3 ¹ Kòmela anzelu ya Eklezya ya Sarde ’tè oyo azali na milimo sambo ya Nzambe pe minzoto sambo alobi boye: «Nayebi misala na yo: balobaka ’tè ozali na bomoi, nzokande osi’okufáa. ² Kengela pe lendisa oyo etikali, oyo elingi kokufa: pamba té namoni té ’tè misala na yo ekoki na miso ya Nzambe na ngai. ³ Bongo kanisa ndenge oyambaki pe oyokaki; batela yango pe bongola motema. Soki okengeli té, nakoya lokola moyibi, pe okoyeba té soki na tango nini nakobimela yob. ⁴ Kasi na Sarde, ozali na mwa-ndambo ya bato oyo babebisi bilamba na bango té. Bakotambola elongo na ngai, na bilamba ya pembec, po bazali bato balongobani. ⁵ Molongi akolata bongo bilamba ya pembe, pe nakolongola kombo na ye na buku ya bomoi té; pe nakondima ye na miso ya Tata na ngai pe na miso ya ba-anzelu na yed. ⁶ Moto oyo azali na matoi, áyoka oyo Molimo alobi na ba-Eklezyae.» Mokanda na Eklezya ya Filadelfia ⁷ Kòmela anzelu ya Eklezya ya Filadelfia ’tè Mosantu, Oyo ya Solo, oyo asimbi fungola ya David, oyo afungolaka pe moto moko té akokanga, oyo akangaka pe moto moko té afungolakaf, alobi boye: ⁸ «Nayebi misala na yog. Tala, natie ekuke efungwamá liboso na yo, oyo moto moko té akoki kokanga, po ozali na nguya moke, otosi maloba na ngai, pe owangani kombo na ngai té. ⁹ Tala, napesi yo bato ya sinagoga ya Satana, baoyo balobaka bango moko ’tè bazali Bayuda, nzokande bazali Bayuda té, kasi bakosaka. Tala, nakosala ’tè báya kofukama na makolo na yo pe báyeba ’tè ngai nalingaka yoh. ¹⁰ Lokola obatelaki maloba na ngai ya molende, ngai pe nakobatela yoi na tango ya komekama oyo elingi koyeela mokili mobimba po na komeka bato ya mokili. ¹¹ Nazali koya noki. Simba oyo ozali na yangoj, po moto moko té ábotola yo motole na yo. ¹² Molongi, nakokómisa ye likonzi na kati ya ndako mosantu ya Nzambe na ngai. Akoki kobima libanda lisusu té, pe nakokòma, likolo na ye, kombo ya Nzambe na ngai, pe kombo ya engumba ya Nzambe na ngai, Yeruzalem ya sika, oyo ezali kokita uta na likolok epai ya Nzambe, pe kombo na ngai ya sika. ¹³ Moto oyo azali na matoi, áyoka oyo Molimo alobi na ba-Eklezyal.» ¹⁴ Kòmela anzelu ya Eklezya ya Laodisé ’tè Amen, Motatoli ya sembo pe ya solo, Ebandeli ya bokeli ya Nzambem, alobi boye: ¹⁵ «Nayebi misala na yon: ozali pio té, móto pe té. Nalingaki ózala pio to móto! ¹⁶ Bongo, lokola ozali mwa-móto moke, kasi móto té, pio pe té, nalingi kosanza yo na monoko na ngai. ¹⁷ Po ozali koloba: nazali moto ya bomengo, natondá na mosolo, nazali na bosengá ya eloko té; nzokande oyebi té ’tè ozali moto ya pasi pe ya mawa, mobola, okufá miso, pe ozali bolumbu. ¹⁸ Napesi yo toli ósomba wolo epetolamá na móto epai na ngai po ótonda na bomengo; pe bilamba ya pembe po ólata bongo soni ya bolumbu na yo émonana té; ná pe kisi ya kotia na miso po ómona. ¹⁹ Ngai, baoyo nyonso nalingaka, napamelaka pe nateyaka bangoo. Bongo, zala na molende makasi pe bongola motema. ²⁰ Tala, natelemi na ekuke pe nazali kobeta. Soki moto ayoki mongongo na ngai pe afungoli ekuke, [boye] nakokota epai na ye pe nakolia limpati esika moko ná ye, pe ye esika moko ná ngai. ²¹ Molongi, nakopesa ye nzela ya kofanda ná ngai na ngwende na ngai, ndenge ngai pe nalongi pe nafandi ná Tata na ngai na ngwende na ye. ²² Moto oyo azali na matoi, áyoka oyo Molimo alobi na ba-Eklezya.»