¹ Mpawo ndakaboola kuzotambya menso aangu, alimwi ndakabona, ibbuku liyabuuluka! ² Mungelo wakandaambila kuti, ''Niinzi nchobwene?'' Ndakasandula, ''Ndibwene ibbuku liyabuuluka, tukkokola makkumi obile bulamfu atukkokola kkumi bubanzi.'' ³ Mpawo wakandaambila kuti, ''Ezi nzyentuko zimwayikide atala lyanyika yoonse. Nkambo woonse mubbi uyonyonyooka mbuli mbukaamba kuli limwibbazu, alimwi woonse ooyo ukonka chikonke chakubeja uyonyonyooka mbuli kaamba kulilimwi bbazu. ⁴ ''Njolugwisya -- aya ngimalayilile a Jehova wamakamu -- Aboobo liyonjila mung'anda yamubbi aamung'anda yayooyo ukonka chakubeja azina lyangu. Liyokkalilila mung'anda yakwe alimwi liyosyukuta masamu aamabwe ayo.'' ⁵ Mpawo mungelo wakali kwambula andime wakabbuda anze alimwi wakandaambila kuti, ''Tambya menso aako akubona eecho chizabuza!'' ⁶ Ndakati, ''Nchiinzi?'' Wakati, ''Eechi nchisuwo chila chizwato chizabuza. Eezi nzezibi zyabo zili munyika yoonse. ⁷ Mpawo chivunisyo chakajalide chakavunuka achisuwo alimwi kwakali mwanakazi munsi lyacho wakakkede mulinchicho! ⁸ Mungelo wakati, ''Obu mbobubi!'' Wakamuwaala lubo mukkati kalusuwo, aakuwaala chivunisyo atala lyamulyango. ⁹ Ndakatambya menso angu alimwi ndakabona banakazi bobile bayobuza kunembo lyangu, aaluuwo lwakali mumabaaba aabo -- nkambo bakala mababa mbuli mababa aa toongo. Bakanyampula lusuwo akkati kanyika aa julu. ¹⁰ Aboobo ndakati ku mungelo wakali kwaambula andime, ''Nkokuli nkubayobutola chisuwo?'' ¹¹ Wakati kuli ndime, ''Kukuyoyaka chikombelo munyika ya Syina chayo, kuchitila kuti naa chikombelo chamana, bayotuula chisuwo mpoonya awo atako lyacho.''