¹ Uro Isaki akotere ero na menso yakwe yaripofwire ikyakuti arekere nokubona, aishire kwita Esau, umwana mwaume wakwe umukuru, ero nokuranda kuri ye ati, ''We mwana wandi umwaume.'' Esau aishire kuranda kuri ye ati, ''Ndi pano,'' ² ero Isaki aishire kuranda ati, ''Bona kuno, ndikototere. Nteshibire ubushiku bwa mfwa yandi. ³ Eikyo senda ifyanso fyobe, Umusumbo ero ne nkwera, ero uye mu mpanga undungireko inama ya mpanga. ⁴ Umpangire ifyakurya fyawamisha, firya ifyo natemwisha, ero nokureta kuri nebo pakweba ati ningarya ero nkupare iryo natarafwa.'' ⁵ Nomba Rabeka aryumfwire uro Isaki arikuranda kuri Esau umwana mwaume wakwe. Esau aishire kuya mu mpanga mukurunga inama ero nokuyireta. ⁶ Rabeka aishire kuranda kuri Yakobo umwana mwaume wakwe ero nokuranda ati, ''Bona kuno, nakyumfwa ba wiso bakoranda kuri Esau ndume yobe. Barandire ati, ⁷ 'Ndetera inama ya mpanga ero nokumpangira ifya kurya ifisuma pakweba ati ningarya ero nokukupara ku kinso kyakwa Yahweh ero ntarafwa.' ⁸ Nomba eikyo, we mwana wandi umwaume, nakira ishiwi ryandi ilyo nkoku konkomesha. ⁹ Kabiye kumukuni, ero undetere utwana twa mbushi tubuiri utusuma; ero narapanga ifyakurya ifisuma ukufuma mulr shena ifya ba wiso, ngefyo fye ba temwa. ¹⁰ Waratwara kuri ba wiso, pakweba ati bena barya, pakweba ati benga kupara iryo tabarafwa.'' ¹¹ Yakobo aishire kuranda kuri Rabeka nyina wakwe ati, ''Bona, Esau ndume yandi muntu wa mishishi, ero nebo ndi muntu wakuterera. ¹² Rimbi batata bakonjikata, ero nkoboneka kuri ye nga uwabufi. Nkoreta itipu pari ne mwine teparo iyoo.'' ¹³ Nyina aishire kuranda kuri ye ati, ''We mwana mwaume wandi, reka itiipu ryonse riponene pari nebo. Umfwirafye ishiwi ryandi, ero nokuya, kafirete kuri nebo.'' ¹⁴ Eikyo Yakobo aishire kuya no kusenda utwana twa mbushi ero nokutureta kuri nyina, ero na nyina aishire kupanga ifyakurya fyabune, ngefyo fye wishi atemenwe. ¹⁵ Rabeka aishire kusenda ifyakufwara fyabune ifyakwa Esau, umwana mwaume wakwe umukulr, ifyo ifyari na ye mu ng'anda, nokufwika Yakobo, umwana mwaume wakwe umuwaike. ¹⁶ Aishire kubika no mukupo wa twana twa mbushi ku maboko yakwe ero na nkende yakumukoshi iya kuterera. ¹⁷ Aishire kubika ifya kurya fyabune ero nomukate ifyo apakenye mu maboko ya mwana mwaume wakwe Yakobo. ¹⁸ Yakobo aishire kuya kuri wishi ero nokuranda ati, ''Tata.'' Wishi aishire kuranda ati, ''Ndipano; niwe nani, we mwana wandi?'' ¹⁹ Yakobo aishire kuranda kuri wishi ati, ''Ni nebo Esau iberi ryenu. Ndikitire nefyo mwakiranda kuri nebo. Nomba imeni ero nokurya ifyakurya fimo panama ya mpanga yandi, pakweba ati mu mpare.'' ²⁰ Isaki aishire kuranda ku mwana mwaume wakwe, ''kyaba shani ukuti apapene mukwangufyanya waisanga, we mwana mwaume wandi? Aishire kuranda ati, ''Pantu Yahweh Resa wenu akiireta kuri nebo.'' ²¹ Isaki aishire kuranda kuri Yakobo ati, ''Isa mupepi kuri nebo, pakweba ati nkwikate, we mwana mwaume wandi, ero njishibe nga ni webo umwana mwaume wandi uwakishinka Esau nangura tewebo.'' ²² Yakobo aishire kuparamina kuri Isaki wishi; ero Isaki aishire ku mwikata ero nokuranda ati, ''Ishiwi rishiwi ryakwa Yakobo, rero amaboko maboko yakwa Esau.'' ²³ Isaki tamwishibire, pantu amaboko yakwe yari aya mishishi, nga maboko yandume yakwe Esau, eikyo Isaki aishire kumupara. ²⁴ Aishire kuranda ati, ''Bushe niwefye mukishinka umwana mwaume wandi Esau?'' Aishire kwasuka ati, ''Ni nebo wine.'' ²⁵ Isaki aishire kuranda ati, ''Reta ifyakurya kuri nebo, ero nararya inama ya mpanga yobe, pakweba ati nkupare.'' Yakobo aishire kureta ifyakurya kuri ye. Isaki aririre, ero Yakobo aishire kumuretera umwangashi ero aishire