¹ Jehova wakaambula kuli Mozesi alimwi wakati, ² ''Layilila bantu ba Izilayeli alimwi utedi kulimbabo, 'Eelyo mwakunjila munyika ya Kkenani, nyika eeyo iyooba yanu, nyika ya Kkenani a migaano yayo, ³ mugaano wanu wakumusanza uyoozwida munkanda ya Zini kuutobelezya mugaano wa Edomu. Magolelo aakujwe lyamugaano wakumusanza unoli aamukondo uujinka kumagolelo aakumusanza a Lwizi lwa Mwinyo. ⁴ Mugaano wenu uyonyona ku musanza kuzwa ku kalundu ka Akkilabbimi alimwi kweendelela akutobelezya munkanda ya Zini. Kuzwa aawo uyoochijaana ku musanza wa Kkadesyi Bbaniya alimwi kweendelela ku Haza Ada akunembo kusika Azimoni. ⁵ Kuzwa aawo, mugaano uyonyona kuzwa ku Azimoni kuulangide ku kalonga ka Ijipiti alimwi akukatobela kusika kulwizi. ⁶ Mugaano wa kumbo uyoba aagolela busasa bwa Lwizi Lupati. Oyu uyooba mugaano wenu wakumbo. ⁷ Mugaano wenu wa kunyika uyoyendelela kutobela mukondo ngotakabike mpa kuzwa ku Lwizi Lupati kusika ku Chilundu cha Ho, ⁸ mpawo kuzwa ku Chilundu cha Ho kusika ku Lebo Hamati, mpawo kuya ku Zedadi. ⁹ Mpawo mugaano uyoyendelela kuya ku Zipuloni alimwi ukagole ku Haza Enani. Ooyu uyooba mugaano wenu wa kunyika. ¹⁰ Mpawo muleelede kubika mpa ya mugaano wanu wa kujwe kuzwa ku Haza Enani ku musanza wa ku Syepamu. ¹¹ Mpawo mugaano wa kujwe uyookunuka kuzwa ku Syepamu kusika Libbila, kulubazu lwa kujwe lwa Ayini. Mugaano uyooyendelela kuutobelezya lubazu lwa kujwe lwa Lwizi lwa Kkinaleti. ¹² Mpawo mugaano uyooendelela ku musanza kuutobela Mulonga Jodani kusika ku Lwizi lwa Mwinyo. Eeyi iyoba nyika yanu, kutobelezya migaano yayo iizyungulukide.''' ¹³ Mpawo Mozesi wakalayilila bantu ba Izilayeli alimwi wakati, ''Eeyi njenyika njimuyotambula aakwabilwa, eeyo Jehova njakalayilila kupa ku mikowa ili musanu ayine alimwi a kuchisela cha mukowa. ¹⁴ Mukowa wa lunyungu lwa Lubbeni, kutobelezya kupegwa kwa zintu kumukowa wa basikale babo, alimwi mukowa wa lunyungu wa Gadi, kutobelezya kupegwa zintu kumukowa wa basikale babo, alimwi a chisela cha mukowa wa Manase bakatambula nyika yabo boonse. ¹⁵ Mikowa yobile a chisela cha mukowa bakatambula chaabilo chabochanyika mutala lya Jodani ku Jelikko kulanga kujwe, kuya ku buzwezuba.'' ¹⁶ Jehova wakaambula kuli Mozesi alimwi wakati, ¹⁷ ''Aya mazina abaalumi bayowandaania nyika ya lukono lwanu: Eliyeza mupayizi a Josyuwa mwana mulombe wa Nuni. ¹⁸ Weelede kusala uumwi silutwe kuzwa kumikowa yoonse kukwaandania nyika yamisyobo yabo. ¹⁹ Aaya ngemazina a baalumi: Kuzwa kumukowa wa Juda, Kkelebbu mwana mulombe wa Jefune. ²⁰ Kuzwa kumukowa walunyungu lwa Simiyoni, Syemuyeli mwana mulombe wa Amiludi. ²¹ Kuzwa kumukowa wa Bbenjamini, Elidadi mwana mulombe wa Kkisiloni. ²² Kuzwa kumukowa wa lunyungu lwa Dani muzululi, Bbukki mwana mulombe wa Jogili. ²³ Kuzwa ku lunyungu lwa Jozefu, kumukowa wa lunyungu lwa Manase muzululi, Haniyeli mwana mulombe wa Efodi. ²⁴ Kuzwa kumukowa wa lunyungu lwa Ifulemu muzululi, Kkemuweli mwana mulombe wa Syipitani. ²⁵ Kuzwa kumukowa wa lunyungu lwa Zebbuloni muzululi, Elizafani mwana mulombe wa Panakki. ²⁶ Kuzwa kumukowa wa lunyungu lwa Isakka muzululi, Palitiyeli mwana mulombe wa Azani. ²⁷ Kuzwa kumukowa walunyungu lwa Asya muzululi, Ahihudi mwana mulombe wa Syeloni. ²⁸ Kuzwa kumukowa walunyungu lwa Nafutali muzululi, Pedaheli mwana mulombwe wa Amiludi.'' ²⁹ Jehova wakalayilila baalumi aaba kuti baandanie nyika ya Kkenani akwiipa umwi awumwi wamikowa ya Izilayeli chaabilo chabo.