¹ Yighamba yamuyaghuri, mwana David ghofumu waJerusalem. ² "Yapira mudyo, yapira mudyo, dyoghana kughamba Muyaghuri; yokupira mudyo ne yapira mudyo vene." ³ Yinu munye shogha wanemo munu muyiruwana eyi ghana kuruwana mwishi dho diyuwa?" ⁴ Ghuye ghumweya ne wapita noghuye ghumweya ne ghuna kwiya ene kaye kakarerera po. ⁵ Diyuwa karo ne dina kuva nodina katokera, nokutambukerera dihuke oku dina vera. ⁶ Mupepo ghuna kupungera kuGhucuma nokukukudhinga ghutambe kuMbunda, tukundu-kundu ne kehe pano tuna kuyenda nokahuka mundhira dhato. ⁷ Marware ghomaheya ne ghatamba kudikuruviya ene dikuruviya ne mbadi dyayara; Kumango oku ghashwayerera agha marware, kodiyo karo ghahuka. ⁸ Yinu yoyiheya ne yayara yiruwana; noyofotji temba ghokukona ghayi pathurure. Diho ne mbadi dina kwikuta kumona endi ditwi eshi diyare eyi dina kuyuva. ⁹ Eyi yakarirepo ne yodiyo mboyi kakarapo karo, eyi haruwanine ne yodiyo karo mboha tenda nombadiko thothipya muno mukaye. ¹⁰ Poyidi pamweya yokukona tughambe eshi, "Mone eyi ne yipya ndi?" Yakarire ko thiku dhina kapita, kughutho ghokeyapo twe. ¹¹ Mbadiko mavurukero ghoyinu eyi yakapita, nombadiko karo mavurukero ghoyinu eyi mboyiya, kwawa mboha keya mo. ¹² Ame muyaghuri ne nakarire nofumu wa-Esreali muJerusalem. ¹³ Naturire mutjima wange mukufukunya paghunyanyami kuhatera yoyiheya haruwana muno mukaye; mutwaro ghu ghatapa Nyambi kwawanu thikare thiruwana thagho. ¹⁴ Namona yiruwana yoyiheya eyi hana kuruwana mukaye; yaghushemwa, ayo ne mbadiko mudyo noyira wakutjidha mupepo. ¹⁵ Eyi hapeta-petitha ne mbadi wakukona kuyighorora no-eyi yayongara ne mbadi wakukona kuyitara! ¹⁶ Naghambire nomutjima wange, ghuninga eshi; Mone, nawana yoyingi nonawana ghunyanyami kupiterera awa hakariremo kughutho wange muJerusalem. Mutjima wange watjwathanine ghunyanyami ghushokuru noghudimuki." ¹⁷ No naturire mutjima wange ghutjwathane ghunyanyami, ghupuku noghuyero. Natjwathanine eshi eyi ne yira wakukondjera ghutjidhe mupepo. ¹⁸ Wingi ghunyanyami ne kureta wingi yitokota nokeheyu ghokuwedherera ghudimuki wendi ne kuwedherera tokotoko.