¹ Mumwaka ghoghuwadi wafumu Darius, mukaghonda koghukwoko-fotji mudiyuwa dyokutanga. Mbudhi dhaNyambi dheyire kwaHagayi ghomuporofeta kwamuyendithi Juda, Zerubabeli ghomwana Shealtieli namupristeri shokuru Joshua ghomwana Jozadak ghughamba eshi; ² Nyambi thinda shayoyihe ghana kughamba ngambi kenge nagho hanu hana kughamba eshi mbadi ruvedhe rokwiya nokutenda ndhugho dhaFumu Nyambi. ³ Nombudhi dhaFumu Nyambi dheyire panyara dhaHagayi ghomuporofeta ghughamba, ⁴ ghoru ne ruvedhe ghoru muna roghera kutunga mumandhugho ghenu, yoyishi odhi ne dhepa. ⁵ Yodiyo, Fumu Nyambi shathinda yoyihe ghana kughamba eshi; muvihe mandhira ghenu. ⁶ Mwakuna mbuto dhodhingi ene muyangu ne ghupu, amwe ne kudya ene mbadi mudi noyoyingi; amwe ne kunwa ene mbadiko kuterera. Kushupata yitere mwe ene mbadi yina kumuyenyeka noyu ghana kuwana yiyeramo, ene ghana kuyitura mushaka yu ghayara matju. ⁷ Fumu Nyambi shathinda yoyihe ghana kughamba eshi, mukona-kone mandhira ghenu! ⁸ Muyende kumarundu nomukarete yitondo nomutende ndhugho; nonakuyihafera nokuwana fumwa dyoghana kughamba Fumu Nyambi. ⁹ Mwataterera yoyingi ene mumone amwe ne mwana ghupu, Ame ne nayipepumunine! Pashanye? Dyoghana kughamba Fumu Nyambi, pamurandu eshi ndhugho dhange ne dhayungunuka. ¹⁰ Pamurandu ghoyinu yi mawiru ghana shweneka mume no mbadiko muyangu mukaye. ¹¹ Nataweredhere dirumbu mukaye nomumarundu, nomu magavo nomu vinyu, nomu maghadhi nomoyoyihe eyi yina kushwagha mumuve kwawanu nokuyiyama noyiruwana yenu yoyihe. ¹² Ndani Zerubabel ghomwana Shealtiel namupristeri shokuru Joshua ghomwana Jozadak nohatawi wahe hakutekere diywi dyaFumu Nyambi nombudhi dha Hagayi ghomupumbi, pamurandu eshi Nyambi wagho yodiye ghamutuma nohanu hatutukwire kuthishwi thaFumu Nyambi. ¹³ Ndani Hagayi ghomutumi waFumu Nyambi ghogha ghambire mbudhi dhaFumu Nyambi ghuninga eshi; Ame ne nenu nidi noghogha ne medhero ghaFumu Nyambi. ¹⁴ Yodiyo Fumu Nyambi ghatjindjire maghano ghamupiterithi waJuda, Zerubabel ghomwana Shealtiel nomupepo wamu pristeri shokuru Joshua ghomwana Jozadak nomupepo wawahe hatawi nohayendire hakaruwanine ndhugho dhaFumu Nyambi shathinda yoyiheya ghoNyambi wawo. ¹⁵ Mudiyuwa dyomakumi mawadi nodyoghune ghokaghonda koghukwoko-fotji komumwaka ghoghuwadi wafumu Darius.