¹ Lino inzoka yakalijisi maanu kwinda bamwi boonse banyama bamumuunda oyo Jehova Leza ngwakalenga. Wakati kumwanakazi, ''Mbaakamba na nchoonzyo Leza, 'Tamwelede kulya kuzwa kumunsamu wamuchilili'?'' ² Mwanakazi wakati kunzoka, ''Ngatulalya michelo kuzwa kuminsamu yamuchilili, ³ pesi aatala amuchelo wamunsamu uli aakati kachilili, Leza wakati, ''Tamwelede kuulya pe, nikuba kuuguma, na kuti uyofwa.''' ⁴ Inzoka yakati kumwanakazi, ''Nchobeni tokoyofwa pe. ⁵ Nkaambo Leza ulizi kuti mubuzuba mbomuyowulya menso aako ayojulika, alimwi uyooba mbuli Leza, kuziba chibotu achibi.'' ⁶ Eelyo mwanakazi nakabona kuti munsamu wakali mubotu kuchilyo, alimwi wakali kubotezya kumenso, alimwi munsamu ulayandika kuti umwi abe musongo, wakabweza umwi wamichelo yawo akwiilya. Mpawo wakapa lubo imwi michelo kumulumi wakwe ngwakali aawe, alimwi wakiilya. ⁷ Menso abo boonse kabali babili akajulika, alimwi bakaziba kuti bali maya. Bakasuma matu amukuyu akulichitila zilivumbyo. ⁸ Bakamvwa musoso wa Jehova Leza kayobweenda muchilili muchiindi chakubomba kwezuba, elyo mwaalumi a mwanakazi wakwe bakayuba kuzwa kubuliwo bwa Jehova Leza aakati kaminsamu yamuchilili. ⁹ Jehova Leza wakayita mwaalumi akwaamba kuti, ''Uli kuli?'' ¹⁰ Mwaalumi wakati, ''Ndakumvwa muchilili, alimwi ndayowa, nkaambo ndali maya. Aboobo ndalisisa.'' ¹¹ Leza wakati, ''Ngwani wakwaambila kuti wali maya? Sa walya kuzwa kumunsamu ooyo ngundakakulayilila kuti utakawulyi?'' ¹² Mwaalumi wakati, ''Mwanakazi nguwakandipa kuti ndibe anguwe, wandipa muchelo uzwa kumunsamu, alimwi ndawulya.'' ¹³ Jehova Leza wakati kumwanakazi, ''Ninzi eechi nchuwachita?'' Mwanakazi wakati, ''Inzoka yandeena, alimwi ndawulya.'' ¹⁴ Jehova Leza wakati kunzoka, nkaambo kakuti wachita eechi, watukwa webo olike aakati kazivuubwa zyoonse alimwi abanyama boonse bamumuunda. Uyoyenda abula bwako, alimwi mbulongo mboyoolya mumazuba woonse abuumi bwako. ¹⁵ Ndiyobika inkondo aakati kako amwanakazi, alimwi aakati kambuto yako ambuto yakwe. Uyowuma mutwe wako, alimwi uyoluma kasiindi kakwe.'' ¹⁶ Ku mwanakazi wakati, ''Ndiyovuzya machise mukuba abana; muumachise moyootumbuka bana. Chiyandisyo chako chiyooba kumulumi wako, pesi uyokweendelezya.'' ¹⁷ Kuli Adamu wakati, ''Nkaambo kakuti waswiilizya ijwi lya mwanakazi wako, alimwi akulya kuzwa kumunsamu, aatala azeezyo nzindakakulayilila webo, kuti, 'Utakalyi kuzwa kuli nguwo,' ilitukidwe inyika akaambo kako; kwiinda mumachise aamulimu uyoolya kulingawo woonse mazuba abuumi bwako. ¹⁸ Iyokuzyalila maamvwa a mitubetube, alimwi uyoolya izisyu zyamumuunda. ¹⁹ Amitukuta yakubusyu uyoolya chibunge, kusikila ukabweede kunyika, nkaambo kuzwa kuli njiiyo nkuwakazwa. Nkaambo uli bulongo, alimwi kubulongo uyobweeda.'' ²⁰ Muntu wakawuzika mwanakazi wakwe izina lyakuti Eva nkaambo wakali banyina bazipona. ²¹ Jehova Leza wakachitila Adamu amwanakazi wakwe zisamo zyechikuumbaalimwi wabasamika. ²² Jehova Leza wakati, ''Lino muntu waba mbuli ndiswe, kuziba chibotu achibi. Aboobo lino tayelede kuzumizigwa kuti asikile aluboko lwakwe, abweze kuzwa kumunsamu wabuumi, awulye, apone kwalyoonse.'' ²³ Nkiinkako Jehova Leza wakamutandila aanze kwachilili cha Edeni, kuti apande nyika ooko nkwakabikwa. ²⁴ Aboobo Leza wakatanda muntu kuzwa muchilili, alimwi wakabika kkelubbimu kubuzwezuba bwachilili cha Edeni, alimwi afulo limweka lyakali kuzyunguluka koonse koonse, kuti likalinde kunzila yamunsamu wabuumi.