Kumuyimbi mupati silutwe; kuzilizyo zili aatukkole. Intembawuzyo yaDevidi. ¹ Komvwa kunkombyo yangu, Leza; utalisisi kulukombelezyo lwangu. ² Kandiswiilile alimwi ukandisandule; nsikwe kulyookezya pe mumapenzi angu ³ akaambo kajwi lyabasinkondoma, akaambo kakudyaamizigwa kwabasizibi; nkaambo baleeta kupenzegwa aalindime akundisyonsya mubunyeme. ⁴ Moyo wangu ulakankama mulindime, aluyoosyo lwalufu lwawida aalindime. ⁵ Buyoofu akukankamazyaza aalindime, alimwi kuyoosegwa kwandivulisya aalindime. ⁶ Ndakati, "O, luzutu na ndali aamababa mbuli nziba! Ndalikuuluka akuyoolyookezya. ⁷ Bona, ndalikwiinka kule; ndalikuyookkala muchimpayuma. Sela ⁸ Ndalikuyoofwambaanina kuya kuchiyubilo kuzwa kumuuwo mupati abukali.'' ⁹ Bamene, Mwami, vwelengania mulaka wabo! Nkaambo ndabona bukali alupyopyongano mugunzi. ¹⁰ Sikati amansiku baliinka kubulambo bwalyo; bubi amapenzi zili aakati kalyo. ¹¹ Bubi buli aakati kalyo; kusyonsegwa alweeno tazizwi mumigwagwa yazyo. ¹² Nkaambo tensi sinkondoma wakandikalalila, niinga ndakazitambula; nikuba ooyo wakalikundisula wakabuka kulwanisya ndime, ndalikukonzya kuyuba kuzwa kulinguwe. ¹³ Pesi kwakali nduwe, muntu weelene andime, musaama alimwi mwenzuma waafwiifwi. ¹⁴ Twakali aabulyidilano bunono antoomwe; twakali kunjila mung'anda yaLeza enkamu yabantu. ¹⁵ Lufu ngalusike chakufwambana aalimbabo; ngabaye kuSyiyoli kabali bawumbulu, nkaambo mububi mubakkala, aakati kabo. ¹⁶ Mbuli ndime, ndiyooyita kwaLeza, alimwi Jehova uyoondifutula. ¹⁷ Igoko, kuseni, asikati ndiyootongawuka akulila; uyoomvwa jwi lyangu. ¹⁸ Uyoowunununa buumi bwangu kabotu kuzwa kunkondo yakali kundilwanisya, nkaambo abo bakali kundilwana bakali biingi. ¹⁹ Leza, ooyo uweendelezya kwalyoonse, uyoobamvwa alimwi uyoobafwisya nsoni. Sela Tabachinchi, tabayowi Leza. ²⁰ Mwenzuma wabusya maboko akwe aatala abaabo mbaakali aaluumuno ambabo; taakalemeka pe chikonke nchaakali aacho. ²¹ Mulomo wakwe wakali bunante mbuli choonde, pesi moyo wakwe wakali aabukali; majwi akwe akalimabombe mbuli mafuta, pesi akali mapanga aanonedwe aabosya. ²² Bika mikuli yako kuliJehova, alimwi uyookubamba; takoyoozumizya lunyonyooko kuti lukagume muntu musalali. ²³ Pesi webo, Leza, uyooleta basizibi mudindi lyalunyonyooko; basikunywa bulowa abasilweeno tabakoyoowongola nikuba kusika kuchisela chakoongola kwabamwi, pesi ndiyoosyoma nduwe.