¹ Mukurundapo Erihu akonkenyepo ukusosa ati, ² "Muretontonkanya iki muringanya nga mwasosa ati, 'Insambu shandi kuri Resa'? ³ Pantu mwipusha ati, 'Mirimo nshi kuri nebo?' kabiri, 'Bushe kuri narungikwa nga naribebwike?' ⁴ Ndemyasuka, bonse webo na banobe. ⁵ Roresheni ku muru, no kuubona; boneni umuru, uuri apati na mwebo. ⁶ Nga mwaribembuka, bubi mukita kuri Resa? Imembu shenu nga shariturama umupiri, finshi mukita kuri ye? ⁷ Nga muri barungami, finshi mwingapera kuri ye? Finshi e ngapokerera ukufuma muminwi yenu? ⁸ Ububi bwenu kuti bwakyena umuntu, e p uri muntu, no burungami kuti bwanonsha umwana mwaume wa muntu naumbi. ⁹ Pa murandu wa mikire yenu iingi iyamutitikisha, abantu bararira; baririra ubwafwirisho ukufuma ku baume ba maka. ¹⁰ Rero takuba nangu umo usosa ati, 'Bushe Resa arikwisa Karenga wangi, uupera inyimbo mu bushiku, ¹¹ uutufunda ukukira ifyo afunda inama sha mpanga isha mukyaro, kabiri uuturenga abamano ukukira ifyoni fya murwerere?' ¹² Kurya bararira, rero Resa tabapera bwasuko pa murandu wa kirumba kya bantu ababembu. ¹³ Resa takomfwepo ukurira kwa kipuka; Uwa maka yonse takapepeke kuri ikyo. ¹⁴ Akasuka shani panono nga mwasosa ati tamumubona, ukweba ati umurandu wenu uri ku ntanshi yakwe, kabiri ukweba muremurora? ¹⁵ Nomba musosa ati ikipyu kyakwe takikanda, kabiri teshiba nangu panono ubupondamishi. ¹⁶ Kanshi Yobo e sura akanwa kakwefye mukura bupuka bupuka; afusha amashiwi ukwabura ukwishiba."