¹ Imweyi Agalatiya malombe, mbani adakulodzani, imwepo, Mudawonesewa Yesu Kristu padecha patsogolo pamaso yanu akakhomelelewa pantanda . ² Chimwechi ndicho chokha chinthu chandikufuna kufunda kuchoka kunaimwepo; mudapasiwa Muzimu waMulungu thangwe lakuti mudayita bzvinifuniwa namuthetho, kana thangwe lakuti mudakhulupilila pamudabva mafala yabwino? ³ Munikhala tanii nalombe yatenepa? mudayamba naMmzimu wa Mulungu; ko tsapano mwaakufuna kumalizila muli mumphamvu zanu mwekha? ⁴ Ko bzvense ibzvi bzvidayitika kwaimwepo bzvidayitikila fovolo? ⁵ Nakutenepo uyo anikupasani muzimu waMulungu nakuyita mabasa yamabzvidabwiso pakati panu, nithangwe lakuti imwepo muniyita bzvinifuniwa namuthetho, kana kuti munibva mafala yabwino pomwe nakuyakhulupilila? ⁶ Ninga manembo yanilewa nabzva Abrahamu kuti ,''Iye adakhulupilila Mulungu ,tenepo mulungu adamuwona kuti mwakulungama thangwe lakukhulupilila kwake,'' ⁷ Tsapano imwepo munifunika kudziwa kuti bzvikulu chaibzvo bzva Abrahamu . ndiwo wanthu amwewo anikhulupilila. ⁸ Manembo yadalewa kale kuti Mulungu anizalungamisa wanthu asili wachijudha kuchokela muchikhulupililo . Ndiye manembo yadalewa padzulu pamafala yabwino kuna Abrahamu kuti ,'' Kuchokela mwaimwepo mulungu anizadalitsa wanthu wamadzinza yense.'' ⁹ Abrahamu adakhulupilila ndiye adadalitsiwa; tenepo wense awo anikhulupilila adadalitsiwa ninga kudalitsiwa kwaadayitiwa iye. ¹⁰ Wense anipelela pamuthetho waMozisi alipakutukwaniwa na Mulungu .Pakuti manembo yaniti, ''Adatukwaniwa ndiye umweyo asingateyezele bzvense bzvidanembewa mubuku lamuthetho!'' ¹¹ Tsapano bzvilipadecha kuti palibe munthu mubodzi chaiye anilungamisiwa naMulungu thangwe lakuteyeza muthetho,pakuti manembo yanilewa kuti,'' munthu ule anilungamisiwa pamaso pamulungu thangwe lachikhulupililo, anizakhala namoyo'' ¹² Koma muthetho ulibe basa nakukhulupilila, zhayi manembo yanilewa kuti, ''munthu umweyo aniteyezela bzvense bzvinifuniwa namunthetho anikhala namoyo''. ¹³ Kristu adatipulumusa kuchoka mukutukwaniwa naMulungu munjila yakukhala iye nyakutukwaniwa pambuto pathu .Pakuti manembo yanilewa kuti ,''Munthu wense anikhomelewa pamtanda adatukwaniwa.'' ¹⁴ Kristu adayita bzvimwebzvi kuti dalitso ilo mulungu adawuza Abrahamu kuti anizamupasa, lipasiwe kuwanthu asili achijuda kuchokela muna Kristu Yesu , kuti kuchokela muchikhulupililo titambile Muzimu waMulungu uwo Mulungu adatiwuza kuti anizatipasa. ¹⁵ Abale wangu, ndilikufuna kukupasani miyenzaniso iniyitika nsiku na nsiku; Wanthu awili akabvumilana ndiye akanembelana chibvumilano padzulu pachinthu chimwecho, palibe munthu angakwanise kupfudza kana kuthimizila chinango chinthu padzulu pachibvumilano chimwecho. ¹⁶ Tsapano Mulungu adayita bzvaadalewa kuti anizayita kuna Abrahamu nakunzukulu wake. Manembo yanilewa lini kuti; ''Bzvizukulu'' ninga kuti akulewa wanthu azinji, koma kuti ''chizukulu'' kulewa kuti nimubodzi yekha,Dzina lake, Kristu. ¹⁷ Bzvandilikulewa nibzvakuti mulungu adayita chipangano na Abrahamu ndiye adamuuza kuti iye anizachiyita. mthetho,ule udazabwela patopita bzvaka mazana manayi yana makumi matatu ungapfudze lini chipangano chimwechi nakuchosa ibzvo Mulungu adalewa kuti anisayita. Kana Mulungu achipasa wanthu dalitso thangwe lakuti munthuyo aniyita bzvinifuniwa namuthetho, ndiye bzvinilewa kuti dalitsolo lini pasiwalini thangwe lachipangano. ¹⁸ Koma mulungu adapasa Abrahamu madalitso thangwe labzvinthu bzvaadalewa iye kuna Abrahamu kuti anizayita. ¹⁹ Ko basa lamuthetho likhali lanyi tsono? muthetho udathimiziliwa kuti utiwonese kuti kutaza ndikuponi. ndiye udakhalapo kufikila chizukulu cha Abrahamu chabwela; kuna ule Mulungu akhadalewa kale kuti anizabwela. Ngelo ndiwo adabwela pansi kuzatambiza muthetho, kuwanthu kuchoka muna mbodzi yekha, nyakumililila pakati, ule Mozisi. ²⁰ , Koma pakakhala munthu bodzi yekha, nyakumililila pakati alibe basa pakuti Mulungu nimubodzi basi. ²¹ Ko bzinilewa kuti muntheto ipikisana nabzintu bzidalewewa naMulungu kuti azachita ? Nee ndibzvo lini kana napan'ono pokha! pakuti kana wanthu adatambila munthetho uwo unikwanisa kuwapasa umoyo, ndiye wanthu wense aniyita bzinifuniwa namunthetho anikwanisa kulungamisiwa pamaso paMulungu. ²² Koma manembo yanilewa kuti munthu wense padziko lapansi lino alipansi pamphamvu yachakuyipa, ndiye chipo chidalewedwa na Mulungu kuti anizapasa kuchokela muchikhulupililo muna Yesu Kristu, chinizapasiwa kuwanthu anikhululupila. ²³ Koma chikhululupilo chinati chafika ,munthetho ukhali udatifunga tense ninga anyakumangiwa kufikila chikhululupililo chimwechi chilikuzabwela chawonesewa. ²⁴ Nakutenepo ife tikhali pansi pautongi wamunthetho kufikila kristu wabwela kuti ifepo tilungamisiwe pamaso paMulungu kuchokela muchikhulupilo. ²⁵ Tsapano pakuti nthawe yachikhulupililo yafika , utongi wamunthetho uchatitonga lini. ²⁶ Mwense ndimwe wana waMulungu thangwe lakuti munikhulupilili muna kristu Yesu. ²⁷ Imwepo mudawonambekewa kukhala wakuphatana na na Kristu ,ndiye tsapano mwabvala Kritsu pachake ngati chakubvala. ²⁸ Tenepo pachalibe bzvidasiyana pakati paAjudha nawanthu asili alanda, pakati paamuna naakazi; mwense ndimwe abodzi mukuphatana naKristu yesu. ²⁹ Kana muli wanthu wake Kristu, tsapano ndimwe bzvizukulu bzva Abrahamu, pomwe munizatambila bzvile bzvidalewedwa naMulungu kuti anizakupasani.