¹ Nichakaba kuti Jesu wamaninsya kulayilila basikwiya bakwe balikkumi ababili, wakazwa nkukonya oko wakuyisya akukambawuka mumadolopo aabo. ² Lino Joni nakamvwa muntolongo atala anchito zya Kkilisito, wakatuma basikwiya bakwe ³ ajwi elyo bakati kulinguwe, ''Nduwe na ulokuza, na kuti tuchilangilila uumbi?'' ⁴ Jesu wakasandula akwamba kulimbabo, ''Mwinke mukaambe kuli Joni nzimwabona akumvwa. ⁵ Bataboni balikutambula kubona, zilema zilenda, balezipele balokusalazigwa, batamvwi balokumvwa lubo, bafwide balokubusigwa lubo kubawumi, amakani mabotu alokukambawukwa kubachete. ⁶ Alubo ngusicholwe kufumbwa utabilizigwi andime.'' ⁷ Lino aba bantu nibakeenda munzila yabo Jesu wakatalika kwamba kumakamu atala a Joni, ''Mwakayinka kuya kunkanda kuyobonanzi - ityetye lizunganisigwa aguuwo ? ⁸ Pesi mwakayinka kuya kuyobonanzi - muntu usamide ziteete? Mbukubede, abo basama zisamo ziteetete bakkala mumaanda abami. ⁹ Pesi mwakainka kunze kuyobonanzi - musinsimi? Iyi, ndati kulindinywe, akwinda musinsimi. ¹⁰ Echi nchenchicho nguchakali kulembeledwe obu. 'Bona, ndinokutuma mutumwa wangu kunembo lyabusyu bwako, uyokubambila nzila kunembo lyako. ¹¹ ''Ndamba kulindinye nkasimpe, takukwe nikwakabukide akati kabaabo bazyalwa abanakazi unga ulaba mupati kwinda Joni mubbabbatizyi.Nekubaboobo, munini muntu mukolondo kubwami bwakujulu mupati kwinda nguwe. ¹² Kuzwa kumazuba a Joni mubbabbtizyi kusikila lino, bwami bwakujulubulokufwabisigwa alupyopyongano, lino bantu balupyopyongana balalubweza changuzu. ¹³ Mbukunga boonse basinsimi amulawu wakali kusinsima kusikila kuli Joni. ¹⁴ Elyo nawayanda kuzumina kuchitambula, oyu ngu Elija,nguwe wakali kuzosika. ¹⁵ Kuliyoyo ulamatwi akumvwa, ngamvwe. ¹⁶ Kuli chili nchindinga ndilayezyanisya azyalane lyasunu? Chili mbuli bana basobana kuchisambalilo,bakkala akwita umwi awumwi, ¹⁷ akwamba, 'twakakulizizya muteetele, aboobo tewakazyana pe.Twakayeema, pele tewakalila. ¹⁸ Aboobo Joni wakasika katalyi chinkwa nanka kunywa masansa, elyo bakati, Uladimoni. ¹⁹ Mwana amuntu wakasika akulya akunywa elyo bakati, Langa, mwalumi sindya amukolwi,muzolwani abasimutelo abasizibi !' Pesi busongo bulalulamikwa anchito zyakwe.'' ²⁰ Elyo Jesu wakatalika kukalalila madolopo omo mwakachita malele akwe manji, nkambo tebakeempwa. ²¹ ''Maawe kulinduwe, Kkolazini ! Mawe kulinduwe, Bbetisayida! Kansinga malele akachitwa ku Taya a Sidoni akachitwa kulindinywe, ninga bakeempwa kale kuchindi chakayinda muzisamo zyamasaka amudyota. ²² Pesi kulakuyandika chakwindilila kubuzuba bwalubeta kwinda nduwe. ²³ Webo, Kapenawumu,uyeeya kuti uzosumpulwa kujulu? Peepe, unoyoyetwa ansi kumulindi utagoli [Hadesi]. Nikwali kuti mu Sodomu mwakachitwa malele akachitwa mulinduwe, ninga mwachili asunu. ²⁴ Pele ndati kulinduwe chiyobachubila kunyika ya Sodomu mubuzuba bwalubeta kwinda nduwe.'' ²⁵ Kuchindi echo Jesu wakati, ''Ndilikutembawula Taata, Mwami, wakujulu anyika, nkambo wasisila basongo abamvwisya, akuyubunwida bana banini: ²⁶ Iyii, Taata, Eechi chakalikubotezya kumeso ako. ²⁷ Zintu zyonse zyakapegwa ndime kuzwa kuli Taata. Elyo takwe umwi uzi mwana kunze kwa Taata, mpawo, takwe uzi Taata kunze kwamwana aboobo kuloyo mwana ngwasala kuti amuyubunune. ²⁸ Amuze kulindime, moonse nimukatede animulemenwa ndiyomupa kulyokezya. ²⁹ Amubweze ijokwe lyangu lili alindime akwiiya kulindime, nkambo ndilimubombe akuba mutete moyo, eelyo muyojana kulyokezya kwmyuuya yanu. ³⁰ Nkambo ijokwe lyangu niteete alubo ndiguba amukuli wangu tulemi pe.''