¹ Ngorondo ne ghana dhimana; ngepi edi ghana kutjindji ngorondo ya shaghuwa? Mawe ghomunyaku ne ghana kuharanganya mumambirikatji. ² Hana Zioni hoha tutughuru homudyo yira ngorondo, Ngepi hana kuwarikanyitha yira poto ghokutenditha kumatapa, yiruwana yamumbi ghuma! ³ Ngambi mbwawa nadho kuyamweka hanadho ene mwanange ghombuyama ne ghukenya yira mwe mumamboreya. ⁴ Rudimi rwambututu ne rwakakatera kuwiru dhokanwa kudinota; hana kuromba yidya ene mbadiko ghokuyiwapa. ⁵ Awa ngaha dyanga thiwana pano ne hana konyatera mumambirikatji. Awa havatire yitere yokukihuruka, pano ne hana rundama mumutwitwi. ⁶ Mahumbithero ghomaharwero ghamwanange ghombuyama ne makuru, kupitera ghaSodom, awa hadhongononine mukapupi kamanana kupira nodyoko dyokuwa ghamwena. ⁷ Hana fumu ne hakushukire yira mume, ghukenu kupiterera manhwe; yirama yagho ne yatwidhimine kupiterera thina maghumi, yishwi yagho ne yira mawe gho thina diwiru. ⁸ Edi hana kumoneka pano ne wiru kupiterera matapa; mbadi hana kuwadimuka mumambirikatji. Yitumba yagho ne yakakatera kuyishokora yagho; noya kukuta yira yikunyi. ⁹ Awa hana kufa kuthimende ne hasha, mbadi pofotji nowa hana kufa kundhara, yoyishi hana kuyonda thikuma kudirumbu pamurandu ghoghupu mukesho mumapya. ¹⁰ Manyara ghohambuyama hohanongo ne hateneka hanagho; nohana pirika hakare yidya yagho apa mwanange ghombuyama ghana pu kuhanyaghura. ¹¹ Fumu Nyambi ne ghayarithere ghukenya wendi; Aye ne ghanotore ghupata wendi ghushokuru. Ghatumekire mudiro muZioni oghu watumekire matatekero ghendi. ¹² Hama fumu homukaye, nawahatunga mukaye mbadi wakukona kutawa eshi munyathi ne kukona ghengene makorogho ghaJerusalema. ¹³ Yahokokire yi pamurandu ghomaharwero ghawa pumbi nawa pristeri, omu hanotore manyinga ghawa kakupongoka mukatji kenu. ¹⁴ Harenda-rendire ghukunga mumambirikatji. Hakunyatekire nomanyinga gha podiyo eshi noyofotji temba ghokukona ghakwate yishupata yagho. ¹⁵ Kayoghototo kawanu eshi; Muyakunuke, Amwe mwanyata; muyakunuke! muyakunuke! Nomwatu kwata! Awo ne haterenganine; hanu ne haghambathanine eshi mbadi haroghera kutunga karo muno. ¹⁶ Fumu Nyambi thendi ghawa yakunuthire; nombadi ghana kuwa shana karo. Awo ne mbadi hakutekerire hapristeri nokukwatithako temba hapiterithi. ¹⁷ Meho ghetu ne ghakangire kutoperera pamaghamweno ghokupira mudyo; Muthishwagha meho thetu, twamonine ditunga edi dyapirire kutughamwena. ¹⁸ Hakuthire miro dhetu podiyo eshi mbadi tuyendaghure horo mumambirikatji ghetu. Ghuhura wetu pepi-pepi; mayuwa ghetu ne ghapwire; noghuhura wetu ne weyirepo. ¹⁹ Haka kutu kuthedhekera ne hatambukerere kupiterera nwanyi muwiru. Hatu fafedhekere mumarundu nokutaterera mumamboreya. ²⁰ Kutotha komumayuru ghetu ne Oyu ghatungeka Fumu Nyambi; hamukwatire mumakwina ghagho. Oyu twaghambire eshi; mumondo ghendi mbotuna tungu mumatunga. ²¹ Mudjabwane nomushamberere mwahana Edom hohambuyama, amwe mwatunga muditunga dyaUz. Ene kukwenu ne thinwitho ne mbothina mupiti nokughanda nombomuna kuhurura thiheha. ²² Mwahana Zioni hohambuyama, mahumbithero ghenu ne mboghana kumu kughuhura; mbadi mbogha wedherera ghupika wenu. Ene mwahana Edom hohambuyama, mboghana muhumbitha pamurandu ghomaharwero ghenu.