¹ I'a ni eimami sa cabe bula, eimami sa qai ila sa yaca ni yanuyanu ana o Melita. ² Edra sa lomani eimami valevu o odra ai tauei; ni dra sa vareania ai binibini bu'a, edra sa di eimami yadua i vale, i na vu'u ni uca sa qai ta, ei na liliwa. ³ Ia ni sa cava mai e dua ai vaubua o Paula, qa sa lai tuvaria ina bu'a sa re'a tu, sa dolo mai a ataata e dua a gata, qa vivicia a ligana. ⁴ Ia ni dra sa unea o odra ai tauei, ni sa lili ina ligana a gata, edra sa veiaiyainia vai odra, E dina sa tamata daulaba ai, ia ni sa abe bula mai na waitui, sa maqa ni biti oya o Sauma me bula. ⁵ E sa qai ureitainia a gata i na bua waqa o oya, qa sa maqa ni ca ina. ⁶ Ia edra sa nanumia ena vuce mai o oya, se oba sobu vasauri qa ciba: ia ni dra sa warainia vadede, qa maqa ni unea e dua a a ca sa yaco ve'ea, sa qai vui a lomadra qa dra aya sa dua a Alou o oya. ⁷ I'a ni sa notu ina yasana ana eso a ti'i ni vanua sa ona a Turaga ni yanuyanu, o Pupiliu a yocana; qa sa vacegui eitou o oya, qa vaani eitou vare qa bogi tolu. ⁸ I'a sa tauvi mate a tama i pupiliu, qa sa ataata qa vea cai dra; qa sa curu va'ea o Paula, qa masu qa sa tabaia ina ligana, qa vabula. ⁹ Ia ni sa ca'a ai, sa la'o mai o odra leqa edra sa tauvi - mate ina yanuyanu, e dra sa vabulai. ¹⁰ e sa levu a a edra sa varooroota i eitou ina: ia ni eitou sa so'o tani, edra sa dia i waqa a vila e yoga vei eitou. ¹¹ Sa oti e tolu a vula, eimami sa so'o ina dua a waqa ni Alexsadria, qa ele ina yanuyanu ana ina vula lilivoa, e ena matakau a drua tagane. ¹² E eimami sa sobu i Sairakuse, qa notu ina qa bogi tolu. ¹³ Ia eimami sa la'o tani ei, qa veicavuyai, qa yaco i rivio; ia sa bogi dua sa qai liwa a cova, qa eimami sa yaco ina roaroa Putioli: ¹⁴ Ni eitou sa unea ina a viweani eso, e dra sa masuti eitou me eitou sa qai lao i Roma. ¹⁵ E dra sarogoca mai ina a eitou i tuutuu o odra a viwiani, a sa lao mai ina rara i Apio ei Na /bure e Tolu, me dra mai tavai eitou: la ni sa une odra o Paula, sa vavinavinaa veea a Alou, e sa taudei mai. ¹⁶ Ia ni eimami sa curu i roma sa biu o Paula me notu duadua ga ei na dua a sotia sa vatawani oya. ¹⁷ Ia sa bogi tolu, sa qai vasoqoni odra vata a odra turaga a Jiu o oya: ia ni ra sa soqoni vata mai, sa aya o oya ve edra, oi emudou a viweani, au sa maqa ni a'ava e dua a a ca ve edra a ai noda, se i na odrai valavala a oda qase, ia au a vesui ga qa soli waqe ina ligadra a ai Roma mai Jerusalemi. ¹⁸ Ia o odra, ni dra sa lewai au, edra sa gutia me dra serei au, ni sa maqa a a vei au me'u mate ina. ¹⁹ Ia ni dra sa aya o odra a Jiu me ua, sa uqeti au a lomaqu me'u cavuti sisa me lewai au; e maqa ni dua a a me'u beitai odra ina a ai noqu. ²⁰ O oya ai au sa vasoqoni emudou vata ina, mo dou igavi au qa vosa qa vosa ina vei au ni'u sa vesu ina sinucodo ai ina vu'u ni odrai nuinui a Isireli. ²¹ E dra sa aya ve'aa, sa maqa e dua mai Jutia sa volai io vei eitou e maqa leqa ga e dua ve edra a viweani sa lao mai sa vataila se aya e dua a a ca ina vuumu: ²² Ia eitou sa mata rogoci io se cava o sa nanumai ni eitou sa ila sa vosavacacatai a lotu tani ai ina vivanua tauco'o ga. ²³ E dra sa louca ve'ea e dua a siga, e dra lewe levu sa la'o mai ina ona vale; e sa serea ve edra o oya qa aya a atanitu ni Alou, qa vadinadinatai Jisu ve odra mai na vunau i Mosese, ei odra a parofita, sa vateivu ina roaroa, qa yacovia a taranavi. ²⁴ Ia sa vadinatia o odra e so a vila sa vosatai, qa so sa maqa ni vadinata. ²⁵ Ia ni dra sa maqa ni lomavata vai odra, edra sa la'o tani, ni sa vasatainia oti o Paula e dua a vosa: Sa vosa dina a Yalo Tabu ni sa aya o Aisea a parofita ve odra a omudou qase, ²⁶ qa aya, La'p ve edra a tamata ai, qa aya, dou na daurogoca noga, qa lecava tu; Ia dou na dauunea noga qa maqa ni unea. ²⁷ Ni sa uro mai a lomadra a tamata ai , E sa didivara a daligadra, E sa bobo a matadra de dua a siga ena iga a matadra, qa rogo a daligadra, qa ila a lomadra, E dra saumai mai, I'a au na vabulai odra. ²⁸ O oya ai mo dou qai ila, ni sa au a bula mai ve ea a Alou vei odra a veimatanitu tani; ia edra na Varoqoca. ²⁹ I'a ni sa vosatainia oti o oya a vi'a ai, edra sa la'o tani o odra a Jiu, e dra sa veileti valevu vai odra. ³⁰ E sa notu o Paula qa yabai rua tauco'o ina vale sa volia no o oya, qa sa vacegui odra tauco'o ga edra sa la'o ve ea. ³¹ Qa sa vunautainia a matanitu ni Alou, qa sa vatavuvuliainia vadoudou sara a a ei Jisu Karisito a Turaga, qa sa maqa a tamata sa tarova.