¹ Ibbuku lyamazyalane aa Jesu Kkilisito, mwana mulombe wa Devidi, mwana mulombe wa Abbulahamu. ² Abbulahamu wakali wisi wa Ayizeki. Ayizeki wisi wa Jakobu, Jakkobbu wisi wa Juda a bananyina. ³ Juda wakali wisi wa Pelezi a Zela kuli Tamala. Pelezi wisi wa Hezelani, alimwi Hezelani wisi wa Lamu. ⁴ Lamu wakali wisi wa Aminadabbu, Aminadabbu wisi wa Nasyoni, Nasyoni wisi wa Salumoni. ⁵ Salumoni wakali wisi wa Bbowazi kuli Lahabbu, Bbowazi wisi wa Obbedi kuli Lute, Obbedi wisi wa Jese. ⁶ Jese wakali wisi wa mwami Devidi, Devidi wisi wa Solomoni kuli muka Uliya. ⁷ Solomoni wakali wisi wa Lehobbowamu, Lehobbowamu wisi wa Abbija, Abbija wisi wa Asa. ⁸ Asa wakali wisi wa Jehosyafati, Jehosyafati wisi wa Jolamu, Jolamu kali sikale wa Uziya. ⁹ Uziya wakali wisi wa Jotamu, Jotamu wisi wa Ahazi, Ahazi wisi wa Hezekkiya. ¹⁰ Hezekkiya wakali wisi wa Manase, Manase wisi wa Amoni, Amoni wisi wa Josiya. ¹¹ Josiya wakali sikale wa Jekkoniya antoomwe a bananyina kuchiindi chakutolwa ku Bbabbiloni. ¹² Musule lyakulonzegwa kutolwa ku Bbabbiloni, Jekkoniya wakali wisi wa Syalitiyeli, Syalitiyeli wakali sikale wa Zelubbabbelu. ¹³ Zelubbabbelu wakali wisi wa Abbiyudi. Abbiyudi wisi wa Eliyakkimu, Eliyakkimu wisi wa Azo. ¹⁴ Azo wakali wisi wa Zadokki, Zadokki wisi wa Akkimu, Akkimu wisi wa Eliyudi. ¹⁵ Eliyudi wakali wisi wa Eliyeza, Eliyeza wisi wa Matani, Matani wisi wa Jakkobbu. ¹⁶ Jakkobbu wakali wisi wa Jozefu mulumi wa Meli, ooyo wakazyala Jesu utegwa Kkilisito. ¹⁷ Mazyalane woonse kuzwa kuli Abbulahamu kusika kuli Devidi akali kkumi aane. Kuzwa kuli Devidi kusika kukulonzegwa kwabo kutolwa ku Bbabbiloni akali kkumi aane. Mpawo kuzwa kukulonzegwa kutolwa ku Bbabbiloni kusikila kuli Kkilisito akali kkumi aane. ¹⁸ Kuzyalwa kwa Jesu Kkilisito kwaka chitika munzila iitobela. Banyina, Meli wakali watangilwa a Jozefu, pesi kabatana kuswanana wakajanika kamitide ku Muuya Uusalala. ¹⁹ Pesi Jozefu, mulumi wakwe, wakali mwaalumi uululeme alimwi taakayanda kumufwisya bweeme pe chaantanganana, aboobo wakayeya kumuleka chuumunizi akusiya chizuminano chabo. ²⁰ Aawo mpakachili kuyeeya eezi zintu, mungelo wa Mwami wakaboneka kulinguwe muchiloto, waamba kuti, ''Jozefu mwana wa Devidi, utayowi pe kukwata Meli, nkaambo ooyo umitidwe ngwa Muuya Uusalala. ²¹ Uyootumbuka mwana mulombe, alimwi uyomuuzika izina lyakuti ngu Jesu nkaambo uyoofutula bantu bakwe kuzwa kuzibi zyabo.'' ²² Zyonse eezi zyakachitika kuzuzikizya zyakaambwa a Mwami kwindila ku musinsimi, kaamba kuti, ²³ ''Amubone, ooyo nakalindu uzoomita akutumbuka mwana mulombe, mpawo izina lyakwe bazomuuzika kuti ngu Imanuwele'' - eelyo lipandululwa kutegwa, ''Leza ulaandiswe.'' ²⁴ Jozefu wakasinsimuka wachita mbuli mungelo wa Mwami mbakamulayilila. Jozefu wakamukwatwa Meli. ²⁵ Pesi takwe nakoona aawe pe kusikila watumbuka mwana mulombe. Eelyo wakamuuzika zina lyakuti ngu Jesu.