¹ Elyi ndijwi lya Jehova lyakasika kuli Zefaniya mwana mulombe wa Amatiya imwana mulombe wa Hezekkiya, mumazuba a Josiya mwana mulombe wa Aamoni, mwami waku Juda. ² ''Ndiyomaninizya kumwaya zyoonse kuzwa kubuyale bwanyika-eechi nchaambilizyo cha Jehova. ³ Ndiyojaya bantu abanyama; Ndiyojaya bayuni bakujulu abaswi bamulwizi, matongo antomwe abasizibi. Nakmbo ndiyogonka bantu kuzwa aanyika - eechi nchaambilizyo cha Jehova. ⁴ Ndiyosikila akuboko kwangu ku Juda aboonse bakkala mu Jelusalemu. Ndiyogonka akugwisya loonse lunyungu lwa Satani mubusena oobu amazina woonse aabantu bakkomba zibumbwa mukkati kabapayizi, ⁵ bantu bangu bakkomba mibili yakujulu aatala amaanda, abantu bakkomba akukonka kuli Jehova pesi alimwi kabakonka amwami wabo. ⁶ Ndiyogonka alimwi abo bakaleka kutobela Jehova, aabo bata chiyaanduli Jehova kana kukumbila bululamiki bwakwe.'' ⁷ Wumuna kunembo lya Mwami Jehova! Nkambo izuba lya Jehova lyaba aafwifwi; Jehova wabamba chipayizyo alimwi wasala beenzu bakwe. ⁸ ''Chiyoochitika mubuzuba bwa chipayililo cha Jehova, kuti ndiyopa chisubulo kubana bamwami basimbi abalombe, amuntu woonse usamine ngubo zyakulaambi manyika. ⁹ Oobo buzuba ndiyoopa chisubulo boonse bataluuka luwa, aabo bazuzya ng'anda ya simalelo wabo alupyopyongano alweeno. ¹⁰ Nkinkaako chiyooba mulelyo izuba - eechi nchaambilizyo cha Jehova - kuti kukwiila kwakupengaana kuyozwa mumulyango wamufwi, kulyeema kuzwa kuchilikiti chabili, alimwi muzuzumo wakuwa mupati kuzilundu. ¹¹ Mukwile, nimukkala muchilikiti chabusamabazi, nkambo boonse bantu baku Kkenani bayomana; boonse aabo beela nsiliva bayogonkwa. ¹² Ziyochitika muchiindi echo ndakuyanduula Jelusalema amalampi akupa chisubulo bantu bakakkala mumichelo yabo akwaamba kuti mumyooyo yabo, ''Takwe nzyatachite pe Jehova, nikuba chibotu kana chibi.' ¹³ Buvubi bwabo buyooba lusuko, alimwi maanda aabo ayooba lunyonyooko lutakatidwe! Bayoyaaka maanda pesi tabakoyowakkala pe, akubwaala michelo yawayini pesi tabakoyonywa wayini yayo. ¹⁴ Buzuba bwa Jehova bupati bwaba afwifwi, afwifwi akufwidilika kufwambana! Muzumo wazuba lya Jehova uyooba walumamba lulila chakulyeema! ¹⁵ Oobo buzuba buyoba vwakunyema, buzuba bwakutyompwa amachise, buzuba bwaluuwo alunyonyoono, buzuba bwamudima akumweeka, buzuba bwamayoba amudima uunikide. ¹⁶ Buyooba buzuba bwamyeembo atuwuulo twanchenjezyo kumadolopo akwabilidwe azilwanino zyamujulu. ¹⁷ Nkambo njoyeta kutyompwa kubantu, kuchitila kuti bakuumpulike kukwenda mbuli muntu utakuboni mbuli kuti babisizya Jehova. Ganzi lyabo liyotilwa mbuli lusuko, azizo zyabo zyamukkati mbuli mafumba. ¹⁸ Taakwe niba nsiliva yabo kana ngolida itakakonzye kubafutula mubuzuba bwabukkali bwa Jehova. Mumulilo wabbivwe lyakwe nyika yoonse iyoligwa, nkambo uyoyeta chimaninide, magolelo aayoosya aabantu boonse bakkala munyika.