15 ¹ Pe namoni elembo mosusu ya monene pe ya kokamwa na likolo: ba-anzelu samboa basimbi bapasi ya suka sambo, po na nzela na yango, kongala ya Nzambe ekokokisama. ² Pe namoni lokola mbu moko ya talatalab esanganá ná móto. Baoyo balongi Nyama, elili na yango, pe motango ya kombo na yango, batelemi na mbu yango ya talatala, basimbi banzenze ya Nzambe. ³ Bazali koyemba nzembo ya Moizec, mosali ya Nzambe, pe nzembo ya Mwana-mpate: Misala na yo ezali minene pe ya kokamwa, Mokonzi Nzambe ya nguya nyonso! Banzela na yo ezali sembo pe solo, Mokonzi ya bikolo! ⁴ Mokonzi, nani ábanga yo té, pe ákumisa kombo na yo té? Po se yo moko ozali mosantu; bikolo nyonso ekoya kokumbamela yo po bikateli na yo ya sembo emonanid. ⁵ Sima na yango, namoni: ndako mosantu, éma ya litatoli efungwami na likolo, ⁶ pe ba-anzelu sambo oyo basimbi bapasi sambo babimi na ndako mosantu; balati bilamba ya talo penza, ezali kongenga, pe balati mikaba ya wolo na tolo. ⁷ Moko ya ba-bomoi minei apesi ba-anzelu sambo nkeni ya wolo sambo etondi na kongala ya Nzambe oyo azali na bomoi po na seko na seko. ⁸ Ndako mosantu etondi na milinga euti na nkembo ya Nzambe pe na nguya na ye; pe moto moko té akoki kokota na ndako mosantu, tii tango bapasi sambo ya ba-anzelu sambo ekokoka.