¹ Kyaishiee kuba panuma yaifi fintu ukuti Resa aishire kwesha Abraham. Aishire kuranda kuri ye ati, ''Abraham!'' Abraham aishire kuranda ati, ''Ndi pano.'' ² Ero Resa aishire kuranda ati, ''Pita umwana obe umwaume, umwana obe umwaume umofye, untu watemwa, Isaki, ero urekuya ku kyaro kya Moria. Umpere kurya nge rambo rya kokya pa rupiri rumo pashaba kurya, uro nebo narakwebapo webo.'' ³ Eikyo Abraham aribukire bwangu urukyero, no kunina pa mpunda yakwe, ero apitirepo babiri paba rumendo bakwe nao, pamo na Isaki umwana wakwe umwaume. Ena aritebere ne nkuni she rambo rya koca, ero aishire kutampako no burendo bwakwe ukuya ku nkende uko Resa amwebere. ⁴ Pabushiku bwakurenga shitatu Abraham aishire kwinuna amenso ero aishire kubona inkende akataramukira. ⁵ Abraham aishire kuranda kuba rumendo bakwe ati, ''Ikareni pano ne mpunda, ero nebo no mwaike twaraya kurya. Fwebo tukoya mukushinshimuna ero tubwere kabiri kuri mwebo.'' ⁶ Ero Abraham aishire kupita inkuni sha kokyera irambo ero atwikire Isaki umwana wakwe umwaume. Ena apitire mu minwe yakwe umuriro ero no mwere; ero bena baishire kuya bonse pamo. ⁷ Isaki aishire kuranda kuri wishi wakwe Abraham ati, ''Mwe taata,'' ero aisakuranda ati, Ndi pano mwana mwaume wandi.'' Efyo aishire kuranda, ''Bona inkuni turikwete no muriro, nomba irabmo rya kokya ririkwisa?'' ⁸ Abraham aishire kuranda ati, ''Resa umwine eukopekanya irambo rya kokya, mwana wandi.'' Eikyo baishire kukonkyapo ukuya, bonse babiri. ⁹ Uro baishire kuya ku nkende uko Resa amwebere, Abraham aishire kukura uburambo kurya ero abikapo ne nkuni parya pene. Ero akakire Isaki umwana wakwe, no kumubika pa burambo pa muru wa nkuni. ¹⁰ Abraham atambarikire ukuboko kwakwe ero aburire umwere ukuti epaye umwana wakwe. ¹¹ Ero maraika wakwa Yahweh amukutire ukufuma mu muru no kumweba ati, ''Abraham, Abraham!'' ero aishire kuranda, Ndi pano.'' ¹² Aishire kuranda, ''Witambarika ukuboko kobe pa mwaike nangu ku kita ikiri kyonse ikyabipa kuri ye, pantu nomba nebo naishiba ukuti webo uratina Resa, pa kubona ukutira webo taukenye umwana obe, umwana obefye umo mpo, uwa fuma kuri nebo.'' ¹³ Abraham aishire kwinuna amenso ero boneni, kunuma yakwe kwari impaanga iirume ninshi iriketwe mu kimpusa ku masengo yaiko.Abraham aishire kuya, no kupiita impaanga iirume ero no kuipera nge rambo rya kokya mu kifuro kya mwana wakwe umwaume. ¹⁴ Eikyo Abraham aishire kwinika irya ncende, ''Yaweh eukopekanya,'' ero neki kikolandwa ukufika napari buno bushiku, ''Parupiri rwakwa Yahweh kikapekanishiwa.'' ¹⁵ Maraika wakwa Yahweh aishire kukuta kuri Abraham umuku wa bubiri ukufuma mu muru ¹⁶ ero aishire kuranda ati-uku ekuranda kwakwa Yaweh-pari nebo ne mwine narapa ukuti pantu webo urikitire iki kintu, ero taukenye umwana mwaume obe, umwana mwaume obe umofye mpo, ¹⁷ nebo ikinefye nkakupara ero nebo nkasandurura apakuru urupwa robe nge ntanda sha mu muru, ero ngo mukyanga uyo uwaba pambari ya bemba; ero urupwa robe bakacimfya impongoro sha barwani babo. ¹⁸ Ukupitira mubufyashi bobe imitundu yonse iya pa kyaro ikaparwa, pantu urinakire ishiwi ryandi.'' ¹⁹ Eikyo Abraham aishile kubwerera ku barumendo bakwe, ero baishire kubwereramo nokuya bonse ku Beresheba, ero aikere mu Beresheba. ²⁰ Kyaishire kuba panuma yaifi fintu ifyo Abraham aeberwe, ''Mirika arifyere abana, na yee, kuri ndume yobe Nahor.'' ²¹ Bari ni Uzi iberi ryakwe, Buzi ndume yakwe, Kemure wishi wakwa Aramu, ²² Kesedi, Haso, Piridashi, Yidrafu, ero na Betuere. ²³ Beture aishire kuba wishi wakwa Rabeka. Aba ebari abana kine konse konse abo Mirika aishire kufyara kuri Nahore, ndume yakwa Abraham. ²⁴ Umwanakashi wakwe uwapambari, uweshina rya Reuma, nako aishire kufyarako Teba, Gahamu, Tahashi, ero na Maaka.