¹ E na oqu volavola vei Ceopilio, au varaitainia ina a vei a tauco'o a vatavuvuli tainia o Jisu ei na vei a tauco'o e vele'e. ² Me yacova a gauna sa di cae leqa waqe ina, ni  varoti oti mai vei oya a Yalo tabu ai varo vei edra ai Apositolo ma sa digitai edru oti. ³ Ni oti a a vararawa tai, sa qai varaitaini oya ni sa bula leqa mai na mate, qa varaitainia e vuqa sara ai vatailaila me vasagavulu a siga qa varaitainia a vei a ni matanitu ni Alou. ⁴ Ni dra sa bose vata, sa qai varoti edra me dra ua ni biti Jerusalemi, ia me dra warainia ga a vei a e mai yalatainia vei edra a turaga o "Oya dou a rogocia mai vei au". ⁵ Ni o Joni oya dau vei papitaisotai dina ena wai, ia dau qai papitaiso tai ena Yalo tabu ena dua gauna lealea ga mai ai." ⁶ Ni dra sa vasaqoni vata mai "Era sa qai tarogi oya. "Turaga! I ai bea a gauna o au na varautala leqa ina a Matanitu e Isireli?" ⁷ Sa qai aya vei odra "E maqa ni yaga vei emudou mo dou ila a gauna se ena yabai, ena lewa duadua ga o oya. ⁸ Da na qai rawatia a Kaukauwa ni da sa va sinaiti na Yalo tabu, dou na qai oqu va dinadina i Jerusalemi, Jutia ei Samaria me yacova vataotioti e vuravura." ⁹ "Ni sa qai vosa oti vei edru a gone turaga o Jisu, edru sa qai iga ca'e qa dru une ni sa laveti ca'e o oya ia sa qai vunitai oya no a o me dru ua ni unei oya. ¹⁰ Ena gauna ga edru se va unei oya no ina, vasauri ga sa rua leqa a tagane edru no tu mai na edru maliwa qa dru vaisulu vulavula, "E dru sa qai taro. ¹¹ O mudou a ai Kalili A cava omudou sa vaune ina a lomalagi? O oya ga Jisu ma di cae mai vei emudou i lomalagi, ena lesu leqa mai me tautauvata ga a ona di cae tani mai vei emudou qa lai lomalagi.'' ¹² E dru sa qai lesu leqa i Jerusalemi i na ulunivanua ni veiolive, o oya e volea toa ga i Jerusalemi me tautauvata a ena yawa ina agauna edra dau lai so Alou ina. ¹³ Ni dra sa yaco waqe, e ra sa qai lao sara ina taba vale i cae, ena vanua edra dau no tu ga ina. I ai o odru o Pita, Joni, Jemesa, Adriu, Filipi, Tomasi, Pacolomiu, Maciu, Jemesa a luvei Alifio, Simone o vatoai e dua vei odra a "gumatua" ei Jutasa a luvei Jemesa. ¹⁴ O odra ai e dra dau lomavata me dra dua ga ena dau masu ei odru a marama o Meri a tinai Jisu ei odru a tacina. ¹⁵ Ena veisiga edra veivosai no ina, sa qai tuca'e o Pita qa vosa vei odra a weana e volea ni duadrau ruasaga vulu a tamata. ¹⁶ "Emudou a veiweani e dodonu me  vayacori a ti'i ni vola tabu ai, ni yalo tabu a vosa na gusu i Tevita ena vu'ui Jutasa o oya ma liumuri tai Jisu. ¹⁷ O oya ma tautauvata ga ei edatou, qa lai ciqomia, leqa a odra i votavota ina i lesilesi ni ona i soqosoqo. ¹⁸ Ia a tamata ai sa qai volia e dua ti'i ni vanua ena i lavo e rawatia mai na onai valavala ca, sa qai lutu sobu va do'oulu, sa qai ca'u veravera a Yagona sa qai acabote mai tuba a ona wawa. ¹⁹ Sa dra qai rogo tauco'o ga o odra mai Jerusalemi sa dra qai vatoa no me yaca ni ti'i ni sosomo ana "Akelitama o oya a vanua ni dra." ²⁰ Ni sa volai enai vola ni same "Me yaco mada me lala a ti'i ni somo ai, me ua leqa ga a tamata me bula ina " Me biu me dua leqa me tauria onai tutu ni veiliutai.' ²¹ O oya ai sa dodonu ina me dua mada a tamata sa dau notu vata ei eda ena gauna tauco'o ga e notu ina vei oya a gone turaga o Jisu. ²² Me a teivu mai na gauna e Papitaiso ina O Joni, me, yacova siga sa di cae waqe ina vei eda, o oya me vadinadina vata ei eda na ona tucae leqa mai na mate. ²³ Sa dra qai lesia e rua turaga O Josefa e vatoai o Parisaqa ei Jusitu ei Mataiasa. ²⁴ Edra sa qai masu qa dra aya "O miau a Alou omiau ila a Yalo ni tamata ia mo miau varaitainia  vei odru ai omu au digitainia. ²⁵ Me dru i talatala ni soqosoqo lotu me dru sosomi tainia ai dabedabe oi Jutasa." ²⁶ Edra sa qai va wirimadigi, sa qai gole vei Mataiasa, sa qai Wili o oya vei odru a lewe tiniadua ai Apositolo.