Yamumupati wabayimbi; iibambilidwe kuli Alu Tasyiheti. Intembawuzyo yaDevidi. Lwiimbo; aawo naakachija kuzwa kuliSoolu, mupako lyebbwe. ¹ Kondifwida luse, Leza, kondifwida luse, nkaambo ndiyuba mulinduwe kusika mane mapenzi aaya woonse ayinda. Ndikkala munsi lyamababa ako kuti ndikwabililwe kusika lunyonyooko oolu lwayinda. ² Ndiyoolilila kuli Leza Uusumpukide kapati, kuli Leza, uundichitila zintu zyoonse. ³ Uyootuma lugwasyo kuzwa kujulu akundifutula, ulibanyemenede aabo bandisyatilila aansi. Sela Leza uyootuma kulindime luyando lwakwe abusyomesi bwakwe butazungaanisigwi. ⁴ Buumi bwangu buli aakati kabalavu; ndili aakati kabaabo balibambilide kundilya. Ndili aakati kabantu aabo bali aameno aali masumu atunta, bali aandimi zili mbuli mapanga aabosya. ⁵ Awukanyampulwe, Leza, aajulu lyamajulu; bulemu bwako ngabukabe aatala aanyika yoonse. ⁶ Bayala kansabwe kumawulu angu; ndakakataazikana. Bakasya dindi kunembo lyangu. Bonya lwabo bakawida aakati kalyo! Sela ⁷ Moyo wangu ulipangikidwe, Leza, moyo wangu ulipangikidwe; ndiyooyimba, iyi, ndiyooyimba ndumbayizyo. ⁸ Buka, yoobulemu bwangu! Buka, siba alimwi ulizye! Ndiyoobuka aakanywanzovu! ⁹ Ndiyoopa kulumba kulinduwe, Mwami, akaati kabantu; ndiyooyimba ndumbayizyo akaati kamasi. ¹⁰ Nkaambo ndupati luyando lwako luyagoli, lusika kumajulu; abusyomesi bwako kumayoba. ¹¹ Kasumpulwe, Leza, aajulu lyamajulu; bulemu bwako bukanyampulwe aajulu lyanyika yoonse.