¹ Mukaghonda koghukwoko wadi mudiyuwa dyomakumi mawadi nodyofotji, mbudhi dhaFumu Nyambi dheyire kwamupumbi Hagayi ghughamba eshi, ² tongwere mupiterithi waJuda Zerubabel ghomwana Shealtiel nokwa mupristeri shokuru Joshua ghomwana Jozadak nokwawa tawi wahe ghuninga eshi; ³ Yidye ghana thiyara mukatji kenu oyu ghamonine edhi ndhugho fumwa edhi dhakarire nadho? Ngepi muna kudhimona? Mbadi dhina kumoneka yira mbadipo yinu vene ndi? ⁴ Pano ne mutanare, Zerubabel agha ne medhero ghaFumu Nyambi notanare. Mupristeri shokuru Joshua ghomwana Jozadak nowe tanare nomwanu mwahe mudyango di, ogha ne medhero ghaFumu Nyambi nomuruwane yoyishi nenu nidi. ⁵ Oghu ne ghundambo nakuyuvire nenu apa mwakatundire ku Egyptena nomupepo wange ghunemana ndjikiti mumwenu, mwayapa. ⁶ Fumu Nyambi thinda shayoyihe kuna kughamba ngeno, kapupi kamanana nakunyungitha mawiru nokaye, dikuruvuya, nomuve! ⁷ Mbona nyungitha kehe mushovo nokehe mushovo mboghuna reta maghushwi kukwange nombona yaritha dhi ndhugho fumwa, dyoghana kughamba Fumu Nyambi. ⁸ Siliveri nongorondo ne yange ogha ne medhero ghaFumu Nyambi thinda shayoyiheya. ⁹ Fumwa nomakughero ghodhi ndugho mboyina kuru mayuwa paghutho kupiterera pathihuruhuru, dyoghana kughamba Fumu Nyambi nombona tapa thiraro mudyango di, nogha ne medhero ghaFumu Nyambi. ¹⁰ Mukaghonda koghukwokone mudiyuwa dyomakumi mawadi-nodyoghune, mumwaka ghoghuwadi wafumu Darius, mbudhi dhaFumu Nyambi dheyire kwa Hagayi ghomupumbi ghuninga eshi; ¹¹ Fumu Nyambi kuna kughamba ngeno, mwipure hapristeri kuhatera muragho nokughamba eshi; ¹² ngeshi munu ghashimbi nyama yu haroyithera kwaFumu Nyambi, aye ghogha mushimbere mudirimba nonyama yu ghogha kundame kughoroto, vinyu, endi kukehe thidya, kukona ghakare ghana pongoka ndi? Hapristeri ne hahuthire eshi mbadi kemo. ¹³ Hagayi ghambire eshi, ngeshi poghadi ghana nyata mukukwata yokufa kurwombo, aye ne kokukwata yinu yi, kukona ghakushuke ndi? Hapristeri hahuthire eshi mbadiko. ¹⁴ Hagayi ghahuthire eshi dyoyidi kowa hanu nomushovo ghu, dyoghana kughamba fumu nokehe yi hana kunipa nomanyara ghagho ne yanyata. ¹⁵ Kutunderera pano kate mayuwa paghutho mukukonakone, kughutho ghokutura diwe pamuyendhandyo mutembeli waFumu Nyambi. ¹⁶ Ngepi edi yakarire? Apa mwakumine kuthiviha thomashaka makumi mawadi ghomuyangu dhenu, ene dikumi ngenyu ghakarire nokuvinyu, mukushwayitha mumakumi kwoko ene gho ne makumi ngenyu mawadi. ¹⁷ Ame ne namunyandekire noyiruwana yonyara dhenu nodihamba dyokwipitha yimenwa ene shime mbadi mwahukire kukwange, ogha ne medhero ghaFumu Nyambi. ¹⁸ Muku konakone kutunderera pano, kutunderera mughonda kokwoko-ne mudiyuwa dyomakumi mwawdi nodiyuwa dyoghune, apa matatekero ghotembeli waFumu Nyambi ghapwire kutenda. Muyikonakone, ¹⁹ Shime mudi mbuto muyitungu yenu ndi? mbadi ngamuwana muyangu ene kutunderera pano ne nakumufiyera! ²⁰ Mbudhi dhaNyambi dheyire kwaHagayi roghuwadi mudiyuwa dyomakumi mawadi nodyoghune ghokaghonda kokwoko-ne nokughamba ²¹ eshi; tongwere mupiterithi wa Juda Zerubabel noghambe mbona nyungitha mawiru nokaye. ²² mbona witha maghufumu noku hanyaghura mangcamu ghagho. No mbona withera matemba ghagho, hadhini, tukambe nohadhini wato pamurandu ghodimende dyamukurwendi endi minendi. ²³ Mudiyuwa dyo, dyoghana kwedha Fumu Nyambi thinda shayoyiheya, mbona kushimbi owe Zerubabel ghomwana Shealtiel eshi mupikange nombona kutendi yira kadeya yoyishi nakutororire, agha ne medhero ghaFumu Nyambi shathinda yoyiheya.