¹ Mwalumi wakaziba banakwe Eva bakaminta akuzyala Kkayini. Wakati, ''Ndazyala mwalumi alugwasyo lwa Jehova.'' ² Mpawo wakazyala mwanikakwe Abbelo. Lino Abbelo wakaba mwembeli, pesi Kkayini wakalima nyika. ³ Nikwakaba chiindi Kkayini wakayeta imwi michelo yenyika mbuli chipo kuli Jehova. ⁴ Pesi Abbelo, wakeeta bamwi babana batanzi babutanga bwakwe amafuta. Jehova wakatambula Abbelo achipo chakwe, ⁵ Pesi Kkayini achipo chakwe takwe nakamutambula pe. Awo Kkayini wakanyema loko, wakasyulungana. ⁶ Jehova wakati kuli Kkayini, ''Nkambonzi niwanyema alubo nkambonzi niwasyulungana? ⁷ Na wachita chitaluleme, chibi chilakuyubilila amulyango akuyanda kukwendelezya, pesi uyelede kuzizunda.'' ⁸ Kkayini wakambula kuli Abbelo mwanike wakwe. Kwakaba nibakali mumyuunda, Kkayini wakabukila mwanike wakwe akumujaya. ⁹ Mpawo Yahuwe wakatikuli Kkayini, ''Ulikuli Abbelo mwanike wako? ''Wakati, ''Nsiizi pe. Ndime na nindibamba mwanike wangu?'' ¹⁰ Jehova wakati, ''wachitanzi? ¹¹ ''Lino watukwa webo kuzwa kubulongo, ibwakajula mulomo wabo akutambula bulowa bwamwanike wako kuzwa kujanza lyako. ¹² Wakulima inyika, kuzwa, kuzwa lino ali njiyo tichikakutebwidi nguzu zyayo uyoba sikwempeta akuba simutuntuli anyika.'' ¹³ Kkayini wakati kuli Jehova, ''Chisubulo changu nchipati kwindilila mpunkonzya. ¹⁴ Nchobeni, wandigwisya buzuba obuno kuzwa kunyika eeyi, alimwi ndiyosiswa kubusyu bwako. Ndooba sikwempeta asimutuntuli munyika, alimwi kufumbwa undijana uyondijaya.'' ¹⁵ Jehova wakati kuli nguwe, ''Kufumbwa ujeya Kkayini, uyopegwa mulandu zyiindi zyindulwidwe musanu azibili.'' Mpawo Jehova wakabikka kufumbwa umujana, oyo muntu muntu atamulwanisyi. ¹⁶ Awo Kkayini wakazwa kubusyu bwa Jehova akuyokkala munyika ya Nodi, kubuzwezuba Edeni. ¹⁷ Kkayini wakaziba mukakwe wakaminta. Wakazyala Inokki. Wakayaka chisi wachipa zina ndyakapede mwanakwe Inokki. ¹⁸ Kuli Inokki kwakazyalwa Iladi. Iladi wakaba wisi wa Mehiyayeli. Mehiyayeli wakaba wisi wa Metusela. Metusela wakaba wisi wa Lameki. ¹⁹ Lameki wakalikwatila banakazi bobile. Izina lyawumwi kali Ada, azina lyawumwi kali Zila. ²⁰ Ada wakazyala Jabbali wakali wisi wababo bakali kukkala mumatente ibakali azivubwa. ²¹ Izina lyamukulana wakwe kali Jubbali. Wakaliwisi wababo bakalizya tuntimbwaanyeele. ²² Pesi Zila, wakazyala Tubala - Kkayini, mufuzi wazibulo zyamukuba azyabutale. Muchizi wa Tubali - Kkayini wakali Naama. ²³ Lameki wakati kubanakazi bakwe, ''Ada a Zila, amuswilizye kujwi lyangu; Inywe nubanakazi ba Lameki, Amuswilizye nzingamba. Nkambo ndakajeya mwalumi wakandichisa, mulombwana wakandichudula. ²⁴ Na Kkayini wapegwa mulandu zyiindi musanu azibili, lino Lameki uyopegwa mulandu zyiindi zili makumi musanu abili amusanu atubili.'' ²⁵ Adamu wakoona amwanakazi wakwe lubo, elyo wakazyala alimwi mwana mulombe. Wakamupa izina lyakuti Seti mpawo wakati,'' Leza wandipa uumbi mwana muchibaka cha Abbelo, nkambo Kkayini wakamujaya.'' ²⁶ Mwana mulombe wakazyalwa kuli Seti wakamupa izina lyakuti Inoshi. Kuli cheecho chiindi bantu bakatalika kwiita zina lya Jehova.