¹ Mumwezi wamusanu ayitatu mumunyaka wabili wabwendelezi bwa Daliyasi, ijwi lya Jehova lyakasika kuli Zekkaliya mwana mulombe wa Bbelekkiya mwana mulombe wa Ayido, musinsimi, kaliti, ² ''Jehova wakali wabanyemena loko bamawuso! ³ Baambile kuti, 'Jehova wamakamu waamba obu: Amubole kuli ndime! -- oku nkwaambula kwa Jehova wamakamu -- alimwi njoboola kulindinywe, mbwawamba Jehova wamakamu. ⁴ Kamutabi mbuli bamawuso banu abo basinsimi mbibaka kwilila kuchindi chakayinda, kabati, ''Jehova wamakamu waamba obu: Amupiluke kuzwa kunzila zyenu zyabubi akuzichito zyenu zibi!'' Pesi teensi bakamvwa alimwi takwe nibakandiswilizya -- oku nkwaambula kwa Jehova.' ⁵ Bamawuso -- balikuli? Alimwi basinsimi -- tabaponi na kwalyoonse? ⁶ Pesi majwi angu amalayilile aangu ayo ngindakalayilila balanda abasinsimi bangu, tensi ngaawo na akeenzya bamawuso? Abobo bakasanduka akwaamba kuti, 'Mbuli Jehova wamakamu mbwatukanzila kutuchitila mbuli nzila yesu anchito mbuzipandulula, aboobo wakalangana aswebo.''' ⁷ Mubuzuba bwamakkumi obile aane bwamwezi wakkumi akamwi, wamweezi wa Syebbati, mumunyaka wabili, wabwendelezi bwa Daliyasi, Ijwi lya Jehova lyakasika kuli Zekkaliya mwana mulombe wa Bbelekkiya mwana mulombe wa Ayido, musinsimi, kaliti, ⁸ ''Ndakabona mansiku, alimwi, langa! Muntu wakatantide mbizi iisalala, alimwi wakali akkati kamisamu matili eyo yakali mumupata; amusule lyakwe kwakali zyakali kusalala, azisalalasalala mbuli musinza wenyangu ambizi zituba.'' ⁹ Ndakati, ''Nzinyamanzi ezi zintu, Mwami?'' Elyo mungelo wakaambula andime wakati kuli ndime, ''Ndiyokutondezya kuti nzintu ezi nzinyamanzi.'' ¹⁰ Elyo muntu wakiimvwi akkati kamisamu yamatili wakasandula akuti, ''Ezi nzezyo Jehova nzyakatuma kuyabulingula nyika yoonse.'' ¹¹ Bakasandula mungelo wa Jehova oyo uyimvwi akkai kamisamu yamatili; bakati kuli nguwe, ''Twalikuyabulingula nyika yoonse; mubone, nyika yoonse yakkala chakukkalilila akutontoola.'' ¹² Elyo mungelo wa Jehova wakasandula akuti, ''Jehova wamakamu, nchiindi chilamfu biyeni nchotakakkake kubafwida luzyalo ba Jelusalemu amyunzi yaba Juda, eyo njwakabanyemena kwaminyaka makkumi musanu amakkumi obile?'' ¹³ Jehova wakasandula mungelo oyo wakambwiide andime, amajwi mabotu, majwi akukombelezya. ¹⁴ Aboobo mungelo oyo wakaambwide andime wakandaambila kuti, ''Wongolola akuti, 'Jehova wamakamu waamba obu: Ndaba abuzuba a Jelusalemu a Ziyoni abuzuba bupati loko! ¹⁵ Ndinyemede loko amaasi akkede chakulyiiba. Kuchiindi nchindaka banyemenede bunini, bakiindilila kubisya kwabo. ¹⁶ Nkambo kaako Jehova wamakamu waamba obu: Ndaboola ku Jelusalemu chaluzyalo. Ng'anda yangu ilayakwa mumo -- oku nkwaambula kwa Jehova wamakamu -- antambo yakweelesya iyotandabikwa alinguwe Jelusalemu!' ¹⁷ Alubo woongolola, akuti, 'Jehova wamakamu waamba obu: Myuunzi yangu iyozuzigwa lubo abubotu, alimwi Jehova uyowumbulizya lubo Ziyoni, alimwi uyosalwa lubo Jelusalemu.''' ¹⁸ Elyo ndakanyampula menso angu ndakabona meja oone! ¹⁹ Ndakaambula amungelo wakambwide ambebo, ''Nzinyamanzi ezi?'' Wakandisandula, ''Aya meja ayo akamwayisizye Juda, Izilayeli, a Jelusalemu.'' ²⁰ Elyo Jehova wakanditondezya bafuzi boone. ²¹ Ndakati, ''Bantu aaba baza kukuchitanzi?'' Wakandisandula, akwamba kuti, ''Aya meja akamwayisizye Juda kuchitila kuti takwe muntu unyampula mutwe wakwe. Pesi bafuzi beza kuzobayosya, kuzotambisya meja azisi akusumpula lwija kulwisya nyika yaba Juda akwimwayisya.''