¹ Vuruke Fumu Nyambi eyi yahokokire kukwetu; kenge edi tuna shwahuka. ² Ghupingwa wetu ne ghuna piruka kwawa mutundakure nomayugho ghetu kwawa mutundakure. ³ Tudi yira hathiyana awa hana piri hawihagho nawa nyokwagho noghotudi yira hadidhi. ⁴ Tukone kuruwera siliveri kumeyu noyikunyi yetu. ⁵ Awa hana kutukutha ne pepi-pepi hadi netu; tuna twama nokupira maturumuthero. ⁶ Twatapa manyara ghetu kwaEgypitena naAssyria tuwane ko yidya. ⁷ Hakereka ndongo wetu haharurire ene yatwe tuna kunyandera maharwero ghagho. ⁸ Hapika hana kuturaghura no noyotji temba ghokukona kutushwayitha munyara dhagho. ⁹ Atwe ne kuwana yidya mughukukutu kumoyo dhetu, pamurandu ghodimende mumamboreya. ¹⁰ Yitumba yetu ne yina pyaghana yira dihdiko pamuarandu ghoghughenyu ghodirumbu. ¹¹ Hambuyama ne mungcamu hana kuwa kwatera nohambuyama awa hapira kukundama kwawa tuturu ne mumbara dhaJuda. ¹² Hana wamafumu ne hana ndhendhera pamurandu ghomanyara ghagho nohakuru ne mbadi hana kuwakutekera. ¹³ Hangaghu ghana ne kuna kuwa thineneka kutwa mushungwa nodiwe dyokutwitha noho hambirupo ne kuna kupundaghuka kumuremena ghoyikunyi. ¹⁴ Hakuru ne hashwagha pamakorogho ghombara nohangaghu ghana ne hathiya yimbaghura. ¹⁵ Yishamberera yomitjima dhetu ne yapwa noyikina yetu ne yapiruka madiro. ¹⁶ Dishukeka ne dyawa kumitwi dhetu; mawe kukwetu! pamurandu eshi twaharura! ¹⁷ Pamurandu ghoyi, mutjima dhetu ne dhawa nomeho ghetu ne ghafa. ¹⁸ Dirundu dyaZioni ne dina rundumuka nombwawa ne podhina shamba shambera. ¹⁹ Ene we Fumu Nyambi ne waraghura kuroruhe nomboghuna hungumana dipuna dyaFumu ndunda thiku dhiya yenda ghuye ghuno. ²⁰ Pashanye ghuna kutu mwagherera kuroruheya? Pashanye ghuna tuvuramena mayuwa ghomare? ²¹ Tuhuthere kukoye, Fumu Nyambi nombotuna huka. Tendurure mayuwa ghetu yira pathuru-huru; ²² Shimengwa yikare eshi ghuna tumwagherera keho noghuna pata thikuma netu.