¹ Chilengano cha Isaya mwana mulombe wa Amozi, makani ngaakabona a Juda a Jelusalemu, mumazuba a Uziya, Jotamu, Ahazi, a Hezekkiya, baami ba Juda. ² Koswilila, majulu akupa kutwi, nyika; nkambo Jehova waamba: ''Ndakalela bana akubakuzya, pele bakandipapila akulwisya ndime. ³ Musune ulizi simalelo wakwe, ambongolo ilizi chilyido nchiipedwa kumwami wayo, pele ba Izilayeli tabeezi, Izilayeli takamvwisisisya pe.'' ⁴ Maawe! Nyika, basizibi, bantu balemenedwe milandu, lunyungu lwabachita bubi, bana basikubisya! Baleka Jehova, basampawula Uusalala omwe wa Izilayeli, bakabola abalikke kuli nguwe. ⁵ Ino nkamboonzi numuchiyanda kuumwa? Ino nkamboonzi nochiyabupapila bwindilide? Mutwe woonse ulachiswa, moyo woonse ulalenguuka. ⁶ Kuzwa kumalyatilo azituta mane kusikila mumutwe takwe buponi mulimbabo; zilonda kupela, amibunda azilonda zipya ziyulikide; tabana kwaangwa, kusalazigwa, kusilikwa nikuba kubombekwa amafuta. ⁷ Chisi chenu nitongo; myuunzi yenu ilipyide amulilo; myumnda yenu--abuliwo bwanu, bazwakule biinyonyoona--yasyala lyaba tongo, kumwayigwa abeenzu. ⁸ Mwana musimbi wa Ziyoni wasyala mbubonya mbuli kaanda mumuunda, mbuli mwenzule muchilili chamakkowa, mbuli muunzi usinkilidwe basilumamba. ⁹ Jehova wamakamu wakatusiila bache loko basyede, nitwakakozyania a Sodomu akuba mbubonya mbuli Gomola. ¹⁰ Amuswilile majwi a Jehova, nobeendelezi ba Sodoma; amutelele mulawo wa Leza wesu, nobantu ba Gomola; ¹¹ ''Zipayizyo zyenu nzyingi zili amilimoonzi kuli ndime?'' mbwawamba Jehova. ''Ndazyiingi zituuzyo zyabagutu, amafuta abanyama baneneede; amubulowa bwabapule; bwatubelele na bwampongo tabunditondezyi. ¹² Chiindi nimusika kukulibonia kuli ndime, ino ngwani wamulayilila, kuti mulyatuuke abo lubanza lwangu? ¹³ Mutayeeyi limbi kundetela zipayizyo zyabuyo; tununkilizyo tulandisesemya; mweezi mupya ambungano zya Sabata nzimubunganina -- Nsibotelwi ambungano zyabubi. ¹⁴ Ndisula myeezi yanu mipya amapobwe; nkaambo nchibi kulindime; ndakatala ndachimwa kulemenwa angawo. ¹⁵ Naa mwatandabika maanza enu mukukomba, njosisa menso angu kulindinywe; nekuba kuti mwakomba nkombyo nyiingi, nsikoyoswilila, maanza enu azwide bulowa. ¹⁶ Amusambe, mulisalazye amulikke; amugwisye bubi bwamilimo yenu kubusyu bwangu; amuleke kuchita bubi; ¹⁷ amwiiye kuchita kabotu; amulanguule mbeta ziluleme, muyanduule bululami, mululamike budyaamizi, bamuchaala, mukwabilile bamukabafu.'' ¹⁸ ''Amuboole lino, tubuzyanie makani aamwi,'' mbwaamba Jehova; ''nekuba zibi zyenu zyasalala pyu, ziyotuba buu mbuli nyengeenge, nekuba kuti zibi zili mbuli zisani zisalalisya, ziyoba mbuli buluba. ¹⁹ Naa mwazumina akuswilizya, muyoolya bubotu bwanyika, ²⁰ pesi na mwakaka akupapila, muyoligwa panga, ipanga liyomulya chakumunyonyoona,'' nkambo mbuboobu mbwiwamba milomo ya Jehova. ²¹ Wabotesya byeni muunzi musyomesi niwasanduka kuba simamambe! Kuuzwide imbeta -- bululami bwakalikkede mulinguwo, pesi lino mwakazula bujayi. ²² Insiliva yako yasanduka yabija, wayini wako ulivwelene amaanzi. ²³ Basilutwe bako mbapanduki alimwi mbeenzinyina aababbi; boonse bayanda masinkamulomo akuchijanina kuliyigwa. Tababeteki makani abamuchaala, naa makani aba mukabafu taamvwigwi kulimbabo. ²⁴ Nkaambo kamakaniaya mbuboobu mbwaamba Mwami Jehova wamakamu, mupati wa Izilayeli: ''Maawe kuli mbabo! Nzolibwedezezya kuli abo bandikatazya, akuliya nkoto kulibasinkondoma; ²⁵ Njobozya janza lyangu kuli nduwe, kuti nsalalzye mankwisilili aako akuwisya mundalila. ²⁶ Elyo njobaamba babetesi bako bakabe mbuli batanzi, abalabo basinkuta bako mbubonya mbuli kumatalikilo; kusule lyayaaya uyowambwa munzi wabululami, chisi chisyomekede.'' ²⁷ Ziyoni uyonununwa abululami, abasanduki babo. ²⁸ Basimilandu abasizibi bayonyonyoonwa antomwe, abaabo baleka Jehova bayomaninsigwa ambabo. ²⁹ ''Nkaambo bayoofwa nsoni kumabanga aminsamu njimwakayandisya, muyoowusa nsoni kumyunda njimwakasala. ³⁰ Nkambo muyooba mbuli mubanga ufwida matu aawo, ambuli chilili chibula maanzi. ³¹ Mwalumi usimide uyooba mbuli butonge, amilimo yabo iyooba mbuli nsasi; boonse bayopya antomwe, takwepe naba umwi uyobazima.''