¹ Nomba insara yariponene mumpanga, rubari rwa nsara yakubarirapo iyaishire kuba munshiku shakwa Abraham. Isaki aishire kuya kuri Abimereki, imfumu yaba Perishiti ku Gerar. ² Nomba Yahweh aishire kuboneka kuri ye ero nokwisa kuranda ati, '' Witentemukira ku Egypto; ikara mumpanga iyo nakweba ukwikaramo. ³ Ikara muri iino mpanga, ero nkaba nobe kabiri nkakupara; pantu kuri webo ero nakurupwa robe, nkesa kupera ishi mpanga shonse, ero nkesa kwisusha umurapo uo narapire kuri Abraham wiso. ⁴ Nkesa kufusha urupwa robe kwati nintanda shamumuru, ero nkesakupera urupwa robe shonse mpanga ishi. ukupitira murupwa robe inko shonse isha pakyaro shikesa kuparwa. ⁵ Nkesa kukita ifi pamurandu wakwebati Abraham aryumfwirire ishiwi ryandi ero arikukonka ifyo mfwaya, ifipope fyandi, ifyebi fyandi, ero namafunde yandi.'' ⁶ Eikyo Isaki aire kwikara mu Gerar. ⁷ Uro abaume bankende baishire kumwipusha parwa mukashi wakwe, aishire kuranda ati, ''Ninkashi yandi.'' Aritinine ukaranda ati, ''Mukashi wandi,'' pantu arikutontonkanya ukweba ati, ''Abaume muri ino nkende bakonjipaya nokusenda Rabeka, pamurandu wakweba ati wabune.'' ⁸ Panuma Isaki ari kurya panshita iitari, Abimereki imfumu yaba Perishiti yaishire kuroresha pewindo. Yaisa kubona, boneni, Isaki akororekesha Rabeka, umukashi wakwe. ⁹ Abimereki aishire kukuta Isaki kuri ye ero nokwisa kuranda ati, ''Bona, rimbi mukashi obe. Nindo wakirandira ati, ninkashi yandi? Isaki aishire kuranda kuri ye, ''Pantu nakitontonkanya ukweba ati umo kuti anjipaya pakweba ati amubure.'' ¹⁰ Abimereki aishire kuranda ati, ''Kindo iki wakita kuri fwebo? Umo pabantu nga akisendama nomukashi obe, ngawakisa kureta umurandu pari fwebo.'' ¹¹ Eikyo Abimereki aishire kusoka abantu bonse nokwisakuranda ati, ''Onse uwaikata muri uyu muntu nangu umukashi wakwe irinokwisa kwipaiwa.'' ¹² Isaki aribyeremo ifirimwa muri irya mpanga ero arisombwere umwaka umo wine umwanda umo, pantu Yahweh arimuparire. ¹³ Umuntu arisangukire umukankara, ero aishire kukura nokwisa kuba uwamaka. ¹⁴ Arikwete impanga ishingi ero neng'ombe, ero nababomfi abengi. Aba Perishiti barimumfwirire akarumwa. ¹⁵ Nomba fyonse ifishima ifyo ababomfi bakwa wishi baimbire munshiku shakwa Abraham wishi, aba Perishiti baishire kubakanya nokushikamo iroba. ¹⁶ Abimereki aishire kuranda kuri Isaki ati, ''Kabuye ukufuma kuri fwebo, pantu wakwatisha amaka parifwebo.'' ¹⁷ Eikyo Isaki arifumineko elo nokuya kwikara mumupokapoka wa Garar, ero nokwikara murya. ¹⁸ Nakabiri Isaki aishire kwimba ifishima fyamenshi, ifyo barikwimba munshiku shakwa Abraham wishi. Aba Perishiti baribareseshe panuma yamfwa yakwa Abraham. Isaki aishire kwinika ifishima amashina yamo yene ayo wishi ainikire. ¹⁹ Uro ababomfi bakwa Isaki baimbire mumipokapoka, baishire kusanga ikishima kikopisha amenshi. ²⁰ Bakakyema bakwa Gerar barirakire nabakakyema bakwa Isaki, ero baishire kuranda ati, ''Aya menshi yesu.'' Eikyo Isaki ainikire kirya kishima ''Eseki'' pamurandu wakweba ati barakire na ye. ²¹ Ero baishire kwimba ikishima kimbi, kabiri barishire kuraka parikyo, eikyo aishire kuripera ishina ''Sitina''. ²² Arifumine parya ero nokuya kwimba kimbi ikishima, rero tabarakire pari kirya. Eikyo aishire kukita Rehoboti, ero aishire kuranda ati, ''Nomba Yahweh apanga inkende yesu, ero twaratunguruka mumpanga.'' ²³ Ero Isaki aishire kuya ukufuma kurya ukuya ku Beresheba. ²⁴ Yahweh aishire kuboneka kuriye buryabwine bushiku ero nokwisa kuranda ati, ''Nine Resa wakwa Abraham wiso. Witina, pantu ndinawebo ero nkokupara ero nokufusha urupwa robe, pamurandu wakwa Abraham umubomfi wandi.'' ²⁵ Isaki arikurire uburambo parya ero apenikire ishina ryakwa Yahweh. Parya arishimpire itenti ryakwe, ero ababomfi bakwe baishire kwimba ikishima. ²⁶ Ero Abimereki aishire kuya ukufuma ku Gerar, na Ahuzati, umunankwe, ero na Piko, kapitao wafita fyakwe. ²⁷ Isaki aishire kuranda kuri bo, ''Kindo mukoishira kuri nebo, pantu murimpatire ero murintamfishe kuri mwebo?'' ²⁸ Ero baishire kuranda ati, Turibwenekeshe ukuti Yahweh ariba nawebo. Eikyo twaishirekusara ukweba ati kufwire kube umurapo pakati kesu, ee, pakati kesu nawebo. Eikyo katupange ikipangano nawebo, ²⁹ pakwebati tawishire kutukarifya, ngefi fine nafwebo tushakukarifye, ero ngefyo tukusendere bunebune ero nokukutuma ukuya umutende. Ikishinka wariparwa kuri Yahweh.'' ³⁰ Eikyo Isaki aishire kupanga umutebeto wabo, ero bariire nokunwa. ³¹ Ero Isaki aishire kubatuma ukya, ero baishire kumusha mumutende. ³² Ubushiku burya bwine ababomfi bakwa Isaki barishire nokwisa kumweba pamurandu wakishima kirya baimbire. Baishire kuranda ati, ''Turisangire amenshi''. ³³ Ainikire ikishima Shiba, eikyo ishina ryaurya musumba ni Beresheba ukushinta na rero. ³⁴ Uro Esau aishire kufika imyaka amakumi yane ubukuru, aishire kusenda umukashi, Jude umwana mwanakashi wakwa Beeri umwina Hiti, ero kabiri Basemati umwana mwanakashi wakwa Elon umwina Hiti, ³⁵ Bariretere uburanda kuri Isaki na Rabeka.