¹ Lino bantu ba Izilayeli bakakonkezya chisyomezyo ku Mizipa, ''Takwe pe wesu uyelede kupa mwanakwe musimbi kuti akwatwe kumusyobo waba Bbenjamini.'' ² Mpawo bantu bakiinka ku Bbeteli akuyokkala nkuko kunembo lya Leza kusikila kumabbililo, alimwi ajwi pati bakoomoka chakukwila. ³ Bakiita, ''Nkaamboonzi, Jehova, Leza wa Izilayeli, ezi nizyachitwa ku Izilayeli, kuti wamusyobo wesu wabulika sunu?'' ⁴ Mubuzuba butobela bantu bakabuka chifumo akuya ku chipayililo nkuko alimwi bakatula zituuzyo zyakutenta azituuzyo zyakutontoozya. ⁵ Bantu ba Izilayeli bakati, ''Nguuli woonse musyobo wa Izilayeli watasika mumbungano ya Jehova?'' Nkambo bakachita chisyomezyo chipati akulangisisya naba omwe watasika kuli Jehova ku Mizipa. Bakati, ''Ulelede kujayigwa.'' ⁶ Bantu ba Izilayeli bakatelela mukulana wabo Bbenjamini. Bakati, ''Sunu woomwe musyobo wapambulwa kuli Izilayeli. ⁷ Ngwani utakababambe bakazi abo basyaala, mbokunga twakachita chikumina kuli Jehova kuti tatukoyosiya naba omwe wabo kuti akakwate mwana musimbi wesu?'' ⁸ Bakati, ''Njiili misyobo yaba Izilayeli yakatasika kuli Jehova ku Mizipa?'' Kwakajanika kuti takwepe naba omwe wakasika kumbungano kuzwa ku Jabbesi Giliyadi. ⁹ Nkambo elyo bantu bakajanika balibambidwe kabotu, bona takwe, bakkala mu Jabbesi Giliyadi naba omwe wakajanika. ¹⁰ Imbungano yakatuma bantu bakozu bali zyuulu zili kkumi azibili kabali amalayilile akuti biinke akuyojaya bakkala mu Jabbesi Giliyadi apanga, kubikilizya abanakazi abana. ¹¹ ''Muchite obu: Baluumi boonse abanakazi boonse abo bakazi mwalumi kwiinda kuswanana anguwe amubape kulunyonyooko.'' ¹² Bantu bakajanwa akkati kabaabo bakkala mu Jabbesi Giliyadi bali myaanda yoone yabanakazi bachili baniini batana kuswanana amwalumi, alimwi bakabatola kuchilawo ku Silo mu Kkenani. ¹³ Imbungano yoonse yakatuma mulumbe akwambila bantu ba Bbenjamini bakali kundomba ya Limoni kuti babatula chaluumuno. ¹⁴ Ba Bbenjamini bakabweeda kuchiindi nchicheecho alimwi bakalipedwe mwanakazi waku Jabbesi Giliyadi, pesi tebakazulila pe boonse. ¹⁵ Bantu baketelela Bbenjamini azyakachitika, nkambo Jehova wakachita kwanzania akkati misyobo ya Izilayeli. ¹⁶ Mpawo bazuluzi bambungano bakati, ''Mbubuli mbotunga tulabamba banakazi baba Bbenjamini abo basyeede, mbokunga banakazi baba Bbenjamini bakajayigwa. ¹⁷ Bakati, ''Balelede kujana lukono lwabaabo basyeede kuzwa ku Izilayeli. ¹⁸ Tatukoyobapa banakazi kuzwa kubana besu basimbi, nkambo bantu ba Izilayeli bakachita chisyomezyo, 'Lutuko kuli oyo naba omwe uupa mwanakazi kuba Bbenjamini.''' ¹⁹ Aboobo bakati, ''Mulizi kuti kuli pobwe lya Jehova amunyaka amunyaka ku Silo ( kunyika ya Bbeteli, kujwe lyamugwagwa oyo uyinka ajulu kuzwa ku Bbetelu kuyosika ku Syekkemu, akumusanza wa Lebbona).'' ²⁰ Bakalayilila bantu ba Bbenjamini, bakati, kamuya mukayube munsiswa akwiima mumuunda wamisansa. ²¹ Akulanga chiindi elyo basimbi baku Silo nibasika kukuzyana, mpawo mukachijane kuzwa mumyuunda yamisansa alimwi awumwi wenu akalijatile mwanakazi kuzwa kubasimbi baku Silo, mpawo mukabwede kunyika ya Bbenjamini ²² Eelyo bamawisi abo naa bakulana babo nibasika kuzotututongawukila, tuyowamba kuti kulimbabo, 'Mutulekelele! Mubasiye nkambo tetwakabweza banakazi bamwalumi naba omwe muchiindi chankondo. Tamukwe mulandu, mbokunga temwakapa bana benu basimbi kuli mbabo.''' ²³ Bantu ba Bbenjamini bakachita oobo. Bakatola mwelwe wabanakazi aabo mbibakali kuyanda kuzwa kubasimbi bakali kuzyana akubabweza kuti babe banakazi babo. Bakiinka akubweeda kubusena bwachisi chabo. Bakayakulula myuunzi yabo akukkala mulinjiyo . ²⁴ Mpawo bantu ba Izilayeli bakasiya busena obo akuya kumunzi, awumwi kumusyobo wakwe akuchiinga chakwe, awumwi kuchisi chakwe. ²⁵ Mumazubayo tekwakalikwe mwami pe mu Izilayeli. Awumwi wakali kuchita zyakali kabotu mumenso akwe.