¹ Maawe kuchisi chankazi! Chisi chabukali chawumuzigwa. ² Techaswilila pe kujwi lya Leza, nikuba kutambula kubambululwa kuzwa kuli Jehova. Tasyomi pe muli Jehova alimwi takoyinka pe kuli Leza wakwe. ³ Bana bakwe babwami balombe bababalavu bavuluma mukati kakwe. Babetesi bakwe baba bawumpe bamansiku batasiyi chintu chizokukunywa bwacha. ⁴ Basinsimi bakwe mbaalumi bakali alimwi mbasampawusi chijazya. Bapayizi bakwe bakapindila chisalala alimwi bachita lupyopyongano kumulawu. ⁵ Jehova uliluleme muli nguwe. Takonzyi kuchita chibi chifumo achifumo uyo yanzabula lubeta lwakwe! Tachikoyosiswa pe mumumuni, anukuti basyambisya tabazi kuba amawuse. ⁶ ''Ndajaya zisi, ziyako zyabo lyaba tongo. Migwagwa yabo ndayichita tongo, kuchitila kuti kutabi muntu uyinda mumo. Madolopo aabo amwayigwa kuchitila kuti kutabi muntu ukkala mumo. ⁷ Ndakati, ÍNchoonzyo muyondiyoowa. Amuzumine kuzyotololwa alimwi tamukaanzanisigwi amyuunzi yenu azezyo nzindabamba kuchita kuli ndinywe.' Pesi bakali aabusungu bwakutalika chifumo chimwi achimwi akubbiningizya nchito zyabo zyoonse. ⁸ Nkinkaako amundilinde - eechi nchaambilizyo cha Jehova-mane do kubuzuba mbundiyobuka akujata sizibi. Mbukunga muzezo wangu ngwakuswanizya manyika, kubungania bwami, kutila bukali bwangu aalimbabo-boonse bukali bwangu bupya mulilo; nkambo mumulilo wabbivwe lyangu yoonse nyika iyomenwa. ⁹ Pesi aawo ndiyosalazya milomo yabantu, kuti boonse akonzye kwiitilila muzina lya Jehova kuti limuvune kukkuko akkuko. ¹⁰ Kuzwa kusule lyamulonga kuchibandikomba - bantu bangu bamwayikene - bayoyeeta zipo zindeelede. ¹¹ Muli eelyo izuba tokoyobikwa mumawuse pe aatala anchito zyako ezyo nzimwakandikaka azyo, mbuli kuli muleecho chiindi ndinooli nkegwisya mukati kenu aabo bakali nkabayiizya mukuliyanda kwakoalimwi nkambo tochinochiti zyankazi achilundu changu chisalala. ¹² Pesi ndiyosiya mukati kenu bantu balaansi bachete, alimwi bayoojana bukkale muzina lya Jehova. ¹³ Lunyungu lwa Izilayeli taluchinotyoli mulawu nikuba kwambuula manwa, alimwi takwe lulimi lwakweneena lutakajanike mumilomo yabo; nkokuti ziyochela akulala ansi, alimwi takwepe muntu utakazikonzye.'' ¹⁴ Yimba, omwana musimbi wa Ziyoni! Wompolola Izilayeli. Botelwa alimwi unoneezye amoyo wako woonse, yomwana musimbi wa Jelusalemu. ¹⁵ Jehova wagwisya chisubulo chako; watanda basinkondonyokwe! Jehova ngumwami wa Izilayeli aakati kenu. Tokoyoyoowa lubo chibi! ¹⁶ Muli oobo buzuba bayowambila Jelusalemu kuti, ''Utayoowi, Ziyoni. Utalekeli maboko aako kuti abule nguzu. ¹⁷ Jehova Leza wako uli mukati kenu, mupati loko wakamufutula. Uyopakala aatala anduwe muluyando; uyoba mumunizi atala anduwe muluyando lwakwe; uyobotelwa aatala anduwe alompololo lwalukondo. ¹⁸ Ndiyobungania aabo balila, aabo batakonzyi kwinka kupobwe lyaambwa, nkokuti tokoyooba abweeme anchicho. ¹⁹ Boona, ndaamba kulwana aabo boonse bakudyamiizya. Muli eecho chindi, ndiyofutula muima akubungania idombe. Ndiyobachita mbuki chilumbayizyo, alimwi ndiyosandula bweeme bwabo bukabe kuzibinkana munyika yoonse. ²⁰ Muli echochiindi ndiyokuzulwida; muleecho chindi ndiyomubungania aantomwe. Ndiyomupa kuzibinkana andumbayizyo mukkati kabantu boonse benyika aawo ndaakuboozya lubono lwenu loonse kumenso eenu,'' mbwawaamba Jehova.