¹ Kwakasika aakauti kumamanino aminyaka iibili iizwide eelyo Falo wakalota. Bona, wakaliimvwi kumbali a Nayile. ² Bona, in'ombe zili musanu azibili zyakasika kazizwa muli Nayile, zyeebeka alimwi kazineneede, alimwi zyakali kuchela mumatete. ³ Bona, izimbi n'ombe zili musanu azibili zyakasika kazitobela eezi kuzwa muli Nayile, kaziteebeki alimwi kazikotede. Zyakayimikila kumbali lyazimwi n'ombe kunkomwe ya mulonga. ⁴ Mpawo in'ombe ziteebeki kazikotede zyakalya in'ombe zili musanu azibili zyeebeka kazineneede. Mpawo Falo wakabuka. ⁵ Mpawo wakalala alimwi wakalota lwabili. Bona, mitwe yanseke ili musanu ayibili yakasika aasiko lyomwe, kiineneede alimwi kili mibotu. ⁶ Bona, mitwe iili musanu ayibili, iikotede akutentwa aluwo lwa kujwe, yakasyuuka musule lyayo. ⁷ Mitwe iikotede yakamena iili musanu ayibili iineneede alimwi kayizwide. Falo wakabuka, alimwi, bona, te ndiloto. ⁸ Kwakasika aakuti ikuseni muuya wakwe wakakatazikana. Wakatuma akwiita basondi boonse abasyabusongo bamu Ijipiti. Falo wakabaambila maloto aakwe, pesi takukwe naba omwe wakakonzya kwaapandulula kuli Falo. ⁹ Mpawo silutwe wabasikubweza nkomeki wakati kuli Falo, ''Sunu ndokuyeya aatala amilandu yangu. ¹⁰ Falo wakanyemena balanda bakwe, alimwi wakandibika muchitokesi mun'anda yamupati wabalindizi, silutwe wabapeka chinkwa andime. ¹¹ Twakalota iloto mansiku omwe, we andime. Twakalota umwi awumwi muntu kakweendelana mbuli mubupanduluzi bwaloto lyakwe. ¹² Kwakaliwo wakali aandiswe ooko mwaalumi waba Hibbulu, mulanda wamupati wabalindizi. Twakamwaambila alimwi wakatupandulwida maloto eesu. Wakapandulwida umwi awumwi wesu mbuli kulota kwakwe. ¹³ Kwakasika akuba mbuli mbaakatupandulwidide, kwakaba mbubo. Falo wakandibweedezya amulimu wangu pesi umwi wangu wakamwaanzika mulukole.'' ¹⁴ Mpawo Falo wakatuma akwiita Jozefu. Bakamugwisya akufwambaana mumulindi uusiya zwi. Wakalinyoola, wazwata zimbi zizwato, alimwi wakasika wanjila kuli Falo. ¹⁵ Falo wakati kuli Jozefu, ''Ndakalota, pesi takwe sikupandulula iloto. Pesi ndamvwa aatala anduwe, kuti eelyo niwamvwa iloto ulakonzya kulipandulula.'' ¹⁶ Jozefu wakasandula Falo, wakati, ''Tachili mulindime pe. Leza ulasandula Falo achoolwe.'' ¹⁷ Falo wakaambula kuli Jozefu, ''Mumaloto angu, bona, kandiimvwi kunkomwe ya Nayile. ¹⁸ Bona, in'ombe zili musanu azibili zyakasika kuzwa muli Nayile, zineneede kazyeebeka, alimwi zyakali kuchela mumatete. ¹⁹ Bona, izimbi n'ombe zili musanu azibili zyakasika musule lyazo, zitakwe nguzu, kaziteebeki, alimwi kazikotede. Takwe mpundakali ndabona munyika yoonse ya Ijipiti kuteebeka kuli mbuli kwazyo. ²⁰ In'ombe zikoteede kaziteebeki zyakalya in'ombe ntanzi zili musanu azibili zineneede. ²¹ Eelyo nizyakazilya tekwakali kuzibikana kuti zyazilya, nkaambo zyakachili kutayebeka mbuli mbuzyakabede lutanzi. Mpawo ndakabuka. ²² Ndakalanga muloto lyangu, alimwi, bona, mitwe misanu ayibili yakasika aatala aasiko lyomwe, iizwide kili mibotu. ²³ Bona, imbi mitwe ili musanu ayibili - kinyanide, kiikotede, alimwi kiitentedwe aluwo lwa kujwe - yasyuuka musule lyayo. ²⁴ Imitwe iikotede yakamena imitwe ili musanu ayibili mibotu. Ndakaambila basondi maloto aaya, pesi takwe naba omwe walikukonzya kundipandulwida pe.'' ²⁵ Jozefu wakati kuli Falo, ''Imaloto a Falo ngamwi. Ezyo Leza nzyayanda kuchita wazyaamba kuli Falo. ²⁶ In'ombe mbotu zili musanu azibili minyaka iili musanu ayibili, alimwi imitwe mibotu iili musanu ayibili minyaka iili musanu ayibili. Maloto ngamwi. ²⁷ In'ombe zikotede kaziteebeki zili musanu azibili zyakasika kazitobela eezi minyaka ili musanu ayibili, alimwi lubo mitwe iikotede yakatentwa aluwo lwa kujwe ili musanu ayibili inoli minyaka iili musanu ayibili yenzala. ²⁸ Nchicho chintu eecho nchindakaamba kuli Falo. Eecho Leza nchayanda kuchita wachiyubununa kuli Falo. ²⁹ Langa, minyaka iili musanu ayibili yakooloka kupati iyoosika munyika yoonse ye Ijipiti. ³⁰ Minyaka