¹ Cware hanu kuamana nokuvoora ko Nfumu Jeso Kereste no kushangana kwetu hantu honke kuva neye: tumikumbira vakwetu, ² kuta ye kwashavi ovuhuva kuzishunshu no kukatazwa, ko ruho, ke kañusa, kapa keñoro linahara sina kwetu lizwa, kokutiye ezyuva lyo Nfumu lya huli. ³ Kwashavi naenke ozyo amihome kenjira yi kapa yi. Kakuli kali shaka nekuve mbitaho ovukwenuheri nevuveko, no muntu ozyo azya murawo sundizwa, mwana we cisinyi. ⁴ Eci cozyo aopoza no kulihanjika eye mwini kurwisa ezo zonshe zikuwiwa ka Nyambe kapa kweco ciraperwa. Amamani-mani, akara mwi tempere ya Nyambe no kulita mwini ye nde Nyambe. ⁵ Kana kamuazyali ye aho kandina nenwe ninda misumwina ezi zinyu? ⁶ Cware hanu nkocina eco nica mutivera, kuta ye okuvonahara kwakwe keina enako iyerere. ⁷ Kakuli enkunutu zaazya murawo seziseveza, enke vulyo amutivere hanu mbita ho shaka namuzwise munjira. ⁸ Cware ozyo azya murawo nasundizwe, ozyo Nfumu Jesu nayaye komuzya wa kanwa kakwe. Onfumu namurete hakumumanisa kusinura okukezya kwakwe. ⁹ Kwavo vaazya komurawo kukezya kezitendo za Satani ne maanta onshe, zisupo, no mbuzi ikomosa, ¹⁰ mi ne mbuzi zonshe zo kusaruka. Zizi zintu zira zavo vafwa, kakuli kali nivatambura elato lye niiti kuta ye vahazwa. ¹¹ Keli vaka Nyambe ara vatumina emitendo ikeruhite kutaye vazumine mwimbuzi. ¹² Mamani-mani ni vaaturwe, kwavo kali niva zumina eniti kono nivahinda eminyaka mwinjira yazya kurukite. ¹³ Kono tuswanezi okuhanga ovuitumero kwa Nyambe kenu, vakwangu vashakiwa ku Nfumu. Nyambe naamishara ye muve emisero yentanzi yo puruso kokuceniswa ko Ruho no kuzumina mwi niti. ¹⁴ Eci nceco namikuwira ko kurapeli bwetu vuwane ekanya yo Nfumu Jeso Kereste. ¹⁵ Cware he, vakwangu, muzyimane koku gora. Mukwatise ecizo cina nimwa rutiwa, kezywi kapa ke ñoro yetu. ¹⁶ Hanu cware Nfumwetyu Jeso Kereste eye mwini, me Nyambe shwetu ozyo atushaka mi no kutuha okugora kushamani ne ntukuruho ikezya ke cishemo, ¹⁷ okugora no kuzyaka myizyo yenu mumitendo yenu emirotu ne zywi.