Kumwami wabasikwimba; lwabikwa ku Alu Tasyeti. Intembawuzyo ya Devidi. Lwiimbo; kuchindi Sawulo nakatuma, akulindila ng'anda kuti bamujaye. ¹ Undivune kuli basinkondoma, Leza wangu; undibike atala kule kuzwa kuli baabo bandibusizya nkondo. ² Ndibamba kabotu kuzwa kuli babelekela bubi, alimwi undivune kuzwa kuli basikulya bulowa. ³ Nkambo, bona, bandilindila chakuyubilila kulwisya buumi bwangu. Balumi basinguzu balibunga lwabo beni antomwe kuti bandilwane, pesi tensi nkambo kamilandu yangu na zibi zyangu, Jehova. ⁴ Balabambilila kuchijana kuli ndime nikuba nkesikwe mulandu; buka alimwi undigwasye akubona. ⁵ Webo, Jehova Leza wamakamu, Leza wa Izilayeli, bakua alimwi usubule zyoonse zisi; utabi noyetelela naba omwe ukanza bubi. Selah ⁶ Balaboola kumabbililo azuba bawuula mbuli babwa akuzyunguluka munzi. ⁷ Bona, balatuntumuka amilomo yabo; mapanga alimumilomo yabo, nkambo baamba kuti, ''Ngwani utumvwa?'' ⁸ Pesi webo, Jehova, waba seka; ulayimika zisi zyoonse chakuzisumpula. ⁹ Leza, nguzu zyangu, Ndiyoswilizya nduwe; uling'anda yangu ndamfu. ¹⁰ Leza wangu ulandiswanizya achizuminano chabusyomesi; Leza ulandichita kuti mbone nzelaka kuli basinkondoma. ¹¹ Utabajayi nanka bantu bangu baluba. Bamwaye amanguzu aako akubachita balebwe, Mwami nontobo yesu. ¹² Nkambo kazibi zyamilomo yabo amumilomo yabo, bachite baangwe mukulisumpula kwabo, akambo kalutuko amabejo ngebachita. ¹³ Banyonyoone chabukali, banyonyoone kuchitila kuti batabiwo alimbi; bachite bazibe kuti Leza uyendelezya Jakkobbu akumagolelo enyika. ¹⁴ Kumabbililo ezuba balaboola, kabawuula mbuli babwa bayobwenda chakuzyunguluka munzi. ¹⁵ Balazumba akuyobulanguula kulya alimwi balavuluma mbuli babwa na tebakuta. ¹⁶ Pesi njoyimba anguzu zyako, alimwi chifumo njoimba atala aluse lwako lwaluyando! Nkambo uling'anda yangu ndamfu alimwi uli machijilo angu mumazuba amapenzi. ¹⁷ Kuli nduwe, anguzu zyangu, Njoyimba ntembawuzyo; nkambo Leza ning'anda yangu ndamfu, Leza wachizuminano chabusyomesi.