iili musanu ayibili yenzala iyootobela musule, alimwi ikooloka koonse kuyoolubikana munyika ya Ijipiti, alimwi inzala iyoonyonyoona inyika. ³¹ Igoloka linoli kalitachiyeyegwi pe munyika akaambo kanzala izotobela nkaambo inoli nkali loko. ³² Ikuti iloto lyiindululwe kuli Falo nkukuti kaambo kakatangunwa aLeza, alimwi Leza lino-lino ulakachita. ³³ Lino Falo ngayanduule mwaalumi uuchenjede alimwi uli abusongo, alimwi amubike abe mweendelezi wanyika yoonse ya Ijipiti. ³⁴ Amuleke Falo asale basilutwe munyika, alimwi abazumizye bakabweze chasanu muzilyo zya Ijipiti muminyaka iili musanu ayibili yakooloka. ³⁵ Amuleke babunganye kulya koonse kwaminyaka eeyi mibotu iyobuza alimwi babambe kulya aansi abweendelezi bwa Falo, ikuti kulya kuzoobelesegwe mumadolopo. Bayelede kukubamba. ³⁶ Ikulya kunoli kwanyika yoonse kwaminyaka iili musanu ayibili yanzala eeyo inoli munyika ya Ijipiti. Muleeyi nzila inyika tikoyoojayigwa anzala pe.'' ³⁷ Oku kuchenjezya kwakali kubotu kumenso aFalo akumenso kwabalanda bakwe. ³⁸ Falo wakati kubalanda bakwe, ''Nga tulajana na mwaalumi uli mbuli oyu, mulinguwe muli Muuya waLeza?'' ³⁹ Aboobo Falo wakati kuli Jozefu, ''Mbulu kuti Leza wakautondeezya zyoonse, takwe umbi uchenjede kali abusongo mbuli nduwe. ⁴⁰ Uloyendelezya n'anda yangu, alimwi mbuli kumajwi aako ibantu bangu boonse bayooyendelezegwa. Luzutu kuchuuno chabwaami nkwesinoli mupati kwiinda nduwe.'' ⁴¹ Falo wakati kuli Jozefu, ''Langa, ndakubika mweendelezi munyika yoonse ya Ijipiti.'' ⁴² Falo wakagwisya inweenwe yabwaami kuzwa kuluboko lwakwe alimwi wazwatika luboko lwa Jozefu. Wakamuzwatika zizwato ziteteete zya bwaami, alimwi wabika incheni yangolida munsingo yakwe. ⁴³ Wakamuti ayende munkalaki yabili eeyo njaakalayo. Baalumi bakoompolola kunembo lyakwe, ''Tyola izwi.'' Falo wakamubika waba mweendelezi wanyika yoonse ya Ijipiti. ⁴⁴ Falo wakati kuli Jozefu, ''Ndime Falo, alimwi kunze kwako, takwe mwaalumi uyonyampula kuboko kwakwe na kuulu kwakwe munyika yoonse ya Ijipiti.'' ⁴⁵ Falo wakawuzika Jozefu izina, ''Zafenati Paniya.'' Wakamupa Asenati, mwana musimbi wa Potifa mupayizi wa Oni, mbuli mwanakazi wakwe. Jozefu wakeendelezya nyika ya Ijipiti. ⁴⁶ Jozefu wakali aminyaka iili makkumi aatatu eelyo nakiima kunembo lya Falo, Mwaami wa Ijipiti. Jozefu wakazwa kunembo lya Falo, alimwi wakiinka munyika yoonse ya Ijipiti. ⁴⁷ Muminyaka iili musanu ayibili yakooloka inyika yakaba abutebuzi bwiingi. ⁴⁸ Wakabunganya kulya koonse kwaminyaka ili musanu ayibili kwakali munyika ya Ijipiti alimwi wabika kulya mumadolopo. Wakabika muli limwi alimwi dolopo ikulya kwakali kuzwa mumyuunda yakalizyungulukide. ⁴⁹ Jozefu wakabunganya ikulya mbuli musele wamulwizi mubwiingi bwakuti wakaleka kubala, nkaambo tekwakachili kubalika pe. ⁵⁰ Jozefu wakaba aabana balombe babili minyaka yenzala kiitanaasika pe, aabo Asenati, mwana musimbi wa Potifa mupayizi wa Oni, mbaakamuzyalila. ⁵¹ Jozefu wakawuzika mwana wakwe mutanzi izina litegwa manase, nkaambo wakati, ''Leza wachita ndaluba mafwabi aangu ampuli ya taata.'' ⁵² Wakawuzika izina lyamwana mulombe wabili Ifulemu, nkaambo wakati, ''Leza wandichita ndaba aamichelo munyika yamafwabi aangu.'' ⁵³ Iminyaka iili musanu ayibili yazyiingi eeyo yakali munyika ya Ijipiti yakasika kumamanino. ⁵⁴ Iminyaka ili musanu ayibili yanzala yakasanguna, mbuli mbaakamba Jozefu. Kwakaba nzala munyika yoonse, pesi munyika yoonse ye Ijipiti mwakali kulya. ⁵⁵ Eelyo nyika yoonse ya Ijipiti niyakaba anzala, bantu bakakkwiilila Falo akaambo kachakulya. Falo wakati kubantu boonse ba Ijipiti, ''Amwiinke kuli Jozefu alimwi muchite eezyo nzyawamba.'' ⁵⁶ Inzala yakazulila busyu boonse bwa nyika yoonse. Jozefu wakajula zimumbwa zyoonse alimwi wawuzizya bamu Ijipiti. Inzala yakakomena munyika ya Ijipiti. ⁵⁷ Inyika yoonse yakali kusika ku Ijipiti kuzowula chakulya kuli Jozefu, akaambo kenzala yakali yaba nkali loko munyika yoonse.