¹ Mpawo bazululi bempuli zyabamawisi kumukowa wa Giledi mwana mulombe wa Makili (wakali mwana mulombe wa Manase), ooyo wakali wamukowa walunyungu lwa Jozefu, wakaza alimwi waambuula kunembo lya Mozesi alimwi kunembo lyabazululi bakali basilutwe bampuli zyabamawisi zyabantu ba Izilayeli. ² Bakati, ''Jehova wakakulayilila iwe, simalelo wesu, kupa chaabilo chanyika achisolo kubantu ba Izilayeli. Wakalayililwa a Jehova kupa chaabilo cha Zilofehadi mukwesu kubana bakwe basimbi. ³ Pesi na bana bakwe basimbi bakwatwa a baalumi bawumwi musyobo wabantu ba Izilayeli, mpawo chaabilo chabo chanyika chiyoogwisigwa kuzwa kuchaabilo chabamataata eesu. Chiyooyungizigwa ku zyaabilo zyamisyobo eeyo njibanjila mulinjiyo. Muliyeeyo nzila, chiyoogwisigwa kuzwa kuchaabilo nchibakapedwe chalukono. ⁴ Muliyeeyo nzila, eelyo munyaka wakulizya mweembo wabantu ba Izilayeli waakusika, mpawo chaabilo chabo chiyooyungizigwa kuchaabilo chamusyobo ooyo ngubanjila mulinguwo. Muliyeeyi nzila, chaabilo chabo chiyoobwezegwa kuzwa kuchaabilo chamusyobo wabamataata eesu.'' ⁵ Aboobo Mozesi wakapa malayilile kubantu ba Izilayeli, ku jwi lya Jehova. Wakati, ''Eezyo zyakaambwa kumusyobo walunyungu lwa Jozefu zililuleme. ⁶ Eezi nzizyo Jehova nzyaalayilila aatala abana basimbi ba Zilofehadi. Waamba kuti, 'Mubaleke bakwatwe kulaabo mbibayeya kuti bali kabotu, pesi beelede bakwatwe mukati kamusyobo wamukowa wawisi.' ⁷ Takwe chaabilo chabantu ba Izilayeli cheelede kuchincha kuzwa kuluzubo lumwi kuya kuli lumwi. Umwi awumwi wabantu ba Izilayeli weelede kwiinkilila kunembo a chaabilo chakwe kuzwa kuli bamataata baluzubo lwakwe. ⁸ Woonse mwanakazi wabantu ba Izilayeli ooyo uujisi chaabilo kumusyobo wakwe weelede kukwatwa amuntu uzwa kumusyobo wabamawisi. Eezi zili boobu kuchitila kuti woonse wabantu ba Izilayeli akonzye kuba alukono kuzwa kuli bamawisi bakwe. ⁹ Takwe chaabilo cheelede kuchinchwa kuzwa kuluumwi kachiya kuluumwi musyobo. Woonse muntu wamusyobo wabantu ba Izilayeli weelede kubamba lukono lwabamataata bakwe.'' ¹⁰ Aboobo bana basimbi ba Zelofehadi bakachita mbuli Jehova mbakalayililide Mozesi. ¹¹ Mala, Tiza, Hogila, Miluka, a Nowa, bana basimbi ba Zelofehadi, bakakwatana aabalunyungu lwa Manase. ¹² Bakakwatana aabamikowa yalunyungu lwa Manase mwana mulombe wa Jozefu. Muli yeyi nzila, lukono lwabo lwakakalilila muluzubo oomo kwakali kuzwa mukowa wawisi. ¹³ Aaya malayilile a milawu Jehova njakapa a Mozesi kubantu ba Izilayeli mumagezi a Mowabbu kumbali lya Jodani ku Jelikko.