¹ Nikwakainda chiindi, Sikwaba zyakunywa wamwami waku Ijipita a sikujika chinkwa wamwami bakabisizya simalelo wabo, mwami waku Ijipita. ² Falo wakabanyemena basimulimo aba babili, silutwe wabasikwaba zyakunywa asilutwe wabasikujika chinkwa. ³ Wakabajalila mung'anda silutwe wabasikulinda muntolongo omo Jozefu mwakajalilidwe. ⁴ Silutwe wabasikulinda wakababikka mumaanza a Jozefu, alimwi Jozefu wakabakutawukila. Bakakkala muntolongo kwakayindi. ⁵ Bobile aba bakalota ziloto - sikwaba zyakunywa asikujika chinkwa wa mwami waku Ijipita bakalijalilidwe muntolongo - awumwi wakalota chakwe mansiku omwe, alimwi chimwi chiloto kachijisi bupanduluzi bwacho. ⁶ Jozefu wakaza kulimbabo kuseni alimwi wakababona. Ababone bakaliwuside. ⁷ Wakababuzya basimilimo ba Falo mbakajalilidwe aabo mung'anda yasimalelo wakwe, wati, ''Nkambonzi mulangika kamusulwidwe sunu?'' Bakamwambila, ⁸ Antomwe, ''twalota chiloto alimwi takwe unga wachipandulula.'' Jozefu wakabaambila, ''Íno bupanduluzi tebwa Leza ? Kamundaambila, ndakomba.'' ⁹ Mupati wabasikwaba zyakunywa wakambila Jozefu chiloto chakwe. Wakamwambila wati, ''Muchiloto changu ndabona, chisiko chamusansa chali anembo lyangu. ¹⁰ ''Achisiko kwalimitabi iitatu, mbiyasyuuka, yafulula alimwi chikkata chamasansa chabizwa ¹¹ ''Nkomesi ya Falo yalimujanza lyangu. Ndabweza masansa alimwi ndaadinina munkomesi ya Falo, mpawo ndipedekezya Falo mujanza lyakwe.'' ¹² Jozefu wakamwambila wati, ''Bupanduluzi bwacho mboobu. Mitabi iitatu mazuba aatatu. ¹³ Mumazuba aatatu Falo uyokusumpula akukubwedezya kumulimu wako. Uyobikka nkomesi mujanza lya Falo, mbuli niwakali sikwaba zyakunywa wakwe. ¹⁴ Pele ukandiyeeye zyakukwendela kabotu ndakomba, ukandichitile buuya. Ukandambwide kuli Falo andigwisye muntolongo omu. ¹⁵ Nkambo zyanchonzyo ndakajomonwa kunyika yama Hebbulayo. Akokuno takwe chibi nchindakachita chindiwazya mudindi eli.'' ¹⁶ Mupati wabasikujika chinkwa nakabona bupanduluzi bwabota, wakati kuli Jozefu, ''Ambe ndakalota, Alimwi, mulange zisuwo zitatu zyachinkwa zyakali amutwe wangu. ¹⁷ Chisuwo chakali ajulu chakali amisyobo yoonse yakulya kujikilwa Falo, pele tuyuni twakalya kulya muchisuwo kachilamutwe wangu.'' ¹⁸ Jozefu wakamwambila wati, ''Bupanduluzi mboobu, zisuwo zitatu mazuba aatatu. ¹⁹ Mumazuba atatu Falo uyokudyunkula mutwe wako akukulengelezya amusamu tuyuni tuzolya mutunta wako.'' ²⁰ Kwakaba kuti mubuzuba bwatatu bwakali mbobuzuba bwakuzyalwa kwa Falo. Wakachita pobwe lyababelesi bakwe boonse - wasumpula mutwe wamupati wabasikwaaba zyakunywa alimwi amutwe wamupati wabasikujika chinkwa akati kababelesi alimwi. ²¹ Wakabwedezya mupati wabasikwaaba zyakunywa kumulimo wakwe alimwi wakabikka nkomesi mujanza lya Falo alubo. ²² Pele mupati wabasikujika chinkwa wakamwangilila, mbuli Jozefu mbwakamupandulwida. ²³ Pele mupati wabasikwaaba zyakunywa takwe nakamuyeeya pe Jozefu, pele wakaluba atala anguwe.