¹ Ba Falisi aba Sadusi bakeza mpawo bamusunka akumubuzya kuti abatondezye chitondezyo chizwa kujulu. ² Pesi wakasandula akwamba kuti kuli mbabo, ''Nikwasiya, mwamba kuti, 'Kuyoba kunze kubotu, nkambo ijulu lilasalala.' ³ Nikuba chifuma, mwamba kuti, 'Kunze kunoli kubi, nkambo ijulu lilasalala alimwi lilivumbidwe. Mulizi kupandulula bwime bwakujulu, pesi tamukonzyi kupandulula zitondezyo zyazyiindi. ⁴ Izyalane ibbi abwamu lilangula chitondezyo, pesi takwe chitondezyo chiyopegwa kulindilyo kutaamba chitondezyo cha Jona.'' Mpawo, Jesu wakabasiya akutozya kumbi. ⁵ Basikwiya nibakasika mutala, bakalubide kubweza chinkwa. ⁶ Jesu wakati kulimbabo, ''Amubone akuchenjela kubumena bwaba Falisi aba Sadusi.'' ⁷ Elyo basikwiya bakabuzyanya akwamba kuti, nkambo tetwabweza pe chinkwa.'' ⁸ Jesu wakaziba achechi mpawo wakati, ''Nywebo nubasilusyomo lunini, nkambonzi mulabuzyania lwanu mpawo mulati nkambo tetwabweza pe chinkwa? ⁹ Tamuna kuziba na kwibaluka zinkwa zili musanu kulibali zyuulu zili musanu, alimwi kuti mwakabungika nsangwa zyongane? ¹⁰ Na zinkwa zili musanu aazibili kuzyuulu zine, alimwi kuti ninsangwa zyongane nzimwakabungika? ¹¹ Ino nkambonzi kuti tamumvwisisyi kuti tendakalikwamba kulindinywe aatala achinkwa? Aamubone akuchenjela kubumena bwaba Falisi aba Sadusi.'' ¹² Mpawo bakamvwisya kuti takali kubambila kuti bachenjele bumena bwakali bwachinkwa pe, pesi kuti bachenjelele injisyo zyaba Falisi aba Sadusi. ¹³ Lino Jesu nakasika kuzisi zili kufwifwi aa Kkayisaliya Filipi, wakabuzya basikwiya bakwe, wati, ''Ino bantu bati Mwana aa Muntu ngwani ? ¹⁴ Bakati, ''Bamwi bakwamba kuti nduwe Joni mubbabbatizyi; bamwi bati,Elayija; alimwi bamwi bakuti, Jelemiya, na umbi wabasinsimi.'' ¹⁵ Wakati kulimbabo, ''Pesi nywebo mundamba kuti ndimeni?'' ¹⁶ Sayimoni Pita wakasandula wati, ''Nduwe Kkilisito Mwana wa Leza uupona.'' ¹⁷ Jesu wakasandula akwamba kuti kulinguwe, ''Uli aacholwe, Sayimoni mwana a Jona, nkambo nyama abulowa teensi nzizyo zyakuyubunwida eezi, pesi Taata wangu uli kujulu. ¹⁸ Alimwi ambebo ndamba kuti kulinduwe nduwe Pita, mpawo aatala amwaala ooyu ndiyoyaka mbungano yangu. Milyango yazibunda tikozokuzunda. ¹⁹ Ndiyokupa zijaluzyo zyabwami bwakujulu. Kufumbwa nchotakaange aansi chiyosungwa akujulu, alimwikufumbwa nchotakangunune aansi chiyosungununwa aakujulu.'' ²⁰ Mpawo Jesu wakalayilila basikwiya kuti batakaambili naba umwi kuti wakali Kkilisito. ²¹ Kuzwa kuchindi echo Jesu wakatalika kwambila basikwiya bakwe kuti welede kwinka ku Jelusalema, kuyopengela zinti zyingi kumaanza abapati abapayizi bapati abalembi, kujayigwa, akubusigilwa kubuumi kubuzuba bwatatu. ²² Mpawo Pita wakamubweza akumutola kiumbali akumuchibula, wati, ''Eezi azibe kule anduwe, Mwami;eezi zitazochitiki kulinduwe.'' ²³ Pesi Jesu wakachebuka akwamba kuli Pita kuti, ''Zwaawa kusule lyangu, Satani ! Uli chilebyo kulindime, nkambo toyeeyi atala azintu zya Leza, pesi ataala aazintu zyabantu.'' ²⁴ Mpawo Jesu wakati kuli basikwiya bakwe, ''Na muntu kayanda kunditobela, aalilube lwakwe, abweze chiingano chakwe mpawo anditobele. ²⁵ Nkambo kufumbwa uyanda kufutula buumi bwakwe uyobuswekelwa, alimwi kufumbwa uswekelwa buumi bwakwe nkambo kandime uyobujana. ²⁶ Nkambo chigwasyanzi kumuntu kuvuba nyika yoonse pesi akaswekelwe buumi? Ninzi nchakonzya kupa muntu muchibaka chabuumi bwakwe ? ²⁷ Nkambo Mwana muntu uyoboola mubulemju bwa Wisi abangelo bakwe. Mpawo uyolumbula muntu umwi awumwi mbuli milimo yakwe. ²⁸ Chakasimpe ndamwambila kuti, mpubali bamwi benu bayiimvwi ano batakwe nibayolabila lufu mane lumwi bakabone Mwana aa Muntu kaboola mubwami bwakwe.''