¹ Neya munyamo dhange, minange ghombuyama nomwenga wange; noghongawedha munde nombuyo dhisha ghutowi. Nadi thindjemi thowiki ghomuka; nanu vinyu wange nomanhwe. Mudye mwayendhange nomunwe thikuma mwahakwa wange. ² Narara ene mutjima wange ne ghuna pinduka. Adyo ne diywi dyamuhakwa wange ghodirura! Ghana ngongona ghughamba eshi; niyandherere minange ghombuyama nomuhakwa wange, dikutji dyange oyu ghahungama, mutwi wange ne ghuna yuru kumume nohuki dhange ne dhina hupu kumahoyoyo ghoghuthiku. ³ Nashutura yivata yange, nishupate karo ndi? Nakenitha mapadhi ghange; nigha dhiropithe karo ndi? ⁴ Muhakwa wange ghodirura ghana tura nyara dhendi kudikumba dyothero nomutjima wange ne ghuna ruru kumumona. ⁵ Napindukire nika yandhwerere muhakwa wange ghodirura; munyara dhange ne mwahoyire munde nominwe dhange dhayurire kumunde ghu nokumayandherero ghodikungu. ⁶ Nayandhwerere muhakwa wange ghodirura namuhakwa wange ghapirukire nokayenda. Mutjima wange ne wakashire apa nayuvire eshi ghana nishana ene mbadi ghani wanine; namwithire ene mbadi ghani huthire. ⁷ Hama shurundate ne hani wanine apa hadhingurukire mbara. Hani pumure nohani remekire; hakungi ne hashimbire ngugho wange. ⁸ Nakumurawera amwe mwahana Jerusalem hohambuyama eshi ngeshi muwane muhakwa wange ghodirura ne mumutongwere eshi ame ne nomukorwi ghoruhakitho. ⁹ Ngepi edi ghakara muhakwa ghoye kupiterera hahakwa wamweya, eshi aye ne muwa kupiterera hambuyama hamweya? Pashanye ghana kukarera muhakwa ghoye ghodirura eshi hasha kupiterera hahakwa hamweya, eyi ghuna kuturawera kemo? ¹⁰ Muhakwa wange ghodirura ne mukenu nomukihu, fumu mwawa diyovi. ¹¹ Mutwi wendi ne kotongoro ngorondo; huki dhendi ne dhendi ne yira mangumbi nowiru yira dikorova. ¹² Meho ghendi ne yira dikutji kumbombwa dhomeyu edi hana yogho mumanhwe nohana dikureka yira yiyengitha. ¹³ Matama ghendi ne yira ghudidi ghomunde mwene, oghu ghudi nothiwe mwene. Miromo dhendi ne yira mitemo dhina kuhoya munde mwene. ¹⁴ Moko ghendi ne ghashupata ko makayi ghongorondo; parutamo rwendi ne ghafika po noghukenu nothina diwiru. ¹⁵ Mapadhi ghendi ne maghundhi ghomawe, agha hatura kumadjatekitho ghongorondo no edi ghana kumoneka ne yira Lebanon, ghuwa wapo ne yira thitondo thomutemo. ¹⁶ Kanwa kendi ne ghutowi mbokapwe; aye ne ghayara noruhakitho. Oyu ne yomuhakwa wange ghodirura no oyu ne mushere wange, awe mwahana hohambuyama waJerusalem.