e yẹsẹ khi emena mhi kẹkẹ ghyi vhẹ ishi Ishinẹgba li e kyila. ³⁸ Ama a k ha mẹ ọni ọ rhi ẹloe gbe ona, a li laa rhi ẹloe gbe ọli abagwhoyọ. ³⁹ Iyọ, inyọgwho mhe ni ikposto ali eni emọse, vha nyakwa khi vha kee ngme ingme ogbhagbha lasele, imhẹ vha nwu ọgbọ ni ọa zẹ ẹvholi ọda gba. ⁴⁰ Ama vha kwu egbea vha de ẹgbhẹ le a khyiẹlẹ ẹtsẹkẹ kwu.