Intembawuzyo yaAsafu. ¹ Singuzu, Leza, Jehova, waambuula alimwi wayita nyika kuzwa kumazwido eezuba kusika kumabbililo eelyo. ² Kuzwa muZiyoni, Leza watondeezya bubotu bwakwe. ³ Leza wesu ulasika alimwi tawumuni; mulilo uusyukuta ulayaka kunembo lyakwe, alimwi bukali bulimuzyungulukide. ⁴ Ulayita kujulu aansi kuti akonzye kubeteka bantu bakwe: ⁵ Mubunganie basyomekede bangu kulindime, aabo bakapa chipayizyo kulindime kuchita chikonke andime.'' ⁶ Majulu ayoowamba busalali bwangu, nkaambo Leza mwini mubetesi. Sela ⁷ ''Mumvwe, nobantu bangu, alimwi ndiyoowambuula; ndime Leza, Leza wenu. ⁸ Nsikyoomukalalilila mukubula zipayizyo zyenu; zipo zyenu zyakutenta zilikunembo lyangu lyoonse. ⁹ Nsikoyoobweza mupule kuzwa mumaanda enu, na bagutu bempongo kuzwa muzyaata zyenu. ¹⁰ Nkaambo munyama woonse wamulusaka nguwangu, ang'ombe aajulu aatulundu tuli chuulu. ¹¹ Ndilitwizi toonse tuyuni twamuzilundu, abanyama bamusokwe balimulusaka mbibangu. ¹² Na ndali enzala, tendalikumwaambila pe; nkaambo nyika njiyangu, azyoonse zili mulinjiyo. ¹³ Ndiyoolya nyama yabapule na, na kunywa bulowa bwempongo? ¹⁴ Mupe kuliLeza chipo chakulumba, akuzuzikizya chikonke zyenu kuli Uusumpukide Loko. ¹⁵ Mukandiite ubuzuba bwamapenzi; ndiyomuunununa alimwi muyoondilumbula.'' ¹⁶ Pesi kulibasizibi Leza waamba kuti, ''Mujisiinzi mukwaamba milawu yangu, kuti mwakabweza milawu yangu mumilomo yenu, ¹⁷ mbuli kuti mulasula lulayo alimwi mulasowa majwi angu? ¹⁸ Aawo nimubona sikubba, mulazuminana anguwe; mulagwasyania abaabo bachita bumambe. ¹⁹ Mupa milomo yenu kububi, alulimi lwenu kulweeno. ²⁰ Mulakkala akwambuula bubi aatala amukwenu; mulavwiya mukwenu wabanyoko. ²¹ Mwakachita zintu eezi, pesi ndakawumuna, aboobo mwakabonaanga ndili umwi uuli mbuli ndinywe. Pesi ndiyoomukalalila akweeta kunembo lyenu zintu zyoonse nzimwakachita. ²² Amukachilangisisye eechi, nywebo nimuluba Leza, nkaambo ndiyoomudeluula mutusyapu, alimwi takukoyooba naba womwe uutakamugwasye! ²³ Ooyo uutakape chipayizyo chakulumba ulumbayizya ndime, alimwi kuliwoyo uubamba nzila yakwe kabotu ndiyootondeezya lufutuko lwaLeza.''