¹ Kyaishire kuba pa nshita iryo Yuda aishire kusha ba wabo no kwikara na umo umwina Aduramu, ishina ryakwe ryari ni Hira. ² Aishire kukumanya kurya umwana mwanakashi wa mwaume umwina Kenani uyo ishina ryakwe ryari ni Shua. Aishire kumusenda no kumupa. ³ Aishie kwimita no kukwata umwana umwaume. Arimwitire ishina ryakwe Ere. ⁴ Nakabiri aishire kwimita no kukwata umwana umwaume. Arimwitire ishina ryakwe Onani. ⁵ Nakabiri arikwete umwana mwaume no kumwita Shera. Ku Kasibu eko amufyarire. ⁶ Yuda aishire kusangira umukashi wakwa Ere, Iberi lyakwe. Ishina rya mwanakashi ryari ni Tama. ⁷ Ere, iberi ryakwa Yuda, ari uwakubifya pa kinso kyakwa Yahweh. Yahweh aishire ku mwipaya. ⁸ Yuda aishire kuranda kuri Onani ati, ''Kabiye kwingira kumukashi wakwa wenu. Bomba umurimo wabumuramu kuri ye, no kufyarira wenu umwana.'' ⁹ Onani aishire kwishiba ukuti takabe mwana wakwe. Uro ronse arara na muka mukashi wakwa wabo, arikwitira panshi ikyo ena tarikufwaya ukufyarira wabo umwana. ¹⁰ Ikyo akitire kyaribipire mu menso yakwa Yahweh. Yahweh aishire ku mwipaya na ye. ¹¹ Ero Yuda aishire kuranda kuri Tama umupongoshi wakwe ati, ''Ikara mukumfwirwa mu ng'anda yaba wiso mpakafye Shera, umwana mwaume wandi, akakure.'' Pantu ena ari no mwenso, ''Nao rimbi kuti afwa, ngefyo ba wabo bafwire.'' Tama arire no kuya kwikara mu ng'anda yakwa wishi. ¹² Panuma ya nshita ntari umwana mwanakashi wakwa Shua, umukashi wakwa Yuda arifwire. Yuda ari tararirwe no kuya kurekubeya impanga shakwe amasako pa Timuna, ena na kibusa wakwe Hira umwina Aduramu. ¹³ Tama aryeberwe ati, ''Bona, wisofyala areya ku Timuna mukubeya impanga shakwe amasako.'' ¹⁴ Tama aishire kufura ififwaro fyabumukamfwirwa bwakwe no kuifimba umwine ne kitambara no kuipomba umwine. Aishire kwikara pa mwinshi wa Enaimu, apabera umusebo wa kurora ku Timuna. Pantu abwene ukuti Shera arikura nomba tabamupera kuri ye ngo mukashi. ¹⁵ Uro Yuda aishire kumubona atontonkenye ukuti ni kirende pa murandu ariifimbire ikinso kyakwe. ¹⁶ Aishire kuya kuri ye ku musebo no kuranda ati, ''Isa napapata na turare nobe''-pantu taishibire ukuti mupongoshi wakwe-ero aishire kuranda ati, ''Nindo warampera webo pakuti urare na nebo?'' ¹⁷ Yuda aishire kuranda ati, ''Nkakutumina akana ka mbushi ukufuma pa mukuni,'' Aishire kuranda ati, ''Bushe warampera ikikatiro mpakafye ukatume ikyo?'' Yuda aishire kuranda ati, ¹⁸ ''Nindo narakupera nge kikatiro?'' Tama aishire kwasuka ati, ''Ikikatiro kyobe mwando obe, ne nkonto iyo iri mu minwi yobe.'' Yuda aishire kufipera ero aishire kurara nankwe, ero aishire kwimita kuri ye. ¹⁹ Tama aishire kwima no kuya. Tama aishire kufura ikitambara ero afwere ifyakufwara fyakwe ifyabukamfwirwa. ²⁰ Yuda aishire kutuma akana ka Mbunshi ku munankwe umwina Aduramu no kumweba ukuti upoke ikikatiro ukufuma mu minwi ya mwanakashi, nomba tamusangire umwanakashi. ²¹ Ero umwina Aduramu aipwishe abantu baku nkende irya ati, ''Arikwi urya kirende wamu nshira uwari mu mbari ya musebo wa Enaimu?'' Baishire kuranda ati, ''Takwabapo kirende wa munshira kuno.'' ²² Aishire kubwereramo kuri Yuda no kuranda ati, ''Nebo ntamusangire umwanakashi. Nabo, abantu bakurya bakiranda ati, 'Takwabapo kirende wa munshira kuno.''' ²³ Yuda aishire kuranda ati, ''Mureke umwanakashi asunge firya fintu, ukuti twisebana. Ikine kine, nebo nari tumine akana ka mbushi, nomba tawamusangire umwanakashi.'' ²⁴ Kyaishire kuba pa numa ya myenshi itatu uro kyaeberwe kuri Yuda ati, ''Tama umupongoshi obe arikita ubukende, na kine kinefye, arimita ifumo rya mu bukende.'' Yuda aishire kuranda ati, ''Mureteni kuno ena no kumureka okewe.'' ²⁵ Uruntu baishire kumureta panse, Tama aishire kutuma kuri wishifyara amashiwi ati, ''Ku mwine waifi fintu eko nebo naimita.'' Tama aishire kuranda ati, ''Napapata nga kuti mwamwishiba umwine waifi fintu, ikikakatikiro no mwando ne nkonto.'' ²⁶ Yuda arifishibire no kuranda ati, ''Tama ari umororoke ukutira nebo, ikyo nebo ntamupera ngo mukashi kuri Shera, umwana wandi umwaume.'' Ena tabwekeshepo ukurara na Tama. ²⁷ Kyaishire kuba pa nshita yakwe iya kupaapa ukuti, boneni, ba mpundu ebari mwifumo ryakwe. ²⁸ kyaishire kuba uro arikupaapa umo aisa kufunya ukubuko, ero na kibusa arishire kubura urushishi no kurukaka kukuboko kwakwe no kuranda ati, ''Uyu ewakibarilrpo ukufuma.'' ²⁹ Nomba ero abwekeshemo ukuboko kwakwe, ero boneni, uyo wabo ewabarirepo ukufuma. Nakimbusa aishire kuranda ati, ''Ngefyo waipatikisha pakufuma!'' Eikyo amwinikire ishina rya Perez. ³⁰ Ero wabo afumine, uyo akakirwe urushishi ku kuboko kwakwe, ero amwinikire ishina rya Zera.