¹ Kuchindi echo, Mwami Helodi watamvwa makani atala a Jesu. ² Wakamba kuti kubazike bakwe, ''ooyu ngu Joni mubbabbatizyi; wabuka kuzwa kubafu. Nkinkaako nguzu eezi zilikubeleka mulinguwe.'' ³ Nkambo Helodi wakali wajata Joni, wamwanga akumubika muntolongo nkambo ka Helodiyasi, mukamwanike wakwe Filipu. ⁴ Nkambo Joni wakambide kuti kulingu, ''Tachili mumulawu pe kuti umukwate.'' ⁵ Helodi wakali kukonzya kumujaya pesi wakayoowa bantu, nkambo bakali kumuyeyela kuti musinsiimi. ⁶ Pesi buzuba bwakuzyalwa kwa Helodi nibwakasika, mwana musimbi wa Helodiyasi wakazyana aakati kabo akubotezya Helodi. ⁷ Mukusandula wakasyomezya aachikonke chakuti uyomupa kufumbwa nchayokumbila. ⁸ Musule akulayililwa abanyina, wakamba kuti, ''Mundipe aano, mundyido, mutwe wa Joni mu Bbabbatizyi.'' ⁹ Mwami wakawusa kuchikumbizyo chakwe, pesi nkambo kachikonke chakwe alimwi akambo kabaabo mbakali kususula aabo, wakalayilila kuti kuchitwobo. ¹⁰ Wakatumina kuyodunsulwa kwamutwe wa Joni muntolongo. ¹¹ Mpawo mutwe wakwe wakaletwa mundyido akupegwa kumwana musimbi oyo wakutola kuli banyina. ¹² Mpawo basikwiya bakwe bakasika, babweza mutunta akuyowuzikka. Kwinda kwachechi, bakiinka akuyowambila Jesu. ¹³ Lino Jesu nakamvwa eechi, wakazwa mpawo awo, wakunjila mubwato kubusena buli kumbali. Makamu nakamvwa aanchicho, akamutobela amawulu kuzwa kumyunzi. ¹⁴ Mpawo Jesu wakasika musule lyabo akubona makamu mapati. Wakabaluzyalo kulimbabo eelyo wakaponya bachiswa babo. ¹⁵ Nilyakaba goko, basikwiya bakasika kulinguwe akwamba kuti, ''Oobu busena mbwankanda, alimwi chiindi chamana. Mwayisya makamu kuti bayinke kumyuunzi mpawo bakalyulile chakulya kwabo.'' ¹⁶ Lino Jesu wakabambila kuti, ''Tabelede kumwayika. Amubape chimwi nchibatalye.'' ¹⁷ Bakamba kuti kulinguwe, ''Aano tuli aazinkwa zili musanu biyo answii zyobile. ¹⁸ Jesu wakati, ''Amuzilete kulindime.'' ¹⁹ Mpawo Jesu wakalayilila makamu abantu kuti akkale aansi mubwizu. Wakabweza zinkwa zili musanu answi zyobile. Walanga kujulu, wazilongezya akukwamuna zinkwa mpawo wazipa kuli basikwiya, alimwi basikwiiya bakapa makamu. ²⁰ Boonse bakalya akukkuta. Mpawo bakabwezelela bufwefwelenga bwakachaala bwechakulya - nsangwa zizwide zili kkumi azibili. ²¹ Aabo bakalya bakali zyuulu zili musanu zyabaalumi, kutaamba abanakazi abaana. ²² Mpawo mpawo wakachita kuti basikwiya banjile mubwaato akwinka kunembo lyakwe kuli bumwi busena, mbubonya mbwakachili kumwayisya makamu makamu. ²³ Nakamana kumwayisya makamu, wakatanta achilundu kuyokoomba. Nilyakaba goko wakali aalikke. ²⁴ Pesi lino bwato bwakali bwabakule aanyika. Kabuchundwa amayuwe, nkambo muuwo wakali kuunga kuubakachizya. ²⁵ Muchiindi chane mansiku Jesu wakabasikila, keenda aatala aalwizi. ²⁶ Basikwiya nibakamubona kayobwenda ataala alwizi, bakakatazika akwamba kuti, ''Musangu,'' mpawo bakalila chakuyowa. ²⁷ Pesi Jesu wakaamba kuli mbabo aawo akuti, ''Amube bakozu ndime ! Mutayowi.'' ²⁸ Pita wakamusandula akwamba kuti, ''Mwami, na nduwe, ndilayilile kuti ndize kulinduwe atala amaanzi.'' ²⁹ Jesu wakati, ''Kweza.'' Mpawo Pita wakazwa mubwato akweenda aatala aamanzi kayinka kuli Jesu. ³⁰ Pesi Pita nakabona muuwo mupati, wakayoowa. Mbwakatalika kubbila biyo, wakalila akwamba kuti, ''Mwami ndifutule.'' ³¹ Mpawo mpawo Jesu wakatandabika kuboko kwakwe, wajata Pita, akwamba kuti kulinguwe, ''Nusilusyomo luniini, nkambonzi nodoneeka?'' ³² Mpawo Jesu aa Pita nibakanjila mubwato, muuwo wakiimikila kuunga. ³³ Mpawo basikwiiya bakali mubwato bakakomba Jesu akwaamba kuti, ''Nkasimpe uli Mwana wa Leza.'' ³⁴ Nibakazubuka bakasika kunyika yaku Genesaleti. ³⁵ Bantu bakubusena oobo nibakaziba kuti ngu Jesu, bakatumina makani konse muchisi choonse chizyungulukide, alimwi bakaleta kulinguwe woonse wakali kuchiswa. ³⁶ Bakamukumbila kuti bajate moombe wajansi lyakwe, alimwi biingi bakuujata bakapona.