¹ Eikyo nomba, Yobo, nakupapata, umfwa ku kuranda kwangi; kutika ku mashiwi yangi yonse. ² Bona nomba, nakisura akanwa kangi; ururimi rwandi rwakiranda mukanwa kangi. ³ Amashiwi yangi yafuma mubororoke bwa mutima wangi; imiromo yangi iranda ubwishibiro ubwapwiririka. ⁴ Umupashi wakwa Resa wakinenga; umupu wa Wa maka yonse warimpera umweo. ⁵ Nga kuti, ngasuka; koronganika amashiwi yobe kuri nebo no kutarama. ⁶ Bona, ndi ngefo uri mu menso yakwa Resa; na nebo napangirwe ukufuma kwi roba. ⁷ Bona, ikintinya kyandi takyakakurenge ukutina; takwakabe nangura kutitikisha kwafina pari webo. ⁸ Wakiranda bwino mukumfwa kwangi; nakyumfwa ne kiunda kya mashiwi yobe kiresosa ati, ⁹ 'Ndi uwarungama kabiri uwabura akarema; ndi wakaere, kabiri tamuri urubembu muri nebo. ¹⁰ Bona, Resa asanga ishuko ku kuntasha. ambona ngo murwani wakwe. ¹¹ Abika amakasa yangi mu mutiro; abona inshira shandi shonse.' ¹² Bona, muri iki naurungika-narakwasuka, pantu Resa mukuru ukukira umuntu. ¹³ Ninshi urendwishisha? Taruburura pari fyonse akita. ¹⁴ Pantu Resa aranda umuku umo- ee, imiku ibiri, nangura umuntu teshiba ikyo. ¹⁵ Mukiroto, mukimonwa kya bushiku, iryo uturo utukuru twapona pa bantu, muturo pa busanshi- ¹⁶ eryo Resa esura amatwi ya bantu, no kubatinya ne fipumo, ¹⁷ mukufumya umuntu ukufuma ku mukitire ya rubembu, no kufumya ikirumba muri ye. ¹⁸ Resa asunga umweo wa muntu ukufuma mukirindi, umweo wakwe ukufuma mukwabukira ku mfwa. ¹⁹ Umuntu arakandwa kabiri no bukari pa busanshi bwakwe, no kukaripwa kwakutwaririra mu mafupa yakwe, ²⁰ pakweba ati umweo wakwe upate ifyakurya, no mweo wakwe wapata ubukose. ²¹ Umubiri wakwe nauriwa pakweba ati tawingaboneka; amafupa yakwe, inshita imo tayaboneke, nomba nayafuma. ²² Mukine, umweo wakwe nauparama ku kirindi, umweo wakwe kuri abo arefwaya ukonaura. ²³ Rero nga kuti kwaba maraika uwingaba nduburwira wakwe, umo ukufuma pe kana, ku kweba umuntu ikiri ikyarungama kuri ye, ²⁴ ukuba ne nkumbu kuri ye kusosa ati, 'Pususha uyu muntu ukufuma mukuya ku kirindi; ninsanga ubwafwo kuri ye. ²⁵ Eryo umubiri wakwe ukaba ngo wamwaikye, naubwekeshiwa ku nshiku sha kubwaikye. ²⁶ Akaromba kuri Resa na Resa akamubera inkumbu, pakweba ati abone ikinso kya kwa Resa ne nsansa. Resa akapera umuntu ukukimfya kwakwe. ²⁷ Eryo umuntu akemba ku ntanshi ya bantu bambi no kusosa ati, 'Naribembwike no kurufyanya ikyo ikyari ikyarungama, rero urubembu rwangi tarwakandirwe. ²⁸ Resa napususha umweo wangi ukufuma mukuya mukirindi; umweo wangi ukakonkanyapofye ukubona urubuto.' ²⁹ Bona, Resa akita ifi fyonse no muntu, imiku ibiri, ee, ne miku itatu, ³⁰ ku kureta umweo wakwe ukufuma ku krindi, pakweba ati akyankwe no rubuto rwa mweo. ³¹ Tesha, Yobo, no kukutika kuri nebo; ba tondoro na nebo nararanda. ³² Nga naukwata ifyakusosa, ngasuka; randa, pantu ndefwaya ukuninkisha ukuti uri muburungami. ³³ Nga teifyo, kanshi kutika kuri nebo; ikara tondoro, narakufunda amano."