¹ Kyari ifi pakupwa kwa mwaka, pa nshita iryo imfumu shareirapo ku burwi, eryo Davidi atumine Joab, ababomfi bakwe ne fita fyonse ifyakwa Israeri. Baonawire ifita fya mu Amoni no kushinguruka umusumba wa Rabbah. Rero Davidi aikere mu Yerusaremu. ² Kanshi kyari ifi ikyunguro iryo Davidi aimine ukufuma pa busanshi bwa kwe no kwamba ukwendauka pa mutenge wa ng'anda ye sano ryakwe. Parya e po abwene umwanakashi uwaresamba ari musuma ukumuroresha. ³ Kanshi Davidi atumine no kwipusha abantu abengakwatirapo ubwishibiro pari urya mwanakashi. Umo asosere ati, ''Te Betisheba uyu, umwana mwanakashi wakwa Eriam, eryo bushe te uyu umukashi wakwa Uriah umwina Hiti?'' ⁴ Davidi atumine abakuya mubura; aishire mukati kuri wene, no kurara nankwe (pantu Betisheba ari uwasanguruka ukufuma ku mweshi). eryo abwereremo ku ng'anda yakwe. ⁵ Umwanakashi arimite, kabiri umwanakashi atumine intumi no kweba Davidi, umwanakashi asosere ati, ''Ningimita.'' ⁶ Eryo Davidi atumine kuri Joab ukusosa ati, ''Ntumineniko Uriah umwina Hiti.'' Eikyo Joab atumine Uriah kuri Davidi. ⁷ Eryo Uriah afikire, Davidi amwipwishe ifyo Joab ari, ifyo ifita fyarebomba, ne fyo uburwi bwareya. ⁸ Davidi asosere kuri Uriah ati, ''Tentemukira ku ng'anda yobe no kusamba amakasa yobe.'' Eikyo Uriah ashire ikipango kya mfumu, ne imfumu yatumine ikya bupe kuri Uriah pa numa naya. ⁹ Rero Uriah arere pa mwinshi wa kipango kya mfumu pamo na babomfi bonse aba bashimukindikwa, kabiri tatentemukire ku ng'anda yakwe. ¹⁰ Iryo baebere Davidi ati, ''Uriah tatentemukire ku ng'anda yakwe, ''Davidi asosere kuri Uriah ati, ''Bushe taumfumine pa rwendo? Ninshi tautentemukire ku ng'anda yobe?'' ¹¹ Uriah ayasukire Davidi ati, ''Imbokoshi ya kipangano, na Israeri na ba Yuda bareikara mu ma tenti, no mukuru wa fita wandi Yoabu na ba bomfi ba mukuru wa fiita wandi bekere mu mabara aya isuka. Ninshi naraira mu ng'anda yandi ku kurya no kunwa no kurara pamo no mukashi wandi? Apo ningishiba ati muri no mweo, nshakite iki.'' ¹² Eikyo David asosere kuri Uriah ati, ''Ikara pano rero, na mairo nkareka webo ukaye.'' Eikyo Uriah aikere mu Yerusaremu burya bushiku no bushiku bwakonkerepo. ¹³ Iryo Davidi amwitire, aririre no kunwa pa kinso kyakwe, na Davidi amurengere ukukorwa. Pa kyunguro Uriah aire rara pa busanshi bwakwe pamo na babomfi ba mukuru wa fita fyakwe; tantemukire ku ng'anda yakwe. ¹⁴ Eikyo mu kya rucero Davidi arembere inkarata kuri Yoabu, no kuituma mu maboko yaka Uriah. ¹⁵ Davidi arembere mu nkarata ukusosa ati, ''Bika Uriah pa ntanshi ya burwi bwa kakata, eryo nomba mufume kuri ye, pakuti araswe no kwipaiwa.'' ¹⁶ Eikyo iryo Yoabu abwene ifibumba fyakosa mu musumba, abikire Uriah ku nkyende uko aishibire ukuti abashirika abakosesha ba kurarwira. ¹⁷ Iryo abaume ba mu musumba baire no kurwisha ifita fya kwa Yoabu, bamo abashirika bakwa Davidi bariwire, na Uriah umwina Hiti nao aripaiwe kurya kwine. ¹⁸ Iryo Yoabu atumine amashiwi kuri Davidi pari fyonse pa murandu wa burwi, ¹⁹ akonkomeshe intumi ati, ''Iryo warayapwisha ukweba imfumu ifintu fyonse parwa burwi, ²⁰ kuti kyakitika ikyakuti imfumu ireyakaripa, no kusosa kuri we ati, 'Ninshi mwairire mupepi no musumba mu kurwa? Tamwaishibire ati kuti ba rashira mukikurwa? ²¹ Ninani waipeye Abimereki umwana mwaume wakwa Yerubu-Bisheti? Bushe te mwanakashi uwamurashire iribwe ukufuma mukikurwa, pakuti afwe pa Tebezi? Ninshi mwairire mupepi ne kikurwa?' Eryo uye wasuke ati, 'Umubofi wenu Uriah umwina Hiti na ye nafwa.''' ²² Eikyo intumi yarishire no kuya kuri Davidi no kumweba fyonse ifyo Yoabu amutumine ukusosa. ²³ Eryo intumi yasosere kuri Davidi ati, ''Abarwani bari abakosa ukutukira pakubara; Baishire kuri fwebo mwibara, rero twaribabwekeshemo ku mpongoro. ²⁴ Eryo abarasa babo barashire pa bashirika benu ukufuma apaperera ikikurwa, na babomfi ba mfumu bamo bari paiwe, no mu bomfi wenu Uriah umwina Hiti na ye aripaiwe.'' ²⁵ Eryo Davidi asosere ku ntumi ati, ''Ukasose ifi kuri Yoabu, 'Wireka iki ukushikusekesha, pantu urupanga rwimina umo no munankwe. Panga uburwi ukukoserako pa kwimina umusumba no kuposa,' kabiri umukoseleshe.'' ²⁶ Eikyo iryo umukashi wakwa Uriah aumfwire ati umurume wakwe Uriah nafwa, ari uwaburanda nganshi pa murume wakwe. ²⁷ Iryo ifiramba fyakwe fyapwire, Davidi atumine no kumupita ku ng'anda ku kipango kyakwe, no kuba umukashi wakwe no kumufyarira umwana mwaume. Rero ikyo Davidi akitire tasekeshe Yahweh.