¹ Lino nakabambila chikozyano chitondezya mbubeelede kunokomba akuti batatyoki myoyo, ² wati, ''Muli limwi dopolo kwakali mubetesi utakwe wakalikuyowa Leza nikuba kulemeka bantu. ³ Lino kwakali mukamufu mudolopo eli, wakaliswini kaza kulinguwe, kati, 'Mundigwasizye makani angu asimulanduma'. ⁴ Lino wakaba achindi chilamfu katalikuyanda kumugasizya, pesi nikwakaba kayindi, wakalyambuuzya alikke wati, ''Nikuba ngundilemeka, ⁵ pesi mukamufu oyu wandikatazya, ndilamugwasizya kuti ajane lwangunuko kumakani akwe, kwiitila kuti atandisusubiki, kanoswini kandichindila''. ⁶ Mpawo Mwami wakati, ''Muswilizye mbaamba mubetesi oyu siluuni''. ⁷ Lino muyeeye kuti, Leza takonzyi na kubeteka chabululami kubsale bakwe, ibamulilila sikati amansiku? Ulachedwa na kubkutukila? ⁸ ''Ndamwambila kuti, uyofwambana loko kulingula makani abo. Nikuba obo, nazobweda Mwana mulombe wa Muntu uzojana kakuchili lusyomo na munyika?'' ⁹ Elyo wakamba mukozyano oyu utobela kuli bamwi bakali kulisyom beni kuti baliluleme, abo bakali kunyansya bamwi, ¹⁰ ''Baluumi babili bakaya mun'anda yaLeza kuyookomba- umwi wakali muFalisi oyu umwi kali Simutelo. ¹¹ MuFalisi wakayimikila wakomba kaamba zintu ezi atala lyabuumi bwakwe wati, 'Leza, ndilakulumba nkambo kakuti tandili mbuli bamwi pe babbi, bantu bataluleme pe, basibwamu, na bali mbuli Simutelo oyu. ¹² Ndilalyiimya tubili amviki. Ndilapa chipanzi chakkumi chazintu zyoonse nzindijana'. ¹³ Pesi Simutelo, kayimvwi kulekule, tewakakonzya pe nikuba kusompya meso akwe kujulu, pesi wakawuma akaango kakwe wati, 'Leza, ndifwide luzyalo, me ndisizibi'. ¹⁴ Ndamwambila kuti oyu mwalumi wakajoka kun'anda yakwe kali walulamikwa kwiinda olya mweenzinyina, nkambo kufumbwa muntu ulisumpula uzofwinsigwa, pesi woonse muntu ulijosya ansi uzosumpulwa''. ¹⁵ Bantu bakeeta bana banini kulinguwe kuti abaampe, pesi basikwiiya nibakababona bakabaambwiida. ¹⁶ Pesi Jesu wakabayita kulinguwe wati, ''Muzumizye bana banini baze kuindime, alubo mutabakasyim pe. Nkambo bwami bwakujulu mbubwabo. ¹⁷ Kasimpe ndamwambila, utakonzyi kutambula bwami bwaLeza mbuli mwana munini takwe kuyobunjila''. ¹⁸ Umwi mwendelezi wakamubuzya wati, ''Muyisi mubotu, ngandilachita biyeni kuti ndikajane buumi butamani?'' ¹⁹ Jesu wakati kulinguwe, ''Nkamboonzinundaamba kuti ndilimubotu? Takwe muntu mubotu pe, kunze kwaLeza alikke. ²⁰ Ulizi milawu yaamba kuti utachiti bwaamu, utajeyi, utabbi, utaambi manwa, lemeka uso abanyoko''. ²¹ Mweendelezi wakati, ''Yoonse eyi ndakayilondola kuzwa kandichili mulombe''. ²² Lino Jesu nakamvwa obo, wakati kulinguwe, ''Kuli chinti chimwi nchubulide. Weelede kuzya zintu zyoonse nzulaazyo mpawo wabila bachete, elyo uyooba achiybwedo chalubono kujulu mpawo uze unditobele''. ²³ Lino mweendelezi oyu nakamvwa makani aya, wakawusa, nkambo wakali alubono lwiingi. ²⁴ Elyo Jesu nakabona kuti wawusa loko wakati, ''Nchiyumu loko kuli abo bajisi lubono lwiingi kunjila mubwami bwakujulu! ²⁵ Nkambo chilakonzeka kuti nkamela yiinde mumpuli yansunda kwiinda kuti muntu muvubi anjile mubwami bwaLeza''. ²⁶ Abo ibakamvwa makani aya bakati, ''No mwati sa mpali unga uyofutulwa?'' ²⁷ Jesu wakamwambila wati,'' Zintu ziyumu kubantu nzyuuba kuliLeza.'' ²⁸ Pita wakati, ''Langa twakasiya zintu zyesu zyoonse mpawo twatobela nduwe''. ²⁹ Jesu wakati kulimbabo, ''Ndamwambila kasimpe kuti takwe muntu naba umwi wakasiya n'anda yakwe, naba banakazi bakwe, na banike bakwe, na bazyali, na bana nkambo kabwami bwaLeza, ³⁰ utakwe kuzojana zyindilide kuchiindi echino, amuchindi chibola, buumi butamani.'' ³¹ Nakamaninsya kubunganizya bali kkumi ababili kulinguw, wakati kulimbabo, ''Mulange tuya kuJelusalema, lino zyoonse zintu zyakalembwa abasinsimi atala a Mwana mulombe wa Muntu ziya kuyozuzikizigwa''. ³² Nkambo uyopenzegwa mumaboko Bamasi, mpawo bayomuwela, uyojatwa chamasampu, mpawo bakamuswide mate. ³³ Nibayomaninsya kumuuma, bayomujeya, mpawo mubuzuba bwatatu uyobuka lubo.'' ³⁴ Takwe nchibakamvwa pe kumakani aya, alubo eli lyakabasita, mpawo takwe nibakamvwisisisya pe zintu ezi zyakali kwaambwa. ³⁵ Kwakaba kuti Jesu kaali waamba kusika muJelikko, umwi moofu wakalikkede kumbali aanzila, ulakumbila, ³⁶ mpawo nakamvwa tyanga lyabantu bayabweenda, wakabuzya kuti chakali kuchitika niinzi. ³⁷ Bakamambila kuti, ''Ngu Jesu waNazaleta uyabweenda. ³⁸ Mpawo mwalumi oyu moofu wakasompezya wati, ''Jesu Mwana a Davida, ndifwide luzyalo''. ³⁹ Bakali kweenda kumpela bakamwambwiida moofu oyu, bati, ''Umuna''. Pesi wakasompezya loko, ''Mwana wa Davida, ndifwide luzyalo''. ⁴⁰ Jesu wakayimikila nji mpawo walayilila kuti mwalumi oyu ayeetwe kuli nguwe. Lino mwalumi oyu moofu nakaba afwiifwi, Jesu wakabuzya wati, ⁴¹ ''Uyanda kuti ndikuchitilenzi? Wakati, ''Mwami ndiyanda kuti ndibone''. ⁴² Jesu wakati kulinguwe, ''Bona. Lusyomo lwako lwakuponesya''. ⁴³ Mpawo awo wakabona, wamutobela, kalemya Leza. Bantu boonse nibakabona ezi bakalumbayizya Leza.