¹ Kabiri Yahweh atumine Nathan kuri Davidi. Aishire kuri ye no kusosa ati, ''Kwari inshita imo abaume babiri mu musumba. Umo ari umukankara no uyu umbi ari mupina. ² Umukankara arikwete impendwa iikuru iya mpanga ne ng'ombe, ³ Rero umwaume umupina takwete nangu kimo akwetefye akakota ka mpanga, ako ashitire no kurisha no ku kakusha. kakurire pamo n ye elo pamofye na bana bakwe. Aka akana ka mpanga karerira pamo na ye no kunwina kurukombo rwakwe, kabiri karerara mu maboko yakwe eryo kari kwati mwana umwanakashi kuri ye. ⁴ Bushiku bumo umutandashi arishire ku mwaume umukankara, rero uyu umwaume umukankala afirirwe ukuburapo imo pa mpnga nangu ing'ombe shakwe ukuti apekanishishe umweni wakwe ikyakurya. Ikyakuti, aburire akana ka mpanga akakota aka mwaume umupina eko aipakira umweni wakwe.'' ⁵ Davidi ariikatwa no bukari kuri uyo mwaume umukankara, no kweba Nathan ati, ''Mukishinka kyakuti Yahweh wa mweo, umwaume uukitire iki aringire ukufwa. ⁶ Afwire ukubweshapo impanga shine pakukita ikyamusango uyu, kabiri takwatireko no mwaume umupina uruse.'' ⁷ Eryo Nathan asosere kuri Davidi ati, ''Niwe urya mwaume! Yahweh, Resa wakwa Israeri, asosere ati, ''Narikusubire ubufuma pa bena Israeri, no kukupususha mu minwe yakwa Shauri. ⁸ Narikupere ing'anda yakwa sokuru, na bakashi bakwe mu maboko yobe. Rero nga kyakuti firya fyari finono, nga narikubikirepo ne fintu na fimbi. ⁹ Eikyo ninshi wasurira ukukonkomesha kwakwa Yahweh, eikyo nga kukukita ikyabipa mu menso yakwe? Waripaya Uriah umwina Hiti ku rupanga no kusenda umukashi wakwe ukuba umukashi obe. Wamwipaire ku rupanga rwa bena Amoni. ¹⁰ Eikyo nomba urupanga tarwakatare fuma mu ng'anda yobe, pantu nausura nebo, no kusenda umukashi wakwa Uriah ukuba umukashi obe. ¹¹ Yahweh asosere ati, ''Roresha, ndi nokwimya ifimfurunganya mu ng'anda yobe. pa ntanshi ya menso yobe, Nkasenda abakashi bobe no kubapera ku mwina muparamano obe, no kurara na bakashi bobe parwarara. ¹² Ikyo webo wakitire urubembu mu kufisama, rero wene akakita iki kintu pa kinso kyakwa Israeri yonse pa kasuba.''' ¹³ Eryo Davidi asosere kuri Nathan ati, ''Nimbembukira Yahweh.'' Nathan ayasukire kuri David ati, ''Yahweh nafumyapo urubembu robe. Tawaipaiwe. ¹⁴ Nomba, pa murandu wakuti nausura Yahweh, umwana ukafyarwa kuri webo akafwa.'' ¹⁵ Eryo Nathan afumune no kuya ku ng'anda. Yahweh asanshire umwana uyo umukashi wakwa Uriah afyarire Davidi, na ye arirwarishe. ¹⁶ Eryo Davidi apapatireko umwana kuri Resa. Davidi afungire no kuya mukati no kurara ubushiku bonse panshi. ¹⁷ Abakaramba ba n'ganda yakwe barimine no kwiminina rubari rwakwe, ku kumwimya ukufuma panshi, rero tareiminina, no kurya tarerya na bena. ¹⁸ Kyari ifi pa bushiku bwarenga kine rubari iryo umwana afwire . Ababomfi bakwa Davidi bari no mwenso wakumweba ati umwana nafwa, Eikyo basosere ati, ''Boneni, iryo umwana akiri no mweo twarirandire kuri ye, kabiri tareumfwa ishiwi ryesu. Kinshi e ngakita nga kyakuti twamweba ati umwana nafwa?!'' ¹⁹ Nomba iryo Davidi abwene ababomfi bakwe baretepereshanya pamo, Davidi atontonkenye ati umwana nafwa. Asosere ku babomfi bakwe ati, ''Bushe umwana nafwa?'' bayaswike ati nafwa.'' ²⁰ Eryo Davidi aimine ukufuma panshi ku samba, aisuba amafuta no kufwara fimbi ifyakufwara fyakwe. Aire ku ng'anda yakwa Yahweh eryo ashinshimwine kurya kwine, eryo nomba abwerere ku kipango kyakwe. Iryo aipwishe pari iki babikire ifyakurya pa ntanshi yakwe eryo arire. ²¹ Eryo ababomfi bakwe basosere kuri ye ati, ''Ninshi mwakitira iki? Mwarifunga no kurosha iryo umwana ari umutunturu, rero iryo umwana afwa mwaima no kurya.'' ²² Davidi ayaswike ati, ''Iryo umwana akiri ari no mweo narifungire no kurosha. Nasosere ati, ''Nani e shibe nga kyakuti Yahweh kuti ambererako uruse, ukuti umwana abe no mweo?'' ²³ Rero nomba nafwa, eikyo ninshi narafungira? bushe kuti namubwesha ku mweo na kabiri? Nkaya kuri ye, rero takabwere kuri nebo.'' ²⁴ Davidi akunkumbire Betisheba umukashi wakwe, kabiri aingire kuri ye no kurara na ye, Mukuya kwanshita afyere umwana umwaume, no mwana ainikwe Soromon. Yahweh arimutemenwe. ²⁵ Eryo atumine ikyebo ukupitira muri Nathan ukuti amwinike ati Jedidiah, pantu Yahweh arimutemenwe. ²⁶ Nomba Joab arwishishe Rabbah uwa mu bena Amoni, eryo aikete umusumba wa bufumu. ²⁷ Eikyo Joab atumine inkombe kuri Davidi eryo asosa ati, ''Nindwisha Rabbah, eryo ninsenda umusumba wa menshi. ²⁸ Nomba ronganikeni abashirika abasharapo pamo no kupangira umusumba inkambi, no kupoka, pantu nga napoka umusumba, ukenikwa ishina ryandi. ²⁹ Eikyo Davidi aronganike abashirika pamo no kuya kuri Rabbah; arwishishe umusumba no kuwikata. ³⁰ David afurire ikisote ukufuma ku mutwe wa mfumu yabo-kyafinine nga goride, eryo mwari ne ribwe iryaruma umutengo. Ikisote kya bufumu kyabikirwe ku mutwe wakwa David. Eryo apokorwere ifya kutapa ifyari mu musumba ifingi. ³¹ Aburire abantu abari mu musumba no kubapatikisha ukubomba umurimo wa kupanga ifyera ifyatwa no kuputura amabwe, no kupanga amasembe; na kabiri arebabomfya ukupanga ingerwa. David arefwaya imisumba yonse iya bantu bamu Amoni ukubomba uyu murimo. Eryo David ne fita fyonse babwereremo ku Yerusaremu.