kunwa. ²⁶ Ero wishi Isaki aishire kuranda kuri ye ati, ''Isa mupepi nomba ero nokuntomona, we mwana mwaume wandi.'' ²⁷ Yakobo aishire kwisa mupepi ero nokumutomona, ero anunshishe ikyena kya fyakufwara fyakwe ero nokumupara. Aishire kuranda ati, ''Bona, ikyena kya mwana mwaume wandi kiri kwati kyena kya mpanga iyo Yahweh aparire. ²⁸ Resa nakupere inkyende ya mume wa kumuru, inkyende yakurisha pa kyaro, ero iya fisabo ifingi ero nomwangashi uupya. ²⁹ Abantu na bakubombere ero ne nko ukufukama kuri webo. Ba umukuru pari ba munyina bobe, ero abana baume bari banoko bakufukamine. Reka onse uukakutipa akatipwe; na onse uukakuparwa akaparwe.'' ³⁰ Iryofye Isaki apwishishe ukupara Yakobo, ero Yakobo aishire kufuma kukinso kyakwa wishi Isaki, Esau ndume yakwe asihire kwisa ukufuma mukurunga kwakwe. ³¹ Nao wine aishire kupanga ifyakurya ifisuma ero nokwisa kufireta kuri wishi. Aishire kuranda kuri wishi ati, ''Ima ero rya ifyakulya fyana ya mpanga iya mwana mwaume obe, pakweba ati winga mpara.'' ³² Isaki wishi aishire kuranda kuri ye ati, ''Ni webo nani?'' Aishire kuranda ati, Ni nebo umwana mwaume obe, iberi ryobe Esau.'' ³³ Isaki aishire kutina apakaramba ero nokuranda ati, ''Akiba ni nani uwakirunga iyi nama ero nokureta kuri nebo? Nakirya iryo tauraisa, ero ndimuparire. Mukine, akaparwa.'' ³⁴ Uro Eau aishire kumfwa amashiwi yakwa wishi, aishire kurira nekikonko ikikaramba mukurira, ero aishire kuranda kuri wishi ati ''Para, na nebo wine, we tata wandi.'' ³⁵ Isaki aishire kuranda ati, ''Ndume yobe akisa mubumfinsoro ero arisendere iparo ryobe.'' ³⁶ Esau aishire kuranda ati, ''Bushe tainikwa fye bwino ati Yakobo? Pantu amfimfyanya ifi imiku ibiri. Arisendere ububeri, ero boneni, nomba ansendera ne paro.'' Ero aishire kuranda ati, ''Bushe tamunshirireko iparo ryandi?'' ³⁷ Isaki aishire kwasuka ero nokwisa kuranda kuri Esau ati, ''Bona, ndimupangire ukuba shikuru obe, ero ndipere kuri ye bonse ba ndume yakwe ukuba abasha bakwe, ero ndimupere ifisabo ero nomwangashi uupya. Kinshi kimbi ico ningakukitira, we mwana mwaume wandi?'' ³⁸ Esau aishire kuranda kuri wishi ati, ''Bushe tamukwetepofye nangu rimo iparo ryandi, we tata wandi? Para, na nebo wine, we tata wandi.'' Esau aishire kurira apakaramba. ³⁹ Isaki wishi aishire kwasuka nokwisa kuranda kuri ye ati, ''Bona, incende uko ukekara kukaba ukutari ukufuma ku bunonshi bwa kyaro, ukutari ukufuma ku mume wa mumuru. ⁴⁰ Kurupanga robe eko ukekarira, kabiri ukabombera indume yobe. Rero uro wa sunguka, ukakunta ikoriryakwe ukufuma ku mukoshi obe.'' ⁴¹ Esau aishire kupaata Yakobo ba murandu we paro iryo wishi amupere. Esau aishire kuranda mu mutima wakwe ati, ''Inshiku shakurosha tata shiri paremo; panuma yaikyo nkepaya ndume yandi Yakobo.'' ⁴² Amashiwi yakwa Esau umwana mwaume wakwe umukaramba yaishire kwebwa kuri Rabeka. Eikyo aishire kutuma ero nokwita Yakobo umwana mwaume wakwe umwaike ero nokwisa kuranda kuri ye ati, ''Bona, ndume yobe Esau akoikoseresha umwine parwa kupanga uku kwipaya. ⁴³ Nomba eikyo, we mwana mwaume wandi, nakira nebo ero nokufurumukira kuri Lebani, ndume yandi, mu Harani. ⁴⁴ Wikare naye panono, mpaka ikifukushi kya ndume yobe kikakepeko, ero nga araba ifyo wa kita kuri ye. ⁴⁵ Ero nkatuma ero nokukubwesha ukufuma kurya. Nindo ningamirushira bonse mu bushiku bumo? ⁴⁶ Rabeka sihire kuranda kuri Isaki ati, ''Ndi wa naka no bwikashi pa murandu wa bana bakwa banakashi bakwa Heti. Nga kyakuti Yakobo asenda umo pa bana banakashi bakwa Heti ngo mukashi wakwe, kwati nga aba abanakashi, bamo aba abanakashi ba mu musumba, busuma nshi ubo ubikashi bwandi bukaba kuri nebo?''