¹ Jehova wakambuula kuli Mozesi mutente lyakubunganina munkanda ya Sinayi. Eechi chakachitika mubuzuba butanzi bwa mweezi wabili mumwaka wabili kakuli kuti bantu ba Izilayeli kabali bazwa kunyika ya Ijipita. Jehova wakati, ² ''Amuchite kubalwa kwabantu boonse ba Izilayeli muluzubo lumwi alumwi, mumpuli zyabamawisi. Mubabale amazina. ³ Mubale baalumi boonse, awumwi muntu, uli amyaka ilimakumi aabili nakwiinda. Mubale boonse banga balalwana mbuli basilumamba ba Izilayeli. Iebo a Aaloni mwelede kulemba mweelwe wa baalumi bali munkamu zyabasilumamba. ⁴ Mwaalumi uzwa kumukowa umwi, awumwi musyobo, muzulwidi wamukowa, welede kubeleka anduwe mbuli muzulwidi wamukowa wakwe. Awumwi muzulwidi welede kuzulwida baalumi bayolwanina musyobo wabo. ⁵ Aaya ngimazina abazulwidi belede kulwana antomwe anduwe: kuzwa musyobo wa Lubbeni, ⁶ kuzwa kumukowa wa Simiyoni, Elizuli mwana wa Seluweli mwana wa Zulishadayi; ⁷ Kuzwa kumusyobo wa Juda, Nasoni mwana mulombe wa Aminadabu; ⁸ kuzwa kumusyobo wa Isakka, Nataniyeli mwana mulombe wa Zuwala; ⁹ kuzwa kumusyobo wa Zebbulani,Eliyabu mwana mulombe wa Heloni; ¹⁰ Kuzwa kumusyobo wa Ifulemu mwana mulombe wa Jozefu, Elisama mwana mulombe wa Amihudi, kuzwa kumusyobo wa Manase, Gamaliyeli mwana mulombe wa Pedahuzuli, ¹¹ kuzwa kumusyobo wa Bbenjamini, a Bbinadani mwami wa Gidiyoni, ¹² Kuzwa kumusyobo wa Dani, Ahiyeza mwana mulombe wa Amisadayi, ¹³ kuzwa kumusyobo wa Asa, Pagiyeli mwana mulombe wa Okkalani; ¹⁴ kuzwa kumusyobo wa Gadi, Eliyasafu mwana mulombe wa Dewuyeli; ¹⁵ alimwi kuzwa kumusyobo wa Nafutali, Ahila mwana mulombe wa Enani.'' ¹⁶ Aaba mbibaalumi bakasalwa kuzwa kubantu. Bakazulwida misyobo yabamawisi. Mbibakali bazululi bamikowa mu Isilayeli. ¹⁷ Mozesi a Aloni bakabweeza baalumi aaba, bakalembwa amazina, ¹⁸ aantomwe a baalumi aba bakabungania baalumi boonse ba Izilayeli mubuzuba butaanzi bwamwezi wabili. Mpawo umwi awumwi mwaalumi wamyaaka ili makumi obile akwiindilila wakaziba basikale bakwe. Wakeelede kuulika mazina amikowa ampuli zyalunyungu kuzwa kulibamawisi. ¹⁹ Mpawo Mozesi wakalemba myeelwe yabo munkanda ya Sinayi, mbuli Jehova mbakamulayilide kuti achite. ²⁰ Kuzwa kulunyungu lwa Lubbeni, mwana mulombe mutaanzi wa Izilayeli, kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ²¹ Bakabala 46,500 baalumi kuzwa kumusyobo wa Lubbeni. ²² Kuzwa kulunyungu lwa Simiyoni kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ²³ Bakabala baalumi59,300 kuzwa kumusyobo wa Simiyoni. ²⁴ Kuzwa kulunyungu lwa Gadi kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ²⁵ Bakabala 45,650 baalumi kuzwa kumusyobo wa Gadi. ²⁶ Kuzwa kulunyungu lwa Juda kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ²⁷ Bakabala 74,600 baalumi kuzwa kumusyobo wa Juda. ²⁸ Kuzwa kulunyungu lwa Isakka kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ²⁹ Bakabala 54,400 baalumi kuzwa kumusyobo wa Isakka. ³⁰ Kuzwa kulunyungu lwa Zebbuloni kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ³¹ Bakabala 57,400 baalumi kuzwa kumusyobo wa Zebbuloni. ³² Kuzwa kulunyungu lwa Efulemu mwana mulombe wa Jozefu kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ³³ Bakabala 40,500 baalumi bazwa kulunyungu lwa Efulemu. ³⁴ Kuzwa kulunyungu lwa Manase mwana mulombe wa Jozefu kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ³⁵ Bakabala 32,200 baalumi kuzwa kumukowa wa Manase. ³⁶ Kuzwa kulunyungu lwa Bbenjamini kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ³⁷ Bakabala 35,400 baalumi kuzwa kumusyobo wa Bbenjamini. ³⁸ Kuzwa kulunyungu lwa Dani kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ³⁹ Bakabala 62,700 baalumi kuzwa kumusyobo wa Dani. ⁴⁰ Kuzwa kulunyungu lwa Asya kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ⁴¹ Bakabala 41,500 baalumi kuzwa kumusyobo wa Asya. ⁴² Kuzwa kulunyungu lwa Nafutali kwakabalwa mazina aboonse baalumi bali aminyaka ili makkumi obile yakuzyalwa nakwiindilila bakonzya kuya kunkondo, kuzwa kumalembe aabamawisi bamikowa empuli zyabo. ⁴³ Bakabala53,400 baalumi kuzwa kumusyobo wa Nafutali. ⁴⁴ Mozesi a Aaloni bakabala boonse baalumi, aantomwe a baalumi balikkumi ababili bakali kuzulwida misyobo ilikkumi ayibili ya Izilayeli. ⁴⁵ Aboobo bonseni bantu ba Izilayeli kuzwa kuminyaka ilimakumi obile na kwiinda, boonse bakonzye kulwana munkondo, bakabalwa mumpuli zyabo. ⁴⁶ Bakabala 603,550 baalumi. ⁴⁷ Pesi bantu bakali balunyungu luzwa kuli Levi tebakabalwa pe, ⁴⁸ nkaambo Jehova wakali wamba kuli Mozesi, ⁴⁹ ''Tamweelede kubala musyobo wa Levi na kubabikilizya mumweelwe wabantu ba Izilayeli. ⁵⁰ Kwinda boobo, mutume ba Levi kuti babambe idumba mumalembe achizuminano, akubamba zyonse zibelesyo zilimudumba. Ba Levi baleelede kunyampula tente, alimwi baleelede kunyampula zibelesyo zili mutente. Beelede kubamba chikombelo akuchita musasa uzyungulukide idumba. ⁵¹ Eelyo dumba niliyogwisigwa kuya kulibumbi busena, ba Levi baleelede kuli mwaya. Eelyo idumba nilyeelede kuyakwa, ba Levi baleelede kuyoliyaka. Kufumbwa mwenzu usika afwifwi edumba uleelede kujayigwa. ⁵² Eelyo bantu ba Izilayeli nibayoyaka matente aabo, awumwi muntu weelede kuchita bobu afwifwi andembela eyi yankamu ya basilumamba. ⁵³ Nikuba boobo, ba Levi baleelede kuyaka matente abo kuzyunguluka dumba lyechizuminano chakuli fwinsya kuti lunyemo lwangu lutasikili bantu ba Izilayeli. Ba Levi beelede kubamba dumba lyechizuminano chamilawu.'' ⁵⁴ Bantu ba Izilayeli bakachita eezi zintu zyoonse. Bakachita zintu zyoonse ezyo Jehova nzyakabalayilila kwiinda muli Mozesi.