¹ Kuchindi echo Jesu wakayinka mubuzuba bwakulyokezya wayinda mumyunda yazilyo. Basikwiya bakwe bakafwa anzala eelyo bakasanguna kukulula mayila nkwalikumpela akwalya mituutu. ² Pesi baFalisi nibakabona oobo bakati kuli Jesu, ''Bona, basikwiya bako bachita zitali mumulawu kuchitwa mubuzuba bwakulyokezya.'' ³ Pesi Jesu wakati kulimbabo, ''Takwe nimwakabalide Devidi mbakachita nakaba anzala, abaabo balumi mbakali aabo? ⁴ Wakanjila mungánda ya-Leza akulya chinkwa chakutwa, chitensi kumulawu kuti alye alubo chitali kumulawu akulabo mbakali abo, pesi kazili kumuawu kupela kubapayizi. ⁵ Tamubalide mulawu kuti mubuzuba bwakulyokezya bapayizi muchikombelo balataluka mulawu wabuzuba bwakulyokezya pesi tabakwe mulandu? ⁶ Pele ndati kulindinywe umwi mupati kwinda ngánda yaLeza ulaano. ⁷ Namwakalizi echi nchichalikwamba, 'mebo ndiyanda luse pepe chipayizyo; temwalikubapa kambo batakwe mulandu. ⁸ Eelyo mwana amuntu ngu Mwami wazuba lyakulyokezya.'' ⁹ Mpawo Jesu wakazwa oko akwinka kuchikombelo. ¹⁰ Amubone, kwakali muntu wakalinyanide kuboko. Bafalisi bakabuzya Jesu, bakati, ''sena chililuleme kusikila mubuzuba bwakulyokezya?'' Ikuti bamutamikizye kubisya. ¹¹ Jesu wakati kulimbabo, ''Inga ulaba mwalumi biyeni akati kanu, ngwani, na wali ambelele imwi, aboobo, na imbelele eyi yawida mudindi mubuzuba bwakulyokezya, takonga ulijata na akwigusya aanze? ¹² Chiinda bulemu biyeni, eelyo kumuntu nekuba kumbelele ! Aboobo chililuleme kuchita chibotu mubuzuba bwakulyokezya.'' ¹³ Mpawo Jesu wakati kumuntu, 'Tandabika kuboko kwako.'' Wakatandabika, alubo lwakabwedezegwa mukupona, mbuli kwenzinyina kuboko. ¹⁴ Pesi ba Falisi bakayinka bakubamba mbubonya kabalikumuvwiya. Bakali kuyandula mbubanga balamujaya. ¹⁵ Mbuli mbwakaziba Jesu, wakazwa oko. Bantu banji bakamutobela, lino wakabasilika boonse. ¹⁶ Wakabalayilila kuti batachiti kuti azibinkane kulibamwi, ¹⁷ zikazuzikizigwe,zyakambwa muli Isaya musinsimi, kuti, ¹⁸ ''Bona, mulanda wangu ngundakasala; Muyandwi wangu umwi, oyo muuya wangu ngundibotelwa. Ndiyobika muuya wangu alinguwe, eelyo uyobakambawukila bululami kulibamasi. ¹⁹ Takoyojana buyumuyumu na kukulililisya; nikuba umwi kumumvwa ijwi lyakwe mumigwagwa. ²⁰ Takwe nayotyola limwi ityetye lyakapwayulwa; takwepe nayozima kamuni kasuka kamulilo, kusikila wendelezya bululami mukuzunda, ²¹ Abalabo bamasi bayoba bulangizi muzina lyakwe.'' ²² Eelyo umwi muntu utakuboni katambuli, wakanjidwe adimoni, wakeetwa kuli Jesu. Wakamusilika, azezyo zyakazwa kuti utambuli muntu wambula akubona. ²³ Makamu wonse akagamba akwamba, ''ooyu muntu ngaulaba mwana wa Devidi na?'' ²⁴ Pesi baFalisi nibakamvwa malele aaya bakati, ''Ooyu muntu tatandi madimoni kunze kwa Bbelezebbulu, mupati wamadimoni.'' ²⁵ Pele Jesu walizi miyeyo yabo mpawo wakati kulimbabo, ''Bwami boonse bukazyania lwabo, buyomwayisigwa, alubo kufumbwa dolopo niba ng'anda ikazyania lwayo tikayimikili pe. ²⁶ Ikuti satani watanda satani, unoli ulikulikazya lwakwe. Bwami bwakwe nga bulimikila byeni ? ²⁷ Lino na ndilatanda madimoni a Bbelizebbulu, ani batobezi banu batandyanzi ? Nkambo kachechi, bayoba babetesi banu. ²⁸ Pesi do katwatanda madimoni a muuya wa Leza, mpawo bwami bwa Leza bwasika akati alindinywe? ²⁹ Alubo kulibiyeni kuti umwi anjile mung'anda yamuntu usimide akubba makwebo akwe katamusungide muntu usimide chakusanguna? Elyo uyobba makwebo akwe kuzwa mungánda yakwe. ³⁰ Umwi utali andime ukazyanya andime, alubo ayoyo utabungani andime ulamwayula. ³¹ Aboobo ndati kulinduwe, chibi choonse akusampawuula bantu bayolekelelwa, pesi kutukila muuya takukwe kulekelelwa pe. ³² Kufumbwa uwambula ijwi atala amwana muntu, ooyo uyolekelelwa. Pesi kufumbwa uwambula bubi atala a Muuya Uusalala, oyo takoyolekelelwa, na munyika eyi, na kuleeyo ichizosika. ³³ Chita musamu ubote ayala michelo yawo ibote, na kuchita musamu kuba mubi, amuchelo wayo ubije,mbuli kuti musamu uboneka amichelo yawo. ³⁴ Nywebo nubana banzoka, mbomunga muli babi, ngamulamba buti izintu zibotu? Kuzwa mumoyo mulizinji mulomo nzuwambula. ³⁵ Muntu mubotu kuzwa kuzintu zibotu zyamoyo wakwe ulagusya nzizyonya, pele muntu mubi wakuzintu zibi zyamoyo wakwe mulazwa bubi kupela. ³⁶ Ndati kulinduwe mubuzuba bwalubeta bantu balakupa bupandanuzi kuli alimwi ijwi litali kabotu ndibakaamba. ³⁷ Kuzwa kumajwi ako uyolulamikwa, akumajwi ako uyopegwa mulandu.'' ³⁸ Elyo balembi bamulawu bamwi, abaFalisi bakasandula akuti , ''Muyiisi tuyanda kubona chitondezyo kuzwa kulinduwe.'' ³⁹ Pesi Jesu wakasandula akuti kulimbabo, kufumbwa bubi abumambi kuzukulu lyasunu lyabayandula chitondezyo. Pesi tokwe chitondezyo pe chiyopegwa kunze kwachitondezyo cha Jona musinsiimi. ⁴⁰ Mbanga Jona wakali amazuba atatu mubula bwamuswi mupati, alakwe Mwana Muntu uyoba amazuba atatu amansiku atatu mumoyo wanyika. ⁴¹ Bantu baku Ninivu bayoyimikila kunembo lyalubeta azukulu eli lyabantu aboobo liyopegwa mulandu. Nkambo bakeempwa mukukambawuka kwa Jona, lino amubone, umwi mupati kwinda Jona uli aano. ⁴² Mwami mwanakazi wakumusama uyobuka kulubeta abantu bakwe bazukulu eli lyabantu akulipa mulandu. Wakazwa kumajinkilo anyika kuti azomvwe busongo bwa Solomoni,alubo bona, umwi mupati kwinda Solomoni ulaano. ⁴³ Na muuya mubi wazwa kumuntu, wakwinda mukati kamasena atakwe maanzi akuyandula kulyokezya, pesi tawubujani pe. ⁴⁴ Mpawo lyakati , ''Ndiyobweda kungánda yangu nkundakazwa; Nilyakabweda , lyakujana ng'anda eyo yakakukulwa akubambwa obotu. ⁴⁵ Elyo lilayinka akubweza bweza imbi myuuya ili musanu ayibili mibi kwinda nguwo, lino ilasika kuzokkala omo. Abobo bubi bwamuntu kumamanino bwakabisisisya kwinda kumatalikilo. Mbukuyoba mbubobo kuzukulu lyabubi eli.'' ⁴⁶ Nakachili kwambula Jesu kumakamumakamu, amubone, banyina abakulana bakwe bakayimikila aanze,kabayandula kuti bambule anguwe, ⁴⁷ Umwi wakati kulinguwe, ''Bona banyoko abanike bako balimvwi aanze bayanda kwambula anduwe.'' ⁴⁸ Pesi Jesu wakasandula kuliyoyo wakamwambila, ''Mbani baama bangu alubo mbaani banike bangu?'' ⁴⁹ Eelyo wakatandabika kuboko kwakwe akutondeka basikwiya bakwe mpawo wakati, ''Bona, mbabo baama abanike bangu ! ⁵⁰ Nkambo kufumbwa uchita luyando lwa Taata ulikujulu, muntu oyo mukulana wangu, muchizi wangu, mbebaaba bangu